- Ezam olunmuş işçi ezamiyyə müddətində əmək qabiliyyətini müvəqqəti itirdiyi halda ona səhhətinə görə həvalə olunmuş xidməti tapşırığı yerinə yetirmək və yaxud daimi yaşayış yerinə qayıtmaq imkanı olmadığı dövr üçün ezamiyyə xərcləri hansı qaydada ödənilir?

İsmayıl İSMAYILOV,
Zəngilan rayonu.

- Əmək və Əhalinin Sosial Müdafiəsi naziri tərəfindən təsdiq edilmiş 15 fevral 2008-ci il tarixli, 11/30-108 saylı "İşçilərin ezamiyyə qaydaları"nın onuncu bəndinə əsasən, ezam olunmuş işçi ezamiyyə müddətində əmək qabiliyyətini müvəqqəti itirdiyi halda ona səhhətinə görə həvalə olunmuş xidməti tapşırığı yerinə yetirmək və yaxud daimi yaşayış yerinə qayıtmaq imkanı olmadığı dövr üçün (altı aydan artıq olmamaq şərtilə) ezamyyə xərclərinin 1 günlük normasına uyğun xərclər ödənilir.
Ezam olunmuş işçinin əmək qabiliyyətini müvəqqəti itirməsi, həmçinin də səhhətinə görə daimi yaşayış yerinə qayıtmaq imkanı olmaması səhiyyə xidmətləri tərəfindən müəyyən olunmuş qaydada təsdiq edilməlidir.
Əmək qabiliyyətini müvəqqəti itirdiyi dövr üçün ezam olunan işçiyə ümumi əsaslarla əmək qabiliyyətini müvəqqəti itirməsi üzrə müavinət verilir. Əmək qabiliyyətini müvəqqəti itirdiyi günlər ezamiyyətin müddətinə daxil edilmir.

- Daşınmaz əmlak üzərində icarə və ya istifadə hüquqları hansı qaydada dövlət qeydiyyatına alınır?

Nəsiman QASIMLI,
Bakı şəhəri.

- Daşınmaz əmlak üzərində müddəti on bir aydan çox olan icarə və ya istifadə hüququ dövlət qeydiyyatına alınır. İcarə və ya istifadə hüququnun dövlət qeydiyyatına alınması barədə ərizəni daşınmaz əmlakın icarə (istifadə) müqaviləsi üzrə tərəflərdən biri verə bilər. Daşınmaz dövlət əmlakı üzərində icarə (istifadə) hüququ daşınmaz dövlət əmlakı üzərində icarə (istifadə) müqaviləsi bağlamaq hüququ olan müvafiq icra hakimiyyəti orqanının müraciəti əsasında dövlət reyestrində qeydiyyata alınır.
- Torpaq sahəsi və ya yerin təki sahəsi icarəyə (istifadəyə) verildikdə qeydiyyat üçün təqdim edilən müqaviləyə torpaq sahəsinin və yerin təki sahəsinin planı əlavə edilir.
- Binanın, qurğunun, evin, binada və ya evdə yerləşən mənzillərin, otaqların icarəsi haqqında müqavilə üzrə hüquq dövlət qeydiyyatına verildikdə, yerləşməsi və ölçüləri göstərilməklə icarəyə verilən sahələrin planı təqdim olunur. Daşınmaz əmlakın icarəsi (istifadəsi) haqqında müqavilə icarəyə (istifadəyə) verənin hüququnun məhdudlaşdırılması kimi qeydiyyata alınır.

- Mülkiyyət hüququnun məhdudlaşdırılması hansı hallarda ola bilər?

Mürsəl ORUCOV,
Neftçala rayonu.

- Mülki Məcəllənin 169-cu maddəsinə əsasən, bu Məcəllədə müəyyənləşdirilmiş hallarda mülkiyyət hüququ məhdudlaşdırıla bilər.
Hər bir daşınmaz əmlak mülkiyyətçisi, əgər quyuların qazılması, drenaj, qaz və başqa boruların, habelə yerüstü və yeraltı elektrik xətlərinin çəkilməsi onun torpaq sahəsindən istifadə edilmədən qətiyyən mümkün deyildirsə və ya hədsiz məsrəflər hesabına mümkündürsə , bununla əlaqədar dəyən zərərin əvəzinin qabaqcadan ödənilməsi şərtilə həmin tədbirlərin həyata keçirilməsinə icazə verilməlidir.
Yüklü torpaq sahəsinin mülkiyyətçisi öz mənafelərinin ədalətlə nəzərə alınması hüququna malikdir. Yerüstü xətlərin çəkildiyi hallarda, əgər fövqəladə hallar əsas verirsə, o tələb edilə bilər ki, həmin xəttin keçdiyi ağlabatan həcmdə torpaq sahəsi tam əvəzi ödənilməklə ondan ayrılsın.
Əgər şərait dəyişərsə, mülkiyyətçi xəttin onun mənafeyinə uyğun çəkilməsini tələb edə bilər. Çəkilmənin dəyərini ixtiyarlı şəxs ödəməlidir, lakin xüsusi halların əsas verdiyi yerlərdə dəyərin ağlabatan hissəsi mülkiyyətçinin hesabına da aid edilə bilər.

