Ənənəvi olaraq hər il keçirilən və "Rus Davosu" adlandırılan sammitdə Birliyə daxil olan ölkələrin tanınmış şirkətlərinin və banklarının da iştirakı planlaşdırılır. Ümumiyyətlə, həm də Beynəlxalq İqtisadi Forum adını qazanmış Sankt-Peterburq sammitində qlobal məsələlər, xüsusilə də beynəlxalq maliyyə böhranı, enerji təhlükəsizliyi, bəzi ölkələrdə yaranmış ərzaq qıtlığı problemi, iqlim dəyişiklikləri və digər istiqamətlər üzrə müzakirələrin aparılması nəzərdə tutulur. Xatırladaq ki, sonuncu dəfə bu cür qeyri-formal sammit ötən ilin iyun ayının 6-da keçirilib.
Bir çox ekspertlər Sankt-Peterburq forumunu hətta aprel ayında Londonda keçirilmiş "Böyük İyirmilik"in sammitinin davamı kimi də qiymətləndirir. Onların qənaətinə görə, MDB-də maliyyə və valyuta böhranlarının davam etməsi, iqtisadi geriləmə hallarının müşahidə olunması bu gün başlıca qlobal problemlərdəndir və bununla bağlı əhatəli kompleks tədbirlər görülməlidir. MDB dövlətlərinin birgə iqtisadi inkişaf strategiyası həm də Avropa və Asiya ölkələrinin böhrandan çıxması üçün mühüm rol oynaya bilər. MDB regionu dövlətləri ərzaq təhlükəsizliyi, nəqliyyat-kommunikasiya və enerji resurslarının diversifikasiyasında strateji mövqeyə malik olduğundan Avropa ölkələri bu qurumun təklif etdiyi antiböhran paketinin reallaşmasına dəstək göstərməlidir. Bəzi ekspertlərin fikrincə, böyük dövlətlərin maraqları böhrana qarşı konseptual iqtisadi mexanizmlərin hazırlanaraq həyata keçirilməsinə mane olur. Buna görə də Rusiyanın və MDB-nin inkişaf etmiş digər dövlətlərinin böhranla mübarizəyə dair birgə təklif etdikləri müddəalar Avropa İttifaqı və beynəlxalq maliyyə institutları tərəfindən qəbul olunmalıdır.
MDB İcraiyyə Komitəsinin birinci müavini Vladimir Qarkun bildirib ki, Birlik çərçivəsində daxili bazarın maksimum dərəcədə qorunması, bank vəsaitlərinin perspektivli biznes-layihələrin sərmayələşdirilməsinə yönləndilməsi, hətta MDB-yə üzv ölkələrin sərhədlərindən xaricə kapital ixracının qarşısının alınması və sair təklifləri nəzərdə tutan proqramın hazırlanması gərəkdir. Bu proqram həmçinin dünya bazarlarında baş verən spekulyasiyaların ləğvini, maliyyə bazarlarına nəzarətin gücləndirilməsini, maliyyə inamının bərpa olunması üçün bankların likvid fəaliyyətinin artırılmasını, beynəlxalq ticarətin stimullaşdırılmasını, ticarətdə mövcud olan proteksionizm siyasətinin qarşısının alınmasını və digər istiqamətləri də özündə əks etdirir. V.Qarkun MDB daxilində iqtisadi canlanma yaratmaq üçün iri banklar tərəfindən maliyyə axınlarının gücləndirilməsi ilə bağlı qərarın qəbul edilməsini də vacib saydığını diqqətə çatdırıb. O həmçinin Birlik daxilində vergidən yayınma hallarına qarşı birgə mübarizə tədbirlərinin həyata keçirilməsini də zəruri sayır. V.Qarkun deyib ki, böhranın doğurduğu neqativ hallara qarşı Birlik dövlətləri tərəfindən birgə addımların atılması məqsədəuyğundur. MDB dövlətləri dünya iqtisadi-maliyyə böhranının öyrənilməsi və onun arxada qoyulması ilə bağlı müvafiq təkliflərin hazırlanması ilə məşğul olmalıdır. MDB İcraiyyə Komitəsinin birinci müavini həmin təkliflərin Sankt-Peterburq sammitində müzakirəyə çıxarılacağını istsina etməyib.
Rusiyanın "Qazprom" şirkətinin sədri Aleksey Miller isə sammitqabağı rus KİV-lərinə açıqlamasında bildirib ki, MDB ölkələrinin qaz və neft marşrutlarının birləşdirilməsi üçün ciddi addımların atılması gərəkdir. Bu layihələri gerçəkləşdirmək üçün regionun zəngin enerji təchizatçıları olan dövlətlərin dəstəyinə ehtiyac var. Onun fikrincə, Azərbaycan və Türkmənistanın enerji marşrutlarının diversifikasiyası ilə bağlı yürütdüyü siyasət bu cür enerji dəhlizlərinin yaradılmasına imkan verir.
Sankt-Peterburq sammitində MDB-nin gələcək inkişafı və fəaliyyətinin təkmilləşdirilməsi, Birlik ölkələrinin miqrasiya siyasəti kimi strateji əhəmiyyət kəsb edən məsələlərin də müzakirəsi nəzərdə tutulur. Ümumiyyətlə, MDB-nin effektiv çoxtərəfli əməkdaşlıq formatına çevrilməsi üçün səylərin artırılması sammitin strateji məqsədlərindən biridir.

çap üçün verisya