Mətanət Hüseynova klinikada nə az, nə çox - 4 dəfə əməliyyat olunub. Birinci əməliyyata 800 dollar, ikinci əməliyyata isə 600 dollar verdiyini bildirir: "Məsələ ilə bağlı Səhiyyə Nazirilyinə də müraciət etmişəm. Nazirilyin xətti ilə respublikanın baş cərrahı Məmməd Kərimov müayinə etdikdən sonra müalicənin xarici ölkələrdə uğurlu olacağını dedi. Almaniyada müayinə zamanı məlum oldu ki, burnumun əvvəlki görkəmini geri qaytarmaq mümkün olsa da, qulaqlarımın görkəmini bərpa etmək qeyri-mümkündür. Almaniyada müalicə olunmaq üçün 150 min avro lazımdır. Bu məbləği kompensasiya kimi xəstəxanadan tələb etmişəm”.
Mətanət xanım Xətai Rayon Məhkəməsində onu "gözəlləşdirən" həkimi Rafiq Dəmirçalova qarşı iddia qaldırıb. Proses hakim Səadət Səlimovanın icraatındadır.
Məsələyə aydınlıq gətirmək üçün Leyla Şıxlinskaya adına Klinika ilə əlaqə saxladıq. Rafiq Dəmirçalovun məzuniyyətdə olduğu bildirildi. Qeyd edək ki, həkim ayın sonunda işə qayıdacaq.
Maraqlıdır, belə olan halda hüquq-mühafizə orqanları ağxalatlılara qarşı hansı tədbirləri həyata keçirmək səlahiyyətinə malikdirlər? Həkimlər sağlamlığımıza zərər yetiribsə, biz nə etməliyik?
Bu və digər suallarımızı cavablandırmaq üçün "Kermus Consaltinq" hüquq şirkəti ilə əlaqə saxladıq. Şirkətin direktor müavini Ceyhun Cəfərlinin sözlərinə görə, Cinayət Məcəlləsinin 142-ci maddəsinə əsasən, tibb işçisinin üzrlü səbəblər olmadan xəstəyə tibbi yardım göstərməməsi nəticəsində onun sağlamlığına az ağır zərərvurma baş verirsə, təqsirkar 330 manata qədər cərimə oluna bilər. Həmçinin tibb işçisi tibbi yardım göstərmədiyinə görə, 2 ilədək müəyyən vəzifə tutmaq hüququndan məhrum edilir. Bununla yanaşı, 1 ilədək islah işləri və ya 6 ayadək azadlıqdan məhrum etməklə cəzalandırılması istisna deyil.
Etiraf edək ki, əksər hallarda pasiyentlərin əlində həkimə və müalicəyə xərclədiyi məbləğlə bağlı sənədlər olmadığına görə, onlar müvafiq instansiyalara müraciət edə bilmirlər. Vəkil iddianı sübut etmək üçün mütəxəssislərin ekspertiza aparmasını tələb edə bilər. Təbii ki, bunu tibb elminin inkişaf hüdudları çərçivəsində etmək mümkündür. Məsələn, hansısa tibbi preparat reseptə uyğun tətbiq olunmayıbsa, bu, həkimin ya qəsdi, ya da ehtiyatsızlığı ucbatından baş verir. Həkimin vurduğu zərər ağırlaşdıqca sanksiya da sərtləşir. Səhiyyə xidmətindən narazı qalan oxucularımızın diqqətinə çatdıraq ki, Cinayət Məcəlləsinin 142-ci maddəsinə əsasən, əgər tibbi yardım göstərilməməsi şəxsin ölümünə səbəb olubsa, təqsirkar 3 ilədək müəyyən vəzifə tutmaq hüququndan və 3 ilədək azadlıqdan məhrumedilmə cəzası ala bilər. Amma ölkəmizdə çətin elə həkim tapılsın ki, o, açıq şəkildə pasiyentə yardım etməkdən imtina etsin. Həkim kömək edir, amma bu yardım