Bazarda rəqabət şəraiti yaxşılaşdıqca, bu proseslər qiymətə də təsir etməlidir

Rabitə və İnformasiya Texnologiyaları Nazirliyi ölkədə mövcud internet tariflərinin sentyabrın 1-dən etibarən təxminən 2,5 dəfə aşağı salınması barədə qərar çıxarıb. Bununla yanaşı, ölkənin aparıcı internet provayderi olan "Delta Telecom" şirkəti sentyabrın 1-dən oktyabrın 1-dək 1 MBt/saniyə sürəti üçün tarifin 275 manatdan 110 manatadək endirilməsinə dair qərar qəbul edib.
Məsələyə münasibət bildirən RİTN rəsmiləri internet xidmətləri bazarında fəaliyyət göstərən digər provayderlərin də öz növbələrində xidmətlərin maya dəyərinin aşağı düşməsini nəzərə alaraq, mövcud tarifləri endirəcəyinə əminlik ifadə ediblər. Lakin ötən təcrübə heç də müsbət nəticə verməyib. Yəni bundan öncə internet tariflərinin ucuzlaşdırılması qərarına çox az şirkət dəstək verdi və bəziləri ümumiyyətlə xidmət haqlarında endirim etmədi. Tarifləri ucuzlaşdıran şirkətlər də internetin sürətini o qədər zəiflətdi ki, istifadəçilər sürətli internet əldə etməkdən ötrü ödənişləri əvvəlki və ondan da artıq tariflər əsasında aparmağa məcbur oldular.
Bu nöqteyi-nəzərdən internet tariflərinin növbəti azalması onsuz da qənaətbəxş olmayan xidmətin səviyyəsini bir az da pisləşdirəcək.
Ölkəmizdə fəaliyyət göstərən "Azintex" şirkətindən bildirildi ki, internetin ucuzlaşması barədə verilən qərar onların kommersiya maraqlarına cavab vermir, lakin buna baxmayaraq qanunvericiliyin tələblərinə əməl edilməlidir. Bu isə xidmətin səviyyəsinin aşağı salınması ilə mümkün olmayacaq. Şirkətdə hesab edirlər ki, genişzolaqlı internet xidmətləri bazarının daha intensiv inkişaf etməsinə imkan yaratmaq və istifadəçilərə keyfiyyət və sürət baxımından müasir internet xidmətlərindən daha sərfəli qiymətlərlə istifadəsinə şərait yaratmaq lazımdır.
Məsələyə münasibət bildirən Milli Məclisin iqtisadi siyasət komitəsinin üzvü Nazim Məmmədov bir internet istifadəçisi kimi həm göstərilən xidmətin keyfiyyətli olmasında, həm də qiymətin münasibliyində maraqlı olduğunu qeyd etdi: "Amma təəssüf ki, şirkətlər çıxarılan qərarlara çox vaxt əməl etmirlər. Məsələn, mən ADSL-ə qoşulmuşam. Təbii ki, oturduğum ofisdə 5-6 kompyuter mövcuddur. Əvvəlki qiymət azalması zamanı da 45 manat ödəyirdim, sonra da həmin ödəməni davam etdirdim. Onlar deyirdilər ki, guya əvəzində kompensasiya kimi internetin sürətini artırmışıq. Ancaq praktik olaraq sürət aşağı idi və mən bir istifadəçi kimi internet xidmətindən narazıyam. Təbii olaraq bazarda rəqabət şəraiti yaxşılaşdıqca, bu proseslər qiymətə də təsir etməlidir".
Müsahibimiz vurğuladı ki, Azərbaycanın informasiya bazarına inteqrasiyasının sürətlənməsi internet xidmətlərinin yüksəlməsinə və qiymətlərin də dünyada mövcud olan qiymətlərə uyğunlaşmasına imkan verməlidir: "Bütün dövlətlərdə qiymətlər kifayət qədər aşağıdır. Bu sahənin ekspertlərinin qənaətinə görə, qiymətlər bizdə əvvəllər də yuxarı olub. Bunun yüksək olması bu sahədə bəzi şirkətlərin inhisarçı mövqedə olmasından irəli gəlir. Hesab edirəm ki, ən azı bundan sonra internet qiymətlərinin düşməsini hiss etməliyik. Onunla bərabər xidmətin səviyyəsi də qənaətbəxş olmalıdır".
RİTN-in internet tariflərinin azaldılması barədə qərarın icrasını bu sahədə fəaliyyət göstərən şirkətlərin öz insafına buraxmasına gəlincə, millət vəkili bildirdi ki, nazirliyin belə bir mövqeyi düzdür: "Çünki xidmət alan tərəflə xidmət verən tərəf arasında müqavilə vardır. Mövcud qanunvericiliyə görə, iki tərəf arasında yaranan münasibətlərə Rabitə və İnformasiya Texnologiyaları Nazirliyi müdaxilə edə bilməz. Əslində bu, internet provayderləri ilə internet istifadəçiləri arasında olan məsələdir".
N.Məmmədov onu tövsiyə edir ki, tərəflər müqavilə şərtlərinə əməl etməlidirlər. Əgər müqavilə pozulursa, bu zaman müəyyən variantlar var. "Burada ən gözəl vasitələrdən biri internet provayderinin xidmətindən imtina etmək və daha keyfiyyətli xidmət göstərən tərəfə keçməkdir. Bunun başqa yolu yoxdur. Təbii ki, müqavilənin şərtləri pozularsa, məhkəməyə müraciət etmək olar. Amma məhkəməyə müraciət edənlər həm süründürməçiliklə, həm də kənar xərclərlə üzləşə bilərlər. Ona görə də ən yaxşı variant digər provayderin xidmətinə müraciət etməkdir".
Hazırda Azərbaycanda hər 100 nəfərdən 37-si internet istifadəçisidir.
Gülər KƏrimli.

çap üçün verisya