2 sualıma izahat verməyinizi xahiş edirəm.

- 1) "Dövlət sirri haqqında" AR Qanunu hansı şəxslərə şamil edilir?
-2) Dövlət sirrinə aid edilməyən məlumatlar hansılardır?

Firdus HÜSEYNOV,
Sumqayıt şəhəri.


1.
- "Dövlət sirri haqqında" AR Qanununun 3-cü maddəsinə əsasən, bu qanunun müddəaları AR ərazisində və onun hüdudlarından kənarda AR dövlət hakimiyyəti və yerli özünüidarə orqanları, təşkilati-hüquqi formasından və mülkiyyət növündən asılı olmayaraq bütün müəssisə, idarə və təşkilatları, dövlət sirri haqqında AR qanunvericiliyinin tələblərini yerinə yetirmək öhdəliyi götürmüş və ya statusuna görə buna borclu olan AR vəzifəli şəxsləri və vətəndaşları, əcnəbilər və vətəndaşlığı olmayan şəxslər tərəfindən hökmən icra edilməlidir. Azərbaycan Respublikasının imzaladığı beynəlxalq müqavilələrdə başqa hal nəzərdə tutulmadıqda, digər dövlətlər tərəfindən Azərbaycan Respublikasına verilmiş dövlət sirri təşkil edən məlumatlar bu qanuna müvafiq mühafizə edilir.

2.
- Aşağıda göstərilən məlumatlar dövlət sirrinə aid edilmir və məxfiləşdirilmir:
o İnsanların həyat və sağlamlığı üçün təhlükə törədən fövqəladə hadisələr və qəzalar, onların nəticələri, habelə təbii fəlakətlər, onların rəsmi proqnozları və nəticələri haqqında
o Ekologiya, səhiyyə, sanatoriya, demoqrafiya, təhsil, mədəniyyət və kənd təsərrüfatının, habelə cinayətkarlığın vəziyyəti haqqında
o Dövlətin vətəndaşlara, vəzifəli şəxslərə, müəssisə, idarə, təşkilatlara verdiyi imtiyazlar, güzəştlər və kompensasiyalar haqqında
o İnsan və vətəndaş hüquqlarının və azadlıqlarının pozulması faktları haqqında
o Azərbaycan Respublikasının ali vəzifəli şəxslərinin səhhəti haqqında
o Dövlət hakimiyyəti orqanları və onların vəzifəli şəxsləri tərəfindən qanunvericiliyin pozulması faktları haqqında



- İşçilərin və iş yerlərinin attestasiyası hansı nəticələrə səbəb ola bilər?

Təranə İSAYEVA,
Bakı şəhəri.


- Əmək Məcəlləsinin 67-ci maddəsinə əsasən, işçilərin və iş yerlərinin attestasiyası aşağıdakı nəticələrə səbəb ola bilər:
1. Attestasiya komissiyası tərəfindən barəsində tutduğu vəzifəyə uyğun olmadığı haqqında qərar çıxarılmış işçinin əmək müqaviləsi bu Məcəllənin 70-ci maddəsinin "c" bəndinə müvafiq olaraq 71-ci maddəsində nəzərdə tutulan qaydalara əməl edilməklə işəgötürən tərəfindən ləğv edilə bilər.
2. İşəgötürən attestasiya komissiyasının tövsiyəsini nəzərə alaraq işçinin razılığı ilə onu başqa müvafiq vəzifəyə (peşəyə) keçirə bilər.
3. İş yerinin attestasiyasının keçirilməsinin nəticəsində onların kütləvi şəkildə ixtisar edilməsi yolverilməzdir.
4. İş yerinin attestasiyasının keçirilməsinin nəticələrinə əsaslanaraq işəgötürən tərəfindən işçilərin əmək müqavilələri ləğv edilə bilməz.
5. İşçilərin və iş yerlərinin attestasiyası komissiyalarının qərarlarını qanunsuz, əsassız, qərəzli və qeyri-obyektiv hesab edən şəxslər məhkəməyə müraciət edə bilərlər.
6. Attestasiya komissiyasının qərarı ilə tutduğu vəzifəyə (peşəyə) uyğun olmadığına görə işəgötürən tərəfindən əmək müqaviləsi ləğv edilən və ya başqa vəzifəyə (peşəyə) keçirilən işçinin iddiası əsasında fərdi əmək mübahisəsinə bu Məcəllə ilə müəyyən edilmiş qaydada yalnız məhkəmələrdə baxılır.