- 1) Yeni ailə həyatı qurmuşam. Həyat yoldaşım və mən Azərbaycan Respublikasının vətəndaşlarıyıq. VVADQ-da nikahı qeydiyyata alanda və bununla əlaqədar şəxsiyyət vəsiqələrində də dəyişiklik edilsə bu zaman nə qədər dövlət rüsumu ödənilməlidir?
- 2) Kəlbəcər rayonunda yaşayarkən işləyənlərin əməkhaqqına əlavə ödənişlər edilirdi. Hazırda İsmayıllıda yaşayanların və işləyənlərin bəzisinin əməkhaqqına belə əlavə ödənişlər edilir, digərlərinə isə edilmir. Bu ödənişlərin edilməməsi düzgündürmü?

Firudin İSMAYILOV,
Kəlbəcər rayonu.

- 1. "Dövlət rüsumu haqqında" Qanunun 12-ci maddəsinə əsasən, Vətəndaş Vəziyyəti Aktlarının Dövlət Qeydiyyatına görə: hər ikisi Azərbaycan Respublikası vətəndaşları olan şəxslərin nikahının qeydə alınması üçün 5 manat, tərəflərdən biri Azərbaycan Respublikası vətəndaşı, digəri isə əcnəbi və ya vətəndaşlığı olmayan şəxsdirsə nikahının qeydə alınması üçün 11 manat, nikahın pozulması üçün 5 manat, bu orqanlarda soyadın, adın və atasının adının dəyişdirilməsi üçün 3 manat dövlət rüsumu ödənilir. "Dövlət rüsumu haqqında" Qanunun 14-cü maddəsinə əsasən, Azərbaycan Respublikası vətəndaşları 25, 35 və 50 yaşına çatdıqda, həmçinin onların soyadı, adı, atasının adı, yaşayış yeri, ailə vəziyyəti və hərbi vəziyyəti dəyişdikdə, şəxsiyyət vəsiqəsinin verilməsinə görə 2 manat, 16 yaşına çatmış Azərbaycan Respublikası vətəndaşlarına şəxsiyyət vəsiqəsinin verilməsinə görə -3 iş günündə 5 manat, 3 iş günündən sonrakı müddətdə 1 manat dövlət rüsumu alınır.

