a- Texniki pasportu mənim adıma verilmiş mədəni mallar mağazası 1998-ci il sentyabr ayının 26-da özəlləşdirilmişdir. İndi bələdiyyədən deyirlər ki, mağazanın yerləşdiyi torpaq bizim balansımızdadır. Onu da özəlləşdirməlisən. Onlar haqlıdırlarmı?
Qüdrət MURADOV,
Qəbələ rayonu, Zaraqan kəndi.

- Bildiririk ki, sualınızla əlaqədar sizinlə şifahi qaydada söhbət aparılmış və hüquqi məsləhətlər verilmişdir. Bizim verdiyimiz hüquqi məsləhətlər və rəylər sizi və bələdiyyə rəhbərlərini təmin etmədiyindən sizin mübahisəyə müvafiq məhkəmə orqanında baxılmaqla qərar qəbul edilməlidir. Eyni zamanda bildiririk ki, fiziki və hüquqi şəxslərin torpaq və digər daşınmaz əmlak üzərində mülkiyyət hüququ "Mülkiyyət hüququ haqqında" Şəhadətnamə ilə təsdiq olunmalıdır. Göstərilənləri əsas tutaraq hesab edirik ki, torpaq sahəsinin qanunvericiliklə nəzərdə tutulan qaydada özəlləşdirilməsi barədə bələdiyyənin tələbi qanuni və əsaslıdır.

- Hörmətli redaksiya!
1964-cü ildən 1977-ci ilə qədər Azərbaycan Dövlət Dəmir Yolunda ali təhsilli mühəndis vəzifəsində çalışmışam. 1977-ci ildən "Azneft" İstehsalat Birliyinin Neft və Qazçıxarma İdarəsinə köçürmə yolu ilə işə qəbul olunmuşam. Bilmək istəyirəm, Azərbaycan Dövlət Dəmir Yolunda ali təhsilli mühəndis vəzifəsində çalışdığım 13 il "Azneft" İstehsalat Birliyinin Neft və Qazçıxarma İdarəsində çalışdığım illərlə bərabər neft sənayesində mövcud olan fasiləsiz iş stajına daxil edilməlidirmi?

Y. NURİYEV,
İmişli şəhəri, İslam Bayramov-32.

- Sizin 1964-cü ildən əmək fəaliyyətinizin sonuna qədər işlədiyiniz və əmək münasibətlərində olduğunuz bütün iş illəri ümumi əmək stajına daxil edilməlidir. Lakin Azərbaycan Dövlət Dəmir Yolu və "Azneft" İstehsalat Birliyi ( ARDNŞ) müxtəlif istehsalat sahələri olduğundan və ayrı-ayrı nazirliklərə tabe olduğundan 1964-cü ildən 1977-ci ilə qədər Azərbaycan Dövlət Dəmir Yolunda ali təhsilli mühəndis vəzifəsində çalışdığınız illər Azərbaycan Dövlət Dəmir Yoluna, 1977-ci ildən "Azneft" İstehsalat Birliyinin Neft və Qazçıxarma İdarəsində çalışdığınız illər isə neft sənayesində işlədiyiniz iş illəri kimi iş stajı hesab olunmalıdır.

- Hörmətli redaksiya! Bilmək istəyirəm, qanuna əsasən fiziki şəxsin bir neçə yaşayış yeri ola bilərmi?

Sərdar HÜSEYNOV,
Oğuz rayonu.

- Mülki Məcəllənin 27 - ci maddəsinə əsasən, fiziki şəxsin adətən yaşadığı yer onun yaşayış yeri sayılır. Şəxsin bir neçə yaşayış yeri ola bilər. 14 yaşına çatmamış şəxslərin yaşayış yeri valideynlik hüquqlarını itirməmiş valideynlərinin yaşayış yeri sayılır, qəyyumluqda olan şəxslərin yaşayış yeri isə qəyyumun yaşayış yeri sayılır. Əgər şəxs hər hansı səbəbdən öz yaşayış yerini müəyyən müddətə tərk edirsə, o, yaşayış yerini itirmir.