- Rayon Mədəniyyət və Turizm Şöbəsinin inspektoru vəzifəsində 5 ildir ki, çalışıram. Çalışdığım müddət ərzində şöbədə kadr işləri üzrə təlimatçı və ya mütəxəssis ştatı olmadığından hərbiyə aid işləri də həyata keçirirəm. Aldığım məlumata görə, əgər şöbədə kadr işləri üzrə təlimatçı və ya kadr üzrə mütəxəssis ştatı olmadıqda hərbi işlərin aparılması həvalə olunan şəxslərə maaşlarının 30 faizi məbləğində əməkhaqqı hesablanmalıdır. Bu haqda mühasibə müraciət etdikdə bildirdi ki, mənim bundan xəbərim yoxdur, həmin məsələ ilə bağlı qanuni sənəd gətirildikdə hesablayıb ödəyərik dedi. Bu nə dərəcədə doğrudur? Əgər qanunidirsə, mənə əlavə pul ödənilə bilərmi?

D. ƏZİZOVA,
Qax rayonu.

- Müraciətinizlə əlaqədar bildiririk ki, Əmək Məcəlləsinin 161-cı maddəsinə əsasən, əmək müqaviləsində nəzərdə tutulmuş əmək funksiyası ilə yanaşı müəyyən edilmiş iş vaxtı ərzində işçi tərəfindən digər müvafiq peşələr (vəzifələr) üzrə əmək funksiyasının tam və ya qismən icra olunduğu hallarda onun əməkhaqqına əlavə müəyyən edilib ödənilməlidir. Digər hallarda peşələr (vəzifələr) üzrə əmək funksiyasının icra edilməsinə görə əməkhaqqına əlavənin miqdarı kollektiv müqavilə və ya tərəflərin qarşılıqlı razılığı ilə əmək müqaviləsində nəzərdə tutulan qaydada müəyyən edilir. Siz də bağlanmış əmək müqaviləsində nəzərdə tutulmayan əmək funksiyalarınızla yanaşı əmək müqavilənizdə göstərilməyən digər əlavə işləri yerinə yetirdiyinizə görə əməkhaqqınıza işəgötürənlə razılaşdırılmaqla əlavə müəyyən edilib ödənilməlidir. İlk növbədə siz işlədiyiniz Rayon Mədəniyyət və Turizm Şöbəsinin müdiriyyətinə müraciət etməklə yerinə yetirdiyiniz əmək funksiyasına aid olmayan bu işlərin əlavə əmək funksiyaları kimi əmək müqaviləsinə daxil etməklə əməkhaqqına əlavə edilməsi barədə razılığa gəlməlisiniz. Qanunla nəzərdə tutulan qaydada əmək müqaviləsinə belə əlavələr edildiyi halda, sizin əlavə əməkhaqqı almaq hüququnuz və mühasibatlıq tərəfindən bu pulun ödənilməsi barədə mübahisə yaranmayacaq. Diqqətinizə çatdırıram ki, sizin bu hüququnuz yalnız qanunla nəzərdə tutulan qaydada belə bir əmək müqaviləsinin bağlandığı halda yaranır. Əgər müdiriyyət əmək funksiyanıza aid olmayan bu işlərin yerinə yetirilməsi ilə əlaqədar əlavə əməkhaqqının təyin edilməsi barədə, müvafiq məbləğin təyin edilməsi barədə razılığa gəlmirsə, sizin əmək müqavilənizdə göstərilməyən bu işlərin yerinə yetirilməsindən imtina etmək hüququnuz vardır.


