Yaşamaq hüququnu verən pulun məbləği dəqiqləşdi

Azərbaycanda son vaxtlar iqtisadi artım tempinin yüksəlməsi ölkə ərazisinə əcnəbi axınını xeyli sürətləndirib. Bu, ilk baxışda sevindirici hal olsa da, neqativ nəticələri də az olmur. Çünki ölkəyə axın edən xaricilərin heç də hamısı milyonçu olmur. Gələnlərin arasında macəra axtaranlar, adi işçilər, sadəcə, təsadüfi adamlar, hətta fırıldaqçılar da var. Onların isə xeyirdən çox ziyanı olur. Ona görə də hökumət bu axından səmərəli istifadə etmək, əhalisinin təhlükəsizliyini təmin etmək, sabitliyi qorumaq, ümumiyyətlə, qeyri-müəyyənliyin fəsadlarını aradan qaldırmaq məqsədi ilə əcnəbilərin Azərbaycanda yaşamaq hüququ alması üçün ölkəyə yatıracaqları pulun məbləğini dəqiqləşdirib.

Doğrudur, əvvəllər də vətənimizdə yaşamaq hüququ vəsait yatırmaqla qazanılırdı. Amma konkret məbləğ dəqiqləşmədiyindən bəzən söhbət 5-10 min dollarlıq investisiyalardan gedirdi. Amma artıq Nazirlər Kabineti bu qeyri-müəyyənliyə son qoyub. İnvestisiya qoyuluşu dəqiqləşdirilib: 300 min manat və ya 375 min dollar. Əlbəttə, 375 min dollarlıq investisiya tələbi ölkəyə nisbətən imkanlı və pul xərcləməyə hazır olan xarici vətəndaşların gəlməsinə kömək edəcək. Bu isə ölkəyə son illər gələn saysız-hesabsız əcnəbilərdən səmərəli yararlanmağa şərait yaradacaq.
Qeyd edək ki, bu təcrübədən yalnız Azərbaycanda deyil, dünyanın bir sıra inkişaf etmiş ölkələrində də istifadə edilir. Əcnəbi ekspertlər də apardıqları araşdırmalar zamanı belə qənaətə gəliblər ki, hər bir ölkənin bu sahədəki qaydalarını təkmilləşdirilməsi çox vacibdir. Çünki bu qaydalar ölkəyə gələn xaricilər üçün bir növ filtr rolunu oynayacaq. Məsələn, Misirdə xaricilərə yaşayış hüququnun verilməsi üçün onun 50 min dollarlıq obyekt alması kifayətdir. Sonradan belələri ölkədə hətta daimi yaşaya bilirlər. Birləşmiş Ərəb Əmirliklərində - Dubayda yaşamaq üçün daha çox pul qoymaq lazımdır - 1 milyon dirhəm və ya 274 min dollarlıq obyekt alana rezident vizası verilir.
Avropa Birliyində bu məbləğ 250 min avrodur. Amma ölkələr arasında müəyyən fərqlər var. Məsələn, Fransada yaşayış hüququ almaq üçün bura ən azı 150 min avro pul qoymaq lazımdır. Xarici hüquq məsələləri üzrə ekspertlərin sözlərinə görə, investisiyanın artması rəsmiləşdirmə proseduruna da təsir edir. Məsələn, 1 milyon pul qoyanların məsələsi avtomatik həll olunur.
Bolqarıstanda yaşamaq üçün bura 500 min dollar qoymaq lazımdır. Məbləğ 1 milyon olsa, həmin şəxsə Bolqarıstan prezidentinin fərmanı ilə vətəndaşlıq da verilir. 350 min dollar xərclədiyiniz halda isə hətta Karib ölkələrində, məsələn, Dominikanda da vətəndaşlıq almaq olar. Bunun üstünlüyü odur ki, Dominikan pasportu ilə dünyanın əksər ölkələrinə vizasız getmək olur.
Ümumiyyətlə, daşınmaz əmlak almaq dünyanın hər yerində sərfəlidir. Amerika hökuməti ölkənin daşınmaz əmlak bazarını, ümumiyyətlə, iqtisadiyyatını canlandırmaq üçün çoxdan sınanmış üsula əl atıb.
Amerika Birləşmiş Ştatlarında ölkəyə 500 min dollardan artıq sərmayə yatıranlara yaşamaq hüququ, yəni "Qrin kart" verməyə hazırdır. Birləşmiş Ştatlarda tətbiq olunan yeni proqrama əsasən, ölkədə kommersiya əmlakına, yəni kommersiya obyektlərinə 500 min dollar yatıran xaricilərə 6 ay müddətinə "Qrin kart", yəni bu ölkədə yaşamaq hüququ veriləcək. Bu hüquq həmin şəxslərin özləri ilə yanaşı 10 nəfər ailə üzvünə də aiddir. Bu barədə "Paramount kapital" və "Paramount emihration servis" şirkətinin birgə məlumatında bildirilir. Başqa sözlə, lazımi qədər pulun olsa Amerikada da yaşamaq mümkündür.
Əslində ABŞ-da biznes miqrasiyası elə indiyə qədər mövcud idi. Amma indi bu proses daha da sadələşib. Məsələn, əvvəlki qaydalara görə, Amerikada yaşamaq hüququ almaq istəyənlər bu ölkədə biznes qurmalı, iş yerləri açmalı və şirkəti idarə etməliydilər. İndi isə, sadəcə, kommersiya obyekti almaq kifayət edir. Məlumatda bildirilir ki, Amerikada daşınmaz əmlak alanlar əvvəlcə ölkədə məhdudiyyət qoyulmadan yaşamaq və işləmək hüququ verən immiqrant investor vizası alırlar. İki ildən sonra onlara daimi yaşayış hüququ, daha sonra isə vətəndaşlıq verilir.
Bundan başqa, əvvəllər Amerikada yaşamaq üçün burada azı 1 milyon dollarlıq əmlak almaq lazım gəlirdi. Üstəlik, bu əmlak o qədər də inkişaf etməmiş və gəliri aşağı olan ərazilərdə olmalıydı. Yeni proqramda isə xarici investorlar üçün yeni imkanlar açılıb. Onlar ölkənin istənilən, yəni ən prestijli ərazilərində də daşınmaz əmlak ala bilərlər. Üstəlik, qaydalara görə belə əmlakın sahibləri onu iki ildən sonra sata da bilərlər. Beləliklə, Birləşmiş Ştatlar ölkə iqtisadiyyatına investisiyalar cəlb etmək üçün xaricilərə əlavə üstünlüklər verməyə başlayıb. Əslində bu variant hər iki tərəfə sərf edir. Amerikada yaşamaq istəyənlərin sayı həmişə çox olduğundan bunun üçün pul xərcləyən də tapılacaq. Amerikanın özü isə bu üsulla ölkə iqtisadiyyatına lazım olan investisiyanı cəlb edə bilir. Görünür elə bunun nəticəsidir ki, birinci yarım ildə ölkənin ən populyar ştatlarına - Florida, Nyu-York və Kaliforniyaya investisiya qoyuluşları ayda 2 faiz artıb.

çap üçün verisya