- Fizioloji keyfiyyətlərlə bağlı işçilərə neçə təqvim günü müddətində məzuniyyət verilir?
Rəvan HÜSEYNOV,
Gəncə şəhəri.

- Əmək Məcəlləsinin 119 - cu maddəsinə əsasən:
o yaşı 16 dan az olan işçilərə əmək məzuniyyəti 42 təqvim günündən,
o 16 yaşdan 18 yaşadək işçilərə 35 təqvim günündən,
o əlilliyin qrupundan, səbəbindən və müddətindən asılı olmayaraq işləyən əlillərə əmək məzuniyyəti 42 təqvim günündən az olmayaraq verilir.


- 1941-1945-ci il müharibəsində arxa cəbhədə çalışmışam. Fədakar əməyə görə medal almışam. Ermənistandan məcburi surətdə qaçqın düşərkən medalla bərabər sənədləri də özümlə götürə bilmədim. Bu barədə Sabunçu Rayon Məhkəməsinə müraciət etdim. Məhkəməyə çağırılmış şahidlər də öz ifadələrində təsdiq etdilər ki, mən həqiqətən 1941-1945-ci il müharibəsində arxa cəbhədə çalışmışam və fədakar əməyə görə medal almışam. Lakin Sabunçu Rayon Sosial Müdafiə Fondu və Sabunçu Rayon Məhkəməsi bu faktı qəbul etmədilər. Mənə bildirdilər ki, medalın özü və ya sənədi olmalıdır. Lakin mənim həmin sənədi Ermənistandan gətirməyim qeyri-mümkündür. İndi mən nə etməliyəm?
Hüseyn ƏLİYEV,
Sabunçu rayonu.

- Sualınızdan da görünür ki, sizin bu barədə olan iddianıza Bakı şəhərinin Sabunçu Rayon Məhkəməsində mahiyyəti üzrə baxılaraq məhkəmə qətnaməsi qəbul edilib. Bu iddia üzrə məhkəmə qətnaməsi qəbul olunduğundan siz bu qətnamədən Bakı Apelyasiya Məhkəməsinə 1 ay müddətində apelyasiya şikayəti təqdim edə bilərsiniz. Qeyd etmək istəyirəm ki, bu müddət məhkəmə qətnaməsi sizə təqdim olunan və ya aldığınız gündən hesablanır. Əgər məhkəmə qətnaməsi sizə təqdim olunmayıbsa, onu Bakı şəhərinin Sabunçu Rayon Məhkəməsindən tələb edib almaqla bu hüququnuzu həyata keçirə bilərsiniz. Göstərilən müddət sizin tərəfinizdən üzrlü səbəblərdən buraxılıbsa, apelyasiya şikayəti ilə bərabər müddətin bərpa olunması barədə ərizə də təqdim etməlisiniz. Hesab edirəm ki, müraciət etdiyiniz bu hüququnuz yalnız məhkəmə qərarı ilə bərpa oluna bilər.

- Gürcüstan Respublikasının vətəndaşıyam. 6 aya yaxındır ki, Azərbaycan Respublikasına köçərək burada yaşamaqla işləyirəm. Azərbaycan Respublikası vətəndaşlığını qəbul edərək ailəmlə birlikdə Bakıda daimi qalmaq istəyirəm. Bilmək istəyirəm, mənim və ailəmin Azərbaycan Respublikası vətəndaşlığını alması üçün qanunvericilikdə hansı qaydalar var?
Rüfət DAŞDƏMİROV,
Gürcüstan Respublikasının
vətəndaşı, Bakı şəhəri.

