- Əmək veteranıyam. 16.11.1989-cu ildən Əli Bayramlı ( indiki Şirvan) şəhərində təsis edilmiş "Azərittifaq" Ticarət Cəmiyyətində Təftiş Komissiyasının sədri vəzifəsində işləmişəm. Həmkarlar İttifaqı Təşkilatının üzvü olmuşam. İxtisara düşməyimə baxmayaraq, mənim əmək kitabçama "öz ərizəsi ilə işdən azad edilib" yazıblar. İşlədiyim müddətdə Cəmiyyətin əmlakına payçı olmuşam, vəsiqəm var. 1977-ci ildən Cəmiyyət fəaliyyətini dayandırıb, əmlak bölüşdürülüb. Mənə 1977-ci ildən bu günə kimi heç bir əmlak təklif olunmayıb. Bilmək istəyirəm, mənim Cəmiyyətdən pay almaq hüququm varmı, əgər varsa, hara müraciət etməliyəm?

Rza MIRZƏYEV,
Şirvan şəhəri.

- Əmək Məcəlləsinin 180-cı maddəsinə əsasən işçilər qanunvericiliklə müəyyən edilmiş qaydada yaradılan səhmdar cəmiyyətlərin, habelə mülkiyyət payı bəlli olan digər müəssisələrin nizamnamələrində (əsasnamələrində) müəssisənin nəzərdə tutulan qaydada və məbləğdə müəyyən edilən gəlirinin müvafiq hissəsi miqdarında pay almaq hüququna malikdirlər. İşçilərin bu hüququnu məhdudlaşdıran və ya onları bu hüquqdan məhrum edən işəgötürən qanunvericilikdə nəzərdə tutulmuş qaydada məsuliyyət daşıyır. Əmək Məcəlləsinin bu maddəsini əsas tutaraq hesab edirəm ki, əmək münasibətlərində olduğunuz Cəmiyyət ləğv edilərkən sizin də bu Cəmiyyətin əmlakından pay almaq hüququnuz qanunla müəyyənləşdirilib. Bununla bərabər bildirmək istəyirəm ki, bu hüququnuzun pozulduğu vaxtdan 11 il keçdiyindən bir çox problemlərlə, o cümlədən də öz hüquqlarınızın bərpa olunması məqsədi ilə məhkəməyə müraciət etmək üçün müddətin buraxılması problemi ilə rastlaşa bilərsiniz. Əmək münasibətlərində olduğunuz və hazırda ləğv edilmiş və ya səhmdar cəmiyyətə çevrilmiş müəssisədən əmlak payınızı almaq məqsədi ilə siz ilk növbədə həmin Cəmiyyətin tabe olduğu yuxarı orqana və ya həmin Cəmiyyətin hüquqi varisinə müraciət etməlisiniz. Alınmış cavablar sizi qane etmədiyi halda, bu müəssisə və ya təşkilatın hüquqi ünvanının yerləşdiyi rayonun məhkəməsinə iddia ərizəsi ilə müraciət etməlisiniz. Məhkəməyə müraciət etmək üçün Əmək Məcəlləsində və Mülki Prosessual Məcəllədə göstərilən müddət sizin tərəfinizdən buraxıldığı üçün buraxılmış müddətin üzrlü sayılmaqla müddətin bərpa olunması barədə ərizə də iddia ərizənizə əlavə edilməlidir.

- Hansı bələdiyyə torpaqları xüsusi mülkiyyətə verilə bilər?

İsa QULİYEV,
Lənkəran rayonu.

