- Bakı Apelyasiya Məhkəməsinin qətnaməsi ilə mənzil almaq hüququm bərpa olunmuşdur. Qanuni qüvvəyə minmiş Qətnamənin icra olunması üçün 15 yanvar 2008-ci il tarixli İcra Vərəqi verilmişdir. Lakin bu günə kimi Qətnamə cavabdeh olan Azərbaycan Dövlət Dəmir Yolu və Bakı şəhəri, Nəsimi Rayon Məhkəməsinin icraçıları tərəfindən yerinə yetirilmir. Məhkəmə Qətnaməsinin icra olunması üçün hansı orqana müraciət etməliyəm?

Allahverən ŞİRİNOV,
Bakı şəhəri.

- "Məhkəmə qərarlarının icrası haqqında" qanunun 3-cü maddəsinə əsasən, məhkəmə və digər orqanların qərarlarının icrası ilə əlaqədar məhkəmə icraçısının tələbləri Azərbaycan Respublikasının ərazisində bütün orqanlar, hüquqi şəxslər, onların vəzifəli şəxsləri və fiziki şəxslər üçün məcburidir. Məhkəmə nəzarətçisinin və məhkəmə icraçısının qanuni tələblərini yerinə yetirməyən, ona həvalə edilmiş vəzifələrin icrasına mane olanlar qanunvericilikdə nəzərdə tutulan qaydada məsuliyyət daşıyırlar.
"Məhkəmə qərarlarının icrası haqqında" qanunun 84.4-cü maddəsinə əsasən, məhkəmə icraçısının qanuni tələblərini qəsdən yerinə yetirməyən və ya onların yerinə yetirilməsinə mane olan və yaxud başqa şəkildə məhkəmə və digər orqanların qərarlarının icrası haqqında qanunvericiliyi pozan təqsirkar şəxslərin Azərbaycan Respublikasının qanunvericiliyi ilə müəyyən olunmuş qaydada cinayət məsuliyyətinə cəlb edilməsi barədə məhkəmə icraçısı məhkəmə icraçıları qurumunun rəhbəri tərəfindən təsdiq olunan təqdimat verir.
Məktubunuza əsasən 15 yanvar 2008-ci il tarixli İcra Vərəqi üzrə 29. 12. 2008-ci il tarixli Qətnamənin icrası Bakı şəhəri, Nəsimi Rayon Məhkəmə Nəzarətçiləri və İcraçıları Şöbəsinin icraatına verilmişdir. Qeyd olunan İcra Vərəqi qanunvericiliklə nəzərdə tutulan qaydada icra olunmursa, siz icra işini həyata keçirməyən icraçıdan Bakı şəhəri, Nəsimi Rayon Məhkəmə Nəzarətçiləri və İcraçıları Şöbəsinin rəisinə, Azərbaycan Respublikası Ədliyyə Nazirliyinin Məhkəmə İcraçıları Baş İdarəsinin rəisinə, Azərbaycan Respublikasının Ədliyyə nazirinə və Azərbaycan Respublikasının İnsan Hüquqları üzrə müvəkkilinə müraciət edə bilərsiniz.

- Hansı hallarda digər şəxslər tərəfindən təsdiq edilmiş vəsiyyətnamələr notariusa bərabər tutulur?

Pərvanə HÜSEYNOVA,
Bakı şəhəri.

- Vəsiyyətnamələr təsdiqlənərkən aşağıdakılar notariusa bərabər tutulur:
o Xəstəxananın, hospitalın, digər müalicə müəssisəsinin, sanatoriyanın baş həkimi, rəisi, onların tibbi hissə üzrə müavinləri və növbətçi baş həkimi və ya əlillər və qocalar evinin baş həkimi - əgər vəsiyyət edən bu müəssisədə müalicə edilirsə və ya yaşayırsa.
o Axtarış, coğrafi və digər bu cür ekspedisiyaların rəisi, əgər vəsiyyət edən belə ekspedisiyadadırsa.
o Dəniz və ya hava gəmisinin kapitanı, əgər vəsiyyət edən dəniz və ya hava gəmisindədirsə.
o Hərbi hissənin, birləşmənin, müəssisənin və məktəbin komandiri (rəisi), əgər hərbi hissənin yerləşdiyi məntəqədə notarius yoxdursa və əgər vəsiyyət edən hərbi hissədə hərbi qulluqçudursa və ya həmin hissədə qulluq edən mülki şəxsi, yaxud onun ailə üzvüdürsə.
o Azadlıqdan məhrumetmə yerinin rəisi, əgər vəsiyyət edən azadlıqdan məhrumetmə yerindədirsə.