bizim tələblərimizi ödəmir, sağlamlıq durumumuzu daha da pisləşdirir. Ən pis hallarda hətta ölümə səbəb olur. Bu halda CM-də konkret norma nəzərdə tutulmayıbsa da, tibb işçisinə qarşı ümumi normalara uyğun cinayət işi qaldırıla bilər. Belə əməl 124-cü maddədə "Ehtiyatsızlıqdan adamöldürmə" kimi tövsif olunur. Maddənin birinci hissəsində göstərilir ki, ehtiyatsızlıqdan adamöldürmə 3 ilədək azadlığın məhdudlaşdırılması və 3 ilədək azadlıqdan məhrum edilməklə cəzalandırılır. Əgər 2 və ya daha çox adam öldürülərsə, bu halda təqsirkar 2 ildən 6 ilədək azadlıqdan məhrum edilməklə cəzalandırılır. Hüquqşünasın sözlərinə görə, həkimin düzgün diaqnoz qoymaması ehtiyatsızlıq sayılır. Çünki diaqnoz qoyarkən həkim xəstəliyin tarixini, gedişatını, baş verə biləcək nəticələri dəqiq müəyyənləşdirməlidir. Bu zaman həkim təcrübəsinə, biliyinə, elmi nailiyyətlərə arxalanmalıdır. Əgər həkimin müəyyən şübhəsi varsa, o, diaqnozu müəyyən edə bilmədiyini yazmalıdır (kiminsə belə hala rast gəldiyinə inanmaq çətindir). Bu halda xəstəni başqa şöbələrə göndərməli, həmkarları ilə məsləhətləşməlidir. Əgər o, düzgün diaqnoz qoymayıbsa, deməli, diaqnozda dəqiqlik tapmayıb. Amma buna baxmayaraq, diaqnoz qoyub. Bu isə ehtiyatsızlıqdır. Nəticədə zərərçəkənin çəkdiyi bütün xərclər ödənilməli, əlavə müalicə üçün tələb olunan kursun haqqı verilməlidir.
Səhiyyə Nazirliyinin hüquqşünası Səbuhi Abdullayevin dediyinə görə, mahiyyətindən asılı olaraq, xəstə həkimə və eləcə də müəssisənin özünə qarşı da iddia qaldıra bilər. Səhiyyə Nazirliyində şikayətlərə kollegiya baxır və qəbul olunmuş qərar nazir tərəfindən təsdiqlənir. Əgər şikayətlər birbaşa yüksək instansiyalara göndərilibsə, məktub araşdırılmaq üçün Səhiyyə Nazirliyinə verilir.
S.Abdullayevin sözlərinə görə, Bakı şəhərindəki bir çox xəstəxanalar Bakı Səhiyyə İdarəsinə tabedir. Ancaq məsələn, Respublika Xəstəxanası birbaşa nazirliyin tabeçiliyindədir. Şikayətlərə də xəstəxanın özündə, Bakı Səhiyyə İdarəsində və eləcə də Səhiyyə Nazirliyində baxıla bilər. İntizam məsuliyyəti Əmək Məcəlləsinin 186-cı maddəsi əsasında aparılır. Öncə tibb işçisi xəbərdarlıq alır. Bundan sonra isə intizam-tənbeh tədbirləri həyata keçirilir. Həmçinin kollektiv müqavilədə nəzərdə tutulmuşsa, aylıq əməkhaqqının 1/4 hissəsi məbləğindən çox olmamaq şərtilə cərimə oluna bilər. Kollegiyanın və Tibbi Şuranın qərarı ilə təqsirkar həkim işindən azad da edilə bilər.
Özəl tibb müəssisələrinə gəldikdə, nazirlik onlara yalnız lisenziya verir. Lakin hər hansı şikayət və ya məhkəmə olarsa, buna həmin müəssisənin özü hüquqi şəxs kimi və ya həkimin özü cavab verməlidir. Nazirliyin bu işə heç bir aidiyyəti olmur.

(Mövzuya qayıdacağıq)
Gülər KƏrimli.

çap üçün verisya