- Azərbaycan Respublikasının "Bələdiyyə torpaqlarının idarə edilməsi haqqında" Qanununun 7-ci maddəsinə əsasən:
Azərbaycan Respublikasının qanunvericiliyi ilə bələdiyyələrin ehtiyat fondunun aşağıdakı torpaqları xüsusi mülkiyyətə verilə bilər:
o yaşayış məntəqələrinin perspektiv inkişafı üçün cəlb olunan torpaqlar;
o kənd təsərrüfatının azyararlı və yararsız torpaqları;
o hüquqi və fiziki şəxslərin istifadəsinə və icarəsinə verilmiş kənd təsərrüfatına azyararlı və yararsız torpaqların öz vəsaiti hesabına yararlı hala salınmış kənd təsərrüfatı təyinatlı torpaqlar;
o qeyri-kənd təsərrüfatı məqsədləri üçün istifadəyə və icarəyə verilmiş torpaqlar.
Ümumi istifadədə olan, habelə hüquqi və fiziki şəxslərin istifadəsində və icarəsində olan bələdiyyələrin kənd təsərrüfatı təyinatlı, eləcə də meşə və su fondu torpaqları xüsusi mülkiyyətə verilə bilməz. Xüsusi mülkiyyətə verilən bələdiyyə torpaqları mülkiyyətində torpaq sahəsinin olub- olmamasından asılı oimayaraq haqqı ödənilməklə aşağıdakılara verilir:
o fərdi yaşayış və bağ evlərinin tikintisi üçün Azərbaycan Respublikasının vətəndaşlarına;
o fərdi və kooperativ qarajların tikintisi üçün Azərbaycan Respublikasının vətəndaşlarına və onların kooperativlərinə;
o sahibkarlıq fəaliyyətini həyata keçirmək üçün Azərbaycan Respublikasının hüquqi və fiziki şəxslərinə.
Müvafiq inzibati-ərazi vahidi daxilində adambaşına düşən orta torpaq norması və torpaq ehtiyatları azlıq təşkil etdiyi hallarda bələdiyyələr torpaq sahəsini ilk növbədə öz ərazilərində yaşayan vətəndaşlara və sahibkarlıq fəaliyyəti göstərən hüquqi və fiziki şəxslərə xüsusi mülkiyyətə verilməsi barədə qərar qəbul edə bilər.

- İşsizlik müavinətinin ödənilməsi hansı hallarda dayandırıla bilər?

Sevda QULİYEVA,
Sumqayıt şəhəri.

- Aşağıdakı hallarda işsizlik müavinətinin ödənilməsi 3 ayadək dayandırıla bilər:
o İşsiz vətəndaş təklif olunan 2 münasib işdən imtina etdikdə.
o İşsiz vətəndaş müavinət almaq üçün müvafiq icra hakimiyyəti orqanında üzrsüz səbəbdən ayda bir dəfə yenidən qeydiyyatdan keçmədikdə.
o Ödənilən işsizlik müavinətinin dayandırıldığı aylar müavinətin təyin edildiyi ümumi müddətdən çıxarılır və həmin dövr işsizlərin stajına daxil edilmir.
Aşağıdakı hallarda işsizlik müavinətinin ödənilməsi müvəqqəti olaraq dayandırıla bilər:
o Təlim və yoxlanış toplantılarına çıxarılmış hərbi mükəlləfiyyətli işsiz vətəndaşlar toplanışda olduqları müddətdə.
o Müvafiq icra hakimiyyəti orqanının göndərişi ilə işsiz vətəndaşın peşə hazırlığı, yenidən hazırlığı və ixtisasartırma kurslarına cəlb olunduğu müddətdə (tədris başa catdıqdan sonra belə vətəndaşlar onlardan asılı olmayan səbəblərdən münasib işlə təmin olunmadıqda).
o Başqa şəhərdə qiyabi təhsil alan işsiz vətəndaşlar təhsillə əlaqədar daimi yaşayış yerini tərk etdikləri dövrdə.
o İşsizlik müavinətinin müvəqqəti dayandırıldığı dövr müavinətin təyin edildiyi ümumi müddətdən çıxarılmır və həmin dövr ümumi staja əlavə edilir.

- Rabitə sahəsində çalışan, rabitənin yeraltı obyektlərində daimi işləyən işçilərin, şəhərlərarası sifariş, sorğu kommutatorlarında və gecə-gündüz fəaliyyət göstərən danışıq məntəqələrində telefonçuların, şəhər telefon rabitəsində sorğu xidmətinin telefonçularının qısaldılmış iş həftəsinin müddəti neçə saatdır?

Səidə ORUCOVA,
Gəncə şəhəri.

- Nazirlər Kabinetinin 2004-cü il 6 noyabr tarixli, 175 nömrəli qərarı ilə təsdiq edilmiş "İşçilərə həftə ərzində 36 saatdan çox olmayan, qısaldılmış iş vaxtı müəyyən edilən əmək şəraiti fiziki, kimyəvi, bioloji və habelə insanın sağlamlığı üçün zərərli olan digər ağır istehsalat amilləri mövcud olan əmək şəraitli istehsalatların, peşə və vəzifələrin Siyahısı"nın 27-ci bölməsinin 2, 5 və 6-cı bəndlərinə əsasən rabitə sahəsində çalışan, rabitənin yeraltı obyektlərində daimi işləyən işçilərin, şəhərlərarası sifariş, sorğu kommutatorlarında və gecə-gündüz fəaliyyət göstərən danışıq məntəqələrində telefonçuların, şəhər telefon rabitəsində sorğu xidmətinin telefonçularının qısaldılmış iş həftəsinin müddəti 36 saatdır.