- Dövlət notariat arxivi barədə məlumat verməyinizi xahiş edirəm.

Svetlana AĞAYEVA,
Bakı şəhəri.

- "Notariat haqqında" Azərbaycan Respublikası Qanununun 21-ci maddəsinə əsasən, Azərbaycan Respublikasının müvafiq icra hakimiyyəti orqanının yanında 75 ilə qədər notariat sənədlərinin saxlanılması üçün dövlət notariat arxivi fəaliyyət göstərir.
Azərbaycan Respublikasının müvafiq icra hakimiyyəti orqanı dövlət notariat arxivinin ştat sayını müəyyən edir və dövlət notariat arxivinin işinin təşkilinə və səlahiyyətlərinə dair Əsasnamə təsdiq edir.
Dövlət notariat arxivi hüquqi şəxsdir. Onun fəaliyyətinə rəhbərliyi Azərbaycan Respublikasının müvafiq icra hakimiyyəti orqanı tərəfindən təyin (azad) edilən müdir həyata keçirir.
Dövlət notariat arxivinin müdiri (onu əvəz edən vəzifəli şəxs) bu arxivlərdə saxlanılan sənədlərdən dublikatlar verir, onlardan surət və çıxarışların düzgünlüyünü təsdiq edir.
Dövlət notariat arxivinin öz adı və Azərbaycan Respublikasının dövlət gerbi əks olunmuş möhürü olur.
Dövlət notariat arxivi notariat hərəkətlərinin aparılmasına görə tutulan dövlət rüsumundan, şəhadətnamənin verilməsi və notariuslar tərəfindən notariat hərəkətləri ilə bağlı olmayan məsələlər üzrə göstərilən xidmətə görə alınan haqdan Azərbaycan Respublikasının müvafiq icra hakimiyyəti orqanına daxil olmuş vəsait hesabına saxlanılır.

- Şərəfin, ləyaqətin və işgüzar nüfuzun müdafiəsi hansı qaydada həyata keçirilir?

Elnur VAHABOV,
Sumqayıt şəhəri.


- Fiziki şəxs onun şərəfini, ləyaqətini və işgüzar nüfuzunu ləkələyən, şəxsi həyatının sirrini və ya şəxsi toxunulmazlığını pozan məlumatların məhkəmə qaydasında təkzib olunmasını tələb edə bilər, bu şərtlə ki, məlumatları yaymış şəxs onların həqiqətə uyğun olduğunu sübuta yetirməsin. Faktiki məlumatlar natamam dərc edildikdə də, əgər bununla da şəxsin şərəfinə, ləyaqətinə və işgüzar nüfuzuna toxunulursa, eyni qayda tətbiq edilir. Maraqlı olan şəxslərin tələbi ilə fiziki şəxsin şərəf və ləyaqətinin müdafiəsinə onun ölümündən sonra da yol verilir.
Əgər fiziki şəxsin şərəfini, ləyaqətini və işgüzar nüfuzunu ləkələyən, şəxsi həyatının sirrini və ya şəxsi toxunulmazlığına qəsd edən məlumatlar kütləvi informasiya vasitələrində yayılmışdırsa, həmin kütləvi informasiya vasitələrində də təkzib edilməlidir.
Kütləvi informasiya vasitələrində hüquqlarına və ya qanunla qorunan mənafelərinə toxunan məlumatlar dərc edilmiş fiziki şəxsin həmin kütləvi informasiya vasitələrində öz cavabını dərc etdirmək hüququ vardır.
Şərəfini, ləyaqətini və işgüzar nüfuzunu ləkələyən məlumatlar yayılmış fiziki şəxsin həmin məlumatların təkzibi ilə yanaşı, onların yayılması nəticəsində vurulmuş zərərin əvəzinin ödənilməsini tələb etmək hüququ vardır.

çap üçün verisya