İqtisadi İnkişaf Nazirliyinin regionların sosial-iqtisadi inkişafı Dövlət Proqramının əlaqələndirilməsi, monitorinqi və icrası üzrə katibliyinin rəhbəri Sahib Məmmədovun fikrincə, yeni Dövlət Proqramı Azərbaycanda dinamik inkişafın sürətlənməsində, makroiqtisadi sabitliyin möhkəmlənməsində və bölgələrin bərabər şəkildə inkişaf etməsində mühüm rol oynayacaq.
S.Məmmədov bildirib ki, yeni Dövlət Proqramının ana xətti qeyri-neft sektorunda istehsal olunan məhsulun iqtisadiyyatda və ümumi daxili məhsulda bir neçə dəfə artımına nail olmaqdan ibarətdir. Təbii ki, bu məqsədlə yeni sənəd kənd təsərrüfatı, emal və yeyinti sənayesi, nəqliyyat, tikinti, infrastruktur, rabitə, turizm ilə bağlı sahələri əhatə edən layihələrlə zəngin olacaq. Bunun üçün hökumət bütün rayon və ucqar yaşayış məntəqələrində infrastruktur-kommunal sektorun davamlılığını təmin etməyə çalışacaq. Ən ucqar kəndlərdə bütün sosial və kommunal xidmət növlərinin yaradılmasını başa çatdırmaq, rayonlarda iqtisadi fəallığı artırmaq üçün digər tədbirlərlə bağlı kompleks islahatları həyata keçirmək nəzərdə tutulur. 2009-2013-cü illərdə elektrik enerjisi, qazlaşdırma sahələrinə, içməli su təminatı, meliorasiya və suvarma bölmələrinə böyük diqqət ayrılacaq, bir çox infrastruktur proqramlar həyata keçiriləcək. Bir sözlə, Azərbaycanın bütün bölgələrində, kənd və qəsəbələrində bu iqtisadi hədəflərin reallaşması nəticəsində tamamilə yeni mənzərə yaranacaq.
2009-2013-cü illəri əhatə edən proqramın spesifik xüsusiyyətlərindən biri hər bir kənd və qəsəbə üzrə ayrıca tədbirlər planını reallaşdırmaqdan ibarət olacaq. Yəni hər kəndin spesifik xüsusiyyəti və əhalisinin təklifləri nəzərə alınaraq ayrıca texniki-iqtisadi layihəsi hazırlanacaq. Məlumat üçün deyim ki, yeni beşillik proqram hazırlanarkən bölgələrdən çoxsaylı təkliflər gəlib. Növbəti beş ildə bütün rayonların qazlaşdırılması, fasiləsiz elektrik enerjisi, keyfiyyətli su xidmətləri ilə əhatə olunması, bütün məhəllədaxili yolların əsaslı şəkildə yenidən qurulması, qəsəbələrdə yeni müəssisələrin, ticarət mərkəzlərinin, xidmət obyektlərinin yaradılması üzrə tədbirlər görüləcək. Rayonlardakı məktəblərin, xəstəxanaların, digər səhiyyə obyektlərinin bərpası, rabitə və nəqliyyat xidmətlərinin əhatəli şəkildə təmin olunması proqramın başlıca istiqamətlərini təşkil edəcək. 2013-cü ilədək vətəndaşların sosial xidmətlərdən əhatəli şəkildə istifadə etməsi üçün yeni səhiyyə müəssisələrinin, stasionar və diaqnostika mərkəzlərinin inşası, rabitə müəssisələrinin modernləşdirilməsi, məktəblərin ən yeni avadanlıqlarla təmin edilməsi, onların istilik təchizatının yaxşılaşdırılması nəzərdə tutulur. Yeni proqramı bir növ regionların deyil, kəndlərin inkişaf proqramı da adlandırmaq olar.
2009-2013-cü illərə dair Dövlət Proqramını səciyyələndirən əsas xüsusiyyətlərdən biri işğal olunmuş rayonlarda sosial-iqtisadi layihələrin həyata keçirilməsidir. Yuxarı Qarabağ və Kəlbəcər-Laçın iqtisadi rayonlarına daxil olan ərazilərdə sosialyönümlü obyektlərin inşa edilməsi, kommunal və infrastruktur şəbəkələrinin yaradılması nəzərdə tutulur. Həmin rayonlar işğaldan azad edildikdən sonra burada sosial-iqtisadi inkişafla bağlı xüsusi proqram hazırlanıb həyata keçiriləcək. Proqramların əsas mahiyyəti məcburi köçkünlərin yaşayış səviyyəsinin yaxşılaşdırılması, məktəb, səhiyyə, xəstəxana və digər sosial obyektlərin tikintisi, vətəndaşların yeni iş yerləri ilə təmin edilməsindən ibarətdir. Yeni müəssisələrin yaradılmasının miqyasının genişləndirilməsi üçün sahibkarların maliyyə təminatının yaxşılaşdırılması, onlara güzəştli vergi-gömrük tarifləri tətbiq edilməsi, yeni yaradılan müəssisələrin ən müasir avadanlıqlarla təmin edilməsi və digər tədbirlər də proqramın başlıca istiqamətlərini təşkil edəcək.
Regionların inkişafı ilə bağlı yeni layihələrin maliyyə mənbələrinə gəlincə, hökumət yaxın illərdə ölkənin valyuta sərvətlərinin bir neçə dəfə artacağını və bu vəsaitlərin həmin iqtisadi tədbirləri həyata keçirməyə imkan verəcəyini proqnozlaşdırır. Yeni proqramın reallaşması məşğulluq səviyyəsinin daha da artırılmasına, nəinki rayonlarda, hətta kəndlərdə də yeni müəssisələrin yaradılmasına və əhalinin rifah halının yaxşılaşdırılmasına hesablanıb.
ELTAC.

çap üçün verisya