- Hansı orqanlar fərdi əmək mübahisələrinə baxan orqanlar hesab edilir?

Səfayə MÜRSƏLİYEVA,
Gəncə şəhəri.

- Bütün fərdi əmək mübahisələrinə bilavasitə məhkəmələr tərəfindən baxılır. Kollektiv müqavilələrdə nəzərdə tutulmuş hallarda müəssisələrdə həmkarlar ittifaqlarının nəzdində fərdi əmək mübahisələrinə məhkəməyə qədər baxan orqanın yaradılması nəzərdə tutula bilər. Bu orqanın yaradılması və fəaliyyət qaydası kollektiv müqavilələrlə nizama salınır.
Əmək Məcəlləsi əmək müqaviləsində fərdi əmək mübahisələrinin bu Məcəllə ilə müəyyən edilmiş həlli qaydalarından fərqli olaraq tərəflərin hüquq bərabərliyi prinsipini və bu Məcəllə ilə nəzərdə tutulmuş əmək, sosial və iqtisadi hüquqlarını pozmayan qaydalar nəzərdə tutula bilər.
Məhkəməyə qədər fərdi əmək mübahisələrinə baxan orqanın çıxardığı qərar işçini və ya işəgötürəni qane etməzsə, həmin mübahisələrin həlli üçün onlar məhkəməyə müraciət edə bilərlər. Bu halda məhkəməyə müraciət etmək üçün müəyyən edilmiş iddia müddəti məhkəməyə qədər fərdi əmək mübahisələrinə baxan orqanın müvafiq qərar qəbul etdiyi gündən başlanır.


- Notariusun və notariat hərəkətini aparan vəzifəli şəxsin apardığı notariat hərəkətlər hansı qaydada qeydə alınır?
Çinarə ƏHMƏDOVA,
Şəki rayonu.


- “Notariat haqqında” Azərbaycan Respublikası Qanununun 43-cü maddəsinə əsasən, notariusun və notariat hərəkətini aparan digər vəzifəli şəxsin apardığı bütün notariat hərəkətləri notariat reyestrində qeyd edilməli və hər bir hərəkətə müstəqil nömrə verilməlidir.
Notariat hərəkətlərin qeydi üçün reyestrlərin,notariat şəhadətnamələrinin, əqdlərdə və təsdiq edilən sənədlərdə təsdiqi qeydlərinin formalarını Azərbaycan Respublikasının müvafiq icra hakimiyyəti orqanı müəyyən edir.

- Mülki işlərdə apelyasiya instansiyası məhkəməsinin hansı səlahiyyətləri vardır?
Əli HÜSEYNOV,
Dəvəçi rayonu.

- Mülki Prosessual Məcəllənin 384-cü maddəsinə əsasən apelyasiya instansiyası məhkəməsi:
o birinci instansiya məhkəməsinin qətnaməsini dəyişmədən, apelyasiya şikayətini isə təmin etmədən saxlaya bilər;
o qətnaməni tamamilə və ya qismən ləğv edə bilər və birinci instansiya məhkəməsində müəyyən edilmiş hallar və ya əlavə təqdim olunmuş sübutlar əsasında yeni qətnamə qəbul edə bilər;
o qətnaməni dəyişdirə bilər;
o qətnaməni tamamilə və ya qismən ləğv edə bilər, iş üzrə icraata xitam verə və yaxud ərizəni baxılmamış saxlaya bilər.


- Azərbaycan Respublikası qanunvericiliyi ilə Lüksemburq və Makedoniyada 1 günlük ezamiyyə normaları hansı məbləğdə təyin edilmişdir?

Kamal SEYİDOV,
Bakı şəhəri.

- Azərbaycan Respublikası Nazirlər Kabinetinin 25 yanvar 2008-ci il tarixli, 14 saylı "Ezamiyyə xərclərinin normaları haqqında" qərarına bir nömrəli əlavəyə əsasən Lüksemburqda- 190 avro məbləğində, Makedoniyada - 190 avro məbləğində 1 günlük ezamiyyə normaları təyin edilmişdir.

çap üçün verisya