- Eşitdiyimə görə, hazırda ev alqı-satqısı zamanı pul əməliyyatı bank vasitəsilə aparılır. Bilmək istəyirəm ki, vasitəçinin iştirakı olmadan ev alan və satan arasında ev alqı-satqısı hansı qaydada aparılır?

Etibar KAZIMOV,
Bakı şəhəri.

- Sizin hər hansı bir vasitəçinin iştirakı olmadan və əlavə xərc çəkmədən, qanunla nəzərdə tutulan qaydada mənzilinizin alqı-satqısını həyata keçirmək hüququnuz vardır. Mənzilin alqı- satqısını həyata keçirmək üçün ilk növbədə sizin bu daşınmaz əmlak üzərində mülkiyyət hüquqlarınız olmalıdır və bu hüquqlar Daşınmaz Əmlakın Dövlət Reyestr Xidmətində qeydə alınmalı, dövlət qeydiyyatına alınması barədə çıxarışınız olmalıdır. Mənzilin alqı-satqısı alqı-satqı müqaviləsi əsasında notariusda rəsmiləşdirilir. Bu rəsmiləşdirilmənin aparılması zamanı hər iki tərəfin şəxsiyyət vəsiqəsi üzərində olmalı, mülkiyyət hüququ ilə mənzildə yaşayan və qeydiyyatda olan 18 yaşına çatmış ailə üzvlərinin mənzilin satılmasna dair notariat qaydada razılığı və mənzilin texniki sənədləri də təqdim edilməlidir. Alqı-satqı müqaviləsi bağlanılarkən mənzilin pulu digər şəxsin hesabına bank vasitəsilə ödəməklə həyata keçirilir. Alqı-satqı müqaviləsi bağlandıqdan və notarial qaydada təsdiq olunduqdan sonra alan şəxs tərəfindən ona əlavə olunmuş sənədlərlə birlikdə Daşınmaz Əmlakın Dövlət Reyestr Xidmətində dövlət qeydiyyatına alınmaq üçün bu orqana təqdim edilir. Bu orqan tərəfindən mənzil qanunla nəzərdə tutulan qaydada həmin şəxsin adına şəxsi mülkiyyət hüququ ilə rəsmiləşdirilməklə bu barədə dövlət qeydiyyatına alınma barədə çıxarış verilir. "Daşınmaz Əmlakın Dövlət Reyestri haqqında" qanunun 9-cu maddəsinə əsasən, hüquqların dövlət qeydiyyatı aşağıdakı qaydada aparılır: Bu Qanuna uyğun olaraq hüquqların dövlət qeydiyyatı haqqında ərizənin və ərizəyə əlavə edilmiş sənədlərin, o cümlədən dövlət rüsumunun ödənilməsi haqqında qəbzin qəbul edilməsi; daxil edilmiş sənədlərdə göstərilən məlumatın dövlət reyestrində saxlanılan məlumata uyğunluğunun yoxlanılması; bəyan olunan hüquqlarla qeydiyyata alınmış hüquqlar arasında ziddiyyətlərin, habelə hüquqların dövlət qeydiyyatından imtina edilməsi və ya bu hüquqların dövlət qeydiyyatının dayandırılması üçün digər əsasların olub-olmamasının müəyyən edilməsi; hüquqların dövlət qeydiyyatından imtina edilməsi və ya qeydiyyatın dayandırılması üçün əsas olmadığı halda təsdiqləyici sənədlər üzərində qeydlərin yazılması və dövlət reyestrinə müvafiq məlumatın daxil edilməsi. Qeydiyyat orqanının sənədlərin həqiqiliyinə ciddi şübhəsi varsa, qeydiyyat bir ay müddətinə dayandırıla bilər. Hüquqların dövlət qeydiyyatına alınmasından imtina edilmə halı istisna olmaqla, qeydiyyat orqanı ərizənin və ona əlavə edilən sənədlərin təqdim edildiyi gündən 20 gündən gec olmayaraq daşınmaz əmlak üzərində hüquqları dövlət qeydiyyatına alır. Hüquqların dövlət qeydiyyatı ərizələrin qəbul edilmə ardıcıllğı ilə aparılır. Həm notariusda, həm də Daşınmaz Əmlakın Dövlət Reyestr Xidmətində bu əməliyyatların aparılması üçün nağd və ya köçürmə yolu ilə dövlət büdcəsinə dövlət rüsumu ödənilir. "Dövlət rüsumu haqqında" qanunun 10-cu maddəsinə əsasən, müqavilə üzrə əmlak ərə (arvada), uşaqlara, valideynlərə, babaya, nənəyə, nəvəyə, qardaşa, bacıya keçirsə -7 manat, müqavilə üzrə əmlak başqa vətəndaşlara və ya hüquqi şəxslərