Ə.Ağasıyev iclas iştirakçılarının diqqətini fevral ayının 6-da dövlət başçısının imzaladığı "Azərbaycan Respublikasında kurortların 2009-2018-ci illərdə inkişafı üzrə Dövlət Proqramı"na yönəltdi. Dedi ki, bu proqram respublikamızda dünya standartlarına cavab verən kurortlar şəbəkəsi yaradılmasını nəzərdə tutur. Proqramın reallaşması çox da uzaq gələcəyə hesablanmayıb. Bizim gözlənilən rəqabətə hazırlaşmağımız üçün çox az vaxtımız qalır. Yeniləşməyi, xidmətin səviyyəsini qaldırmağı bacarmasaq, təxminən 200 hektara yaxın ərazidə uzun illərdən bəri fəaliyyət göstərən sağlamlıq müəssisələrimizdən əl çəkmək məcburiyyətində qalacağıq. Cəmiyyətin rəhbəri bu çətin vəzifənin öhdəsindən gəlməyin lokomotivi kimi işə münasibətin 180 dərəcə dəyişməsini göstərdi: “Düz bir il əvvəl "Kurort" Səhmdar Cəmiyyətinə yeni prezident təyin edilsə də, kadrların heç biri vəzifəsindən uzaqlaşdırılmadı. Amma məndən qabaq dinlənilən hesabat çıxışlarından da göründüyü kimi, şərait hiss ediləcək qədər yaxşılaşıb. Deməli, böyük təcrübəyə malik kadr potensialımız var. Sadəcə, bu potensialın üzə çıxmasına istək lazımdır”.
Ə.Ağasıyev çıxışını nikbin notlarla yekunlaşdırdı: “Biz cəmi bir il ərzində işimizdə dönüş yarada bildik. Bunu müalicəyə gələn insanlar da təsdiq edirlər. Xadimədən tumuş baş həkimə qədər hamımız ancaq xidməti yüksəltmək barədə fikirləşsək, müasir kurort şəbəkəsi qurmaq istəyimizə çatmaq çətin olmayacaq”.
2008-ci ildə yaradılmış dönüş "Bilgəh", "Abşeron", "Günəşli" sanatoriyalarının baş həkimlərinin, "Xidmət İş" Hİ Federasiyasının, "Kurort" SC-nin məsul işçilərinin hesabat xarakterli çıxışlarında da aydın görünürdü. Çıxışlarda bildirildi ki, 2008-ci ildə "Bilgəh", "Şıx" və "Xəzər" sanatoriyalarında yeni müalicə otaqları təşkil olunmuşdur. Sağlamlıq ocaqları üçün 50 ədəd yeni tibb avadanlığı alınmış və istifadəyə verilmişdir. Müasir tələblərə cavab verən və yeni tibbi avadanlıqlarla təchiz edilmiş sanator-diaqnostik mərkəz yaradılmışdır.
Qidalanmanın təşkilində xeyli irəliləyiş qeydə alınır. Belə ki, alınan ərzaq məhsullarının keyfiyyəti, xörəklərin çeşidi və işçilərin xidmət mədəniyyətinin aparılması daim diqqət mərkəzində saxlanılmışdır. "Bilgəh", "Qaranquş", "Abşeron", "Şıx" və "Günəşli" sanatoriyalarının yeməkxanalarında müxtəlif istilik və ventilyasiya sistemləri qurulmuş və ya bərpa edilmişdir. "Bilgəh" sanatoriyasında yüksək səviyyədə xidmət göstərilən imkanı verən yeni yemək zalı təşkil edilmişdir. Burada "Şvet stolu"nun tətbiqi üçün avadanlıqlar quraşdırılmışdır. Mədəni-kütləvi işlər gücləndirilmişdir. Sağlamlıq ocaqlarında müasir tələblərə cavab verən 58 çarpayı və 8 çarpayılıq lüks tipli kotec istifadəyə verilmiş, üç ədəd yeni tipli istilik qazanı quraşdırılmış, 4 ədəd istilik qazanı əsaslı təmir olunmuş, 4735 metr istilik və su xətti çəkilmişdir.
Sağlamlıq ocaqlarında yeməkxanalar əsaslı təmir olunmuş, istiliklə və kondisionerlərlə təmin edilmişdirlər.
18 su quyusu təmir olunub, 8 ədəd yeni quyu qazılıb, 2 ədəd böyük həcmli çən quraşdırılıb, 1100 metr elektrokabel və 1450 metr qaz borusu çəkilib, "Günəşli", "Bilgəh" və "Naftalan" sanatoriyalarında abadlıq və yenidənqurma işləri aparılıb.
Cari ildə 139 ədəd televizor, 69 soyuducu, 1980 ədəd müxtəlif növ mebel, 34 elektrik avadanlığı, 85 kondisioner, 28 mühərrik təmir olunub və 36 ədəd antena qurulub. Bununla yanaşı, 42 ton yataq dəsti yuyulub, 1500 kubmetr zibil daşınıb, 40000 kubmetr sahədə dezinfeksiya , dezinseksiya və deratizasiya işləri aparılıb.
"Günəşli" sanatoriyasının işçiləri əsaslı təmir edilmiş və müasir avadanlıqla təmin olunmuş inzibati binaya köçürülmüşlər.
Cəmiyyət xidməti təşkilatlara olan borclardan 3,8 milyon manatı əvəzləşmə yolu ilə ləğv etmişdir. Vergi borcları üzrə 640 min manatadək azalma aparılmış, Dövlət Sosial Müdafiə Fonduna olan borcların 300 min manata qədərinin silinməsi üçün lazımi işlər görülmüşdür. Bunun da nəticəsində Cəmiyyətin bütün sağlamlıq ocaqlarının və təsərrüfatların bank hesablarının fəaliyyəti bərpa edilmiş və vergi idarələri ilə hesablaşmalarda yaranmış çətinliklər aradan qaldırılmışdır.
Qeyd etmək lazımdır ki, görülmüş işlərin sayəsində əhalinin sanator-kurort sisteminə inamı və axını güclənmişdir. Beləliklə, sağlamlıq ocaqlarına gələn xəstələrin sayı xeyli artmış və qaiblərin sayı 4,4 dəfə azalmışdır.
2008-ci ildə Cəmiyyət sağlamlıq ocaqlarının və təsərrüfatların fəaliyyətinə dair 44 sərəncam vermiş (2007-ci ildə-17 sərəncam), İdarə Heyətində Cəmiyyətin fəaliyyətində çox vacib olan 15 məsələyə baxılmışdır.
Kollegiya iclasında "Xidmət İş" Hİ Federasiyasının prezidenti İlyas Əliyev çıxış edərək Azərbaycan kurort məkanında mövcud olan vəziyyətdən, bu məkanda layiqli yer tutmaq üçün həmkarlar ittifaqının müalicə-sağlamlıq ocaqlarının qarşısında duran vəzifələrdən danışdı. Bir sıra təkliflər irəli sürdü və tövsiyələr verdi. Kollegiya deyilənləri nəzərə alaraq "Kurort" SC-nin müəssisələrinin fəaliyyətini gələcəkdə daha da yaxşılaşdırmaq məqsədi ilə mühüm qərarlar qəbul etdi.
Sonda 2008-ci ildə əldə etdikləri nailiyyətlərə, göstərdikləri təşəbbüskarlığa görə Cəmiyyətin on yeddi işçisinə pul mükafatı, qiymətli hədiyyələr təqdim edildi. Dörd nəfərə isə, əmək kitabçasına yazılmaqla, təşəkkür elan olundu.

B.SAFAOĞLU.

çap üçün verisya