İtaliyanın məşhur «Gianni Versace» adlı moda evi 1300-dək işçini ixtisara salacağını bildirib. Bu ixtisarlar şirkətin korporativ strukturunun təkmilləşdirilməsinə xidmət edəcək.

Böyük Britaniyada poçt işçiləri genişmiqyaslı tətil aksiyasına başlayıblar. Üç gün çəkəcəyi planlaşdırılan aksiyanın hər gün səhər saatlarından axşama kimi davam edəcəyi nəzərdə tutulub. Əməkhaqlarının günbəgün azaldılması və iş yerlərinin ixtisar edilməsi tətillərin əsas səbəbidir.

Noyabrın 1-dən «McDonald’s»ın Reykyavikdə fəaliyyət göstərən filiallarının bağlanacağı gözlənilir.

Bir müddət öncə fəaliyyəti dayandırılan Çerkizov bazarının işçiləri Ümumrusiya Ticarət və Xidmət İşçiləri Həmkarlar İttifaqının ilk təşkilatını yaradıblar. Onlar bu üsulla öz hüquq və maraqlarını qorumaq niyyətindədirlər.
Yeni yaranmış həmkarlar ittifqının sədri Leonid Razvozjayev bildirib ki, bizim öz iş yerlərimizi tələb etmək hüququmuz var: «Çerkizov bazarında on minlərlə insan işləyirdi. Əgər onların bir hissəsi həmkarlar ittifaqının üzvü olsa, bu, güclü bir təşkilat olacaq. Artıq satış məntəqəsindən və mallardan məhrum olan yüzlərlə ticarətçi yeni təşkilatın üzvlüyünü qəbul edib».

Şirkətin 25-ci əməkdaşı da həyatına sui-qəsd etdi

Fransanın telekommunikasiya sektorunda kifayət qədər abonenti olan tanınmış "Franse Telekom" şirkətində yaşanan ölüm dalğası öz əhatə dairəsini genişləndirməkdə davam edir. Belə ki, 48 yaşlı işçinin ölümü son 20 ayda artıq 25-ci intihar hadisəsidir. İşçi şirkət həkiminin tövsiyəsi ilə xəstəlik vərəqəsi aldıqdan bir ay sonra həyatına sui-qəsd edib. Telekom işçiləri şirkət əməkdaşlarının ölüm dalğasının bundan sonra da davam edəcəyini istisna etmirlər. Qurum əməkdaşları ölümlərindən öncə yazdıqları məktublarda sui-qəsdi mövcud çətin iş rejimi və qurum menecmentinin onlarla pis rəftarı ilə əlaqələndiriblər.

"Opel"in yeni sahibləri olan Kanadanın "Maqna" və Rusiyanın "Sberbank" şirkətləri Almaniyada yerləşən zavodlarının təxminən 4 500 işçisini ixtisara salmaq niyyətindədir. Belə ki, Boxumda 2 000, Russelsxaymda 1 800, Kayzerslauterndə isə 300 işçinin işsiz qalacağı gözlənilir. Yalnız Eyzenaxda yerləşən müəssisənin işçilərinin ixtisara düşməyəcəyi planlaşdırılır. Bu da İspaniyanın Saraqose şəhərində yerləşən zavodun buraya köçürüləcəyi ilə əlaqədardır. Zavodun bağlanması yerli əhalinin etirazına səbəb olub. Saraqosedəki nümayişə 15 mindən çox adam çıxıb.

Böyük Britaniyanın "Böyük Mançester" qraflığında avtobus sürücülərinin tətili nəticəsində marşrutların böyük hissəsi təxirə salınıb, yalnız məktəb şagirdlərinə və universitet tələbələrinə xidmət edən avtobuslar işləyir.

Qeyd edək ki, sentyabrın 10-da yerli həmkarlar ittifaqlarının nümayəndələri və "First Group" nəqliyyat şirkətinin rəhbərliyi arasında danışıqlar olmuşdu. Həmkarların nümayəndələri işçilərin əməkhaqlarının artırılmasını tələb ediblər.

"Toyota" şirkəti ABŞ-da yerləşən "NUMMİ" zavodunun fəaliyyətini dayandırmağı planlaşdırır. Bu isə minlərlə işçinin işsiz qalacağından xəbər verir.

Avtomobil sənayesi işçilərinin həmkarlar ittifaqı (UAW) "Toyota"nın rəhbərliyinin "vaxtsız" qərarını kəskin tənqid edib. Təşkilatın prezidenti Ron Qetelfingerin sözlərinə görə, adı çəkilən müəssisənin bağlanması Kaliforniyanın minlərlə işçisi üçün ağır xəbər olacaq.

Maliyyə böhranı «Goodyear Tire & Rubber Company» kimi nüfuzlu və öndəgedən şin konsernindən də yan keçmədi. Böhranın neqativ təsiri nəticəsində konsernin gəliri ötən illə müqayisədə nəzərə çarpacaq dərəcədə azalıb.

Təxminən 554 milyon dollar civarında ziyana düşən konsern 5 200 işçini ixtisara salmaq məcburiyyətində qalıb.
İxtisarlara düşənlərin sayını azaltmaq üçün konserndə fəaliyyət göstərən “United Steelworks” (USW) həmkarlar ittifaqı təşkilatı qurumun rəhbərləri ilə hələ iyun ayından danışıqlara başlamışdı. Nəhayət bu günlərdə tərəflər kompromis əldə edə bildilər. Konsern rəhbərliyi işçilərlə 4 illik əmək müqaviləsi bağlamağa razılıq verdi.

Linzhou Dəmir-Çelik fabrikinin “Fengbao İron Steel Co” adlı şirkətə tabe olmasını istəməyən işçilər bu ayın əvvəllərində qanlı etiraza əl atmışdılar. Həmin şirkətin rəhbərlərindən birini öldürməklə özəlləşdirməni dayandırmışdılar.

Böyük Britaniyanın «Royal Mail» Poçt Şirkətinin Londonda fəaliyyət göstərən idarələrinin işçiləri şirkətdə aparılan kütləvi ixtisarlara etiraz edərək növbəti aksiya keçiriblər.
«Royal Mail»da yaşanan qalmaqal səngimək bilmir. Artıq Şirkətin Həmikarlar İttifaqı Birliyinin üzvlərinin sözlərinə görə, ixtisarlar, rəhbərliyin təklif olunan güzəştlərdən imtina etməsi işçilərin qəzəbinə səbəb olub.

Almaniyanın Həmkarlar İttifaqı Birliyinin üzvləri ölkənin müəssisə və şirkətlərində çalışan işçilərin problemləri ilə yaxından tanış olmaq üçün onların bir qismi arasında sorğu keçiriblər. Sorğunun nəticələri ölkənin hər üçüncü işçisinin işindən narazı olduğunu üzə çıxarıb.

Gürcüstanın Baş naziri Nika Gilauri ölkənin birləşmiş həmkarlar ittifaqı təşkilatının sədri İrakli Petriaşvili ilə görüşüb. Sədr Nika Gilaurinin həmkarlar ititfaqının fəaliyyəti ilə maraqlanan ilk baş nazir olduğunu diqqətə çatdırıb.
Görüşdə əmək müqaviləsinə ediləcək əlavə və dəyişikliklərlə bağlı müzakirələr aparılıb. Bununla yanaşı, hökumət, həmkarlar ittifaqı və sahibkarların irəli sürdüyü üçtərəfli təkliflər müzakirə edilib. Sözügedən təkliflərə beynəlxalq qurumlar da qoşulublar.