- 2. Əmək Məcəlləsinin 159-cu maddəsinə əsasən, əmək şəraiti ağır və zərərli olan işlərdə və iqlim şəraitinə görə işləmək üçün əlverişli olmayan iş yerlərində işçilərin əməkhaqqının yüksək məbləğdə ödənilməsini təmin edən artımlar (əmsallar) müəyyən edilir. Əməkhaqqına belə artımların (əmsalların) məbləğinin minimum miqdarı müvafiq icra hakimiyyəti orqanı tərəfindən təsdiq edilir. Əmək şəraiti ağır və zərərli olan işlərdə və iqlim şəraitinə görə işləmək üçün əlverişli olmayan iş yerlərində çalışan işçilərin əməkhaqqının yüksək məbləğdə ödənilməsini təmin edən artımların (əmsalların) məbləğinin minimum miqdarının müəyyən edilməsi haqqında Əmək Məcəlləsinin 159-cu maddəsinə uyğun olaraq Nazirlər Kabineti tərəfindən qəbul olunmuş 22 avqust 2002-ci il tarixli, 137 saylı qərarına əsasən, Azərbaycan Respublikasında dəniz səviyyəsindən hündürlükdə yerləşən müəssisə, idarə, təşkilatlarda və ya iş yerlərində çalışan işçilərin əməkhaqqına hündürlük 1200 metrdən 1500 metrədək olduqda artımın (əmsalın) minimum miqdarı 1.1; 1500 metrdən 2000 metrədək olduqda artımın (əmsalın) minimum miqdarı 1.2; 2000 metrdən yuxarı olduqda isə artımın (əmsalın) minimum miqdarı 1.3 məbləğində müəyyən edilmişdir. Müəssisə, idarə və təşkilatlar respublikanın susuz ərazilərində daimi içməli su mənbəyindən uzaqda yerləşən iş yerlərində çalışan işçilərin əməkhaqqına artım əmsallarını tətbiq edərkən iş yerləri ilə içməli su mənbəyi arasındakı məsafələri hər il şəhər (rayon) icra hakimiyyəti orqanı ilə dəqiqləşdirərək razılaşdırılır. Büdcədən maliyyələşdirilən müəssisə, idarə və təşkilatlar respublikanın susuz ərazilərində daimi içməli su mənbəyindən uzaqda yerləşən iş yerlərində çalışan işçilərin əməkhaqqına artım əmsallarını bu qərarda göstərilən qaydada Maliyyə Nazirliyi, Əmək və Əhalinin Sosial Müdafiəsi Nazirliyi ilə razılaşdırmaqla tətbiq edilir. Bu qərarda göstərilən artım əmsalları işəgötürən tərəfindən tarif (vəzifə) maaşına, vaxtamuzd və işəmuzd əməkhaqqına, qanunvericiliklə tarif (vəzifə) maaşına müəyyən edilmiş əlavələrə və "Məzuniyyət vaxtı üçün orta əməkhaqqının hesablanması zamanı nəzərə alınan və alınmayan ödənişlərin müəyyən edilməsi və məzuniyyət vaxtı üçün əməkhaqqının əmsallaşdırılması qaydasının təsdiq edilməsi barədə" Nazirlər Kabinetinin 1999-cu il 25 avqust tarixli, 137 nömrəli qərarının 1 nömrəli əlavəsinin 3-cü abzasında nəzərdə tutulan mükafatlara tətbiq edilir. Azərbaycan Respublikasında dəniz səviyyəsindən 1200 metrdən 1500 metrədək, 1500 metrdən 2000 metrədək və 2000 metrdən artıq yüksəklikdə yerləşən yaşayış məntəqələrinin adları Nazirlər Kabineti tərəfindən qəbul olunmuş 22 avqust 2002-ci il tarixli, 137 saylı qərarına 1 saylı əlavədə göstərilmişdir. Həmin əlavədə Azərbaycan Respublikasının digər rayonları ilə bərabər Kəlbəcər və İsmayıllı rayonlarının da Azərbaycan Respublikasında dəniz səviyyəsindən 1200 metrdən 1500 metrədək, 1500 metrdən 2000 metrədək və 2000 metrdən artıq yüksəklikdə yerləşən yaşayış məntəqələrinin adları da göstərilmişdir. Nazirlər Kabineti tərəfindən qəbul olunmuş 22 avqust 2002-ci il tarixli, 137 saylı qərarına 1 saylı əlavədə göstərilən yaşayış məntəqələrinin Əmək Məcəlləsinin 159-cu maddəsinə və qeyd olunan qərara uyğun olaraq əməkhaqqına artımlar (əmsallar) tətbiq edilməlidir. İsmayıllı rayonunda yaşayanların və işləyənlərin bəzilərinin əməkhaqqına belə əlavə ödənişlər edilməməsi, həmin yaşayış məntəqələrinin adlarının dəniz səviyyəsindən 1200 metrdən aşağı olması və bu səbəbdən də Nazirlər Kabineti tərəfindən qəbul olunmuş 22 avqust 2002-ci il tarixli, 137 saylı qərarına 1 saylı əlavədə göstərilməməsidir.

- Mülki işlərdə iclasın vaxtı və yeri haqqında lazımi qaydada xəbərdar edilmiş cavabdeh məhkəmə iclasına gəlmədikdə və gəlməməsinin səbəbləri barədə məlumat vermədikdə işə qiyabi icraat qaydasında baxıla bilərmi?

Səlminaz İBADOVA,
Gəncə şəhəri.

-Mülki işlərdə iclasın vaxtı və yeri haqqında lazımi qaydada xəbərdar edilmiş cavabdeh məhkəmə iclasına gəlmədikdə və gəlməməsinin səbəbləri barədə məlumat vermədikdə, iddiaçı buna etiraz etmədikdə işə qiyabi icraat qaydasında baxıla bilər. İşdə bir neçə cavabdeh iştirak etdikdə, məhkəmə iclasına bütün cavabdehlər gəlmədikdə işə qiyabi icraat qaydasında baxılması mümkündür. İşdə cavabdehin lazımi qaydada xəbərdar edilməsi barədə məlumatlar olmalıdır .İşə qiyabi baxılmasına iddiaçının razılığı yazılı formada olmalıdır. İşə qiyabi icraat qaydasında baxılması barədə məhkəmə qərardad çıxarır.

çap üçün verisya