- “Azərbaycan Respublikasının vətəndaşlığı haqqında” Azərbaycan Respublikası Qanununun 14-cü maddəsinə əsasən, Azərbaycan Respublikasının ərazisində son beş il ərzində yaşayan və Azərbaycan Respublikasının dövlət dilini bilməsi haqqında sənəd təqdim edən əcnəbi və ya vətəndaşlığı olmayan şəxs mənşəyindən, irqi və milli mənsubiyyətindən, cinsindən, təhsilindən, dinə münasibətindən, siyasi və başqa əqidələrindən asılı olmayaraq öz vəsadəti ilə Azərbaycan Respublikasının vətəndaşlığına qəbul edilə bilər.
Azərbaycan Respublikasının vətəndaşlığına qəbul edilməsi barədə vəsadət qaldıran şəxs Azərbaycan Respublikası Konstitusiyası ilə təsbit olunmuş dövlət quruculuğunu zorakılıqla dəyişdirməyə, Azərbaycan Respublikasının ərazi bütövlüyünü pozmağa çağırışlar edərsə, dövlət təhlükəsizliyinə, ictimai asayişin qorunmasına, əhalinin sağlamlığına və ya mənəviyyatına zərər vuran fəaliyyət göstərərsə, irqi, dini və milli müstəsnalığı təbliğ edərsə, terrorçuluq fəaliyyəti ilə əlaqəsi olarsa vətəndaşlığa qəbul haqqında vəsadəti rədd edilir.
Azərbaycan Respublikasının vətəndaşlığına qəbul haqqında qərar Azərbaycan Respublikası Konstitusiyasının 109-cu maddəsinin 20-ci bəndinə müvafiq olaraq Azərbaycan Respublikası Prezidentinin səlahiyyətinə aiddir.
Azərbaycan Respublikasının vətəndaşlığına qəbul edilməsi barədə vəsadət qaldıran şəxs Azərbaycan Respublikasının qanunvericiliyi ilə nəzərdə tutulan qaydada və məbləğdə dövlət rüsumu ödəyir.

- 1994-cü ildə Azərbaycan Respublikasının müdafiəsi zamanı əlil olmuşam. Hər iki ayağımda 1, 2 və 3-cü barmaqlarım falanqa səviyyəsində kəsilib. Həmin vaxtdan 8 il müddətində 2-ci qrup əlil olmuşam. Sonradan isə mənim qrupum 3-cü qrupa endirilib. Ayağımda ağrılar olur, normal yeriyə bilmirəm. Bilmək istəyirəm ki, sağalmağa heç bir ümidi olmayan əlillərə ömürlük əlillik qrupu neçə ildən sonra təyin olunmalıdır?
Vüqar MÜRZƏYEV,
Dəvəçi şəhəri.

- Nazirlər Kabinetinin 1997-ci il 29 avqust tarixli, 99 nömrəli qərarı ilə təsdiq edilmiş "Əlilliyin müəyyən olunması meyarlarına dair" Əsasnamənin birinci bəndinə əsasən, əlilliyin ağırlıq dərəcəsindən asılı olaraq birinci, ikinci və üçüncü dərəcəli əlillik təyin edilir. Qərarın bu bəndinə əsasən orqanizmin üzv və sistemlərinin funksiyalarının davamsız, dönər morfoloji dəyişmələri və pozulmaları zamanı müalicənin və görülən reabilitasiya tədbirlərinin səmərəliliyinə, sağlamlıq vəziyyətinə və sosial uyğunlaşma vəziyyətinə nəzarət etmək məqsədi ilə birinci dərəcə əlillik iki il müddətinə, ikinci və üçüncü dərəcəli əlillik isə bir il müddətinə təyin edilir.
Birinci dərəcə əlillik fasiləsiz olaraq dörd il, ikinci dərəcə isə fasiləsiz olaraq on il təyin edildiyi hallarda əlillik növbəti müayinə müddəti göstərilmədən müəyyən edilir.
Orqanizmin üzv və sistemlərinin funksiyalarının davamlı, dönməz morfoloji dəyişiklikləri və pozulmaları zamanı görülən reabilitasiya tədbirlərinin səmərəsizliyi nəticəsində xəstəliyin gedişini yaxşılaşdırmaq və sosial uyğunlaşmanı bərpa etmək mümkün olmayan hallarda əlillik yenidən (təkrar) müayinə müddəti göstərilmədən müəyyən edilir.
Əlillik qrupu ilə razılaşmadığınız və onu qanunsuz hesab etdiyiniz halda sizin zona TSEK sədrinə, ali pillə ekspert komissiyasına, Əmək və Əhalinin Sosial Müdafiəsi Nazirliyinə və rayon məhkəməsinə müraciət etmək hüququnuz vardır.

çap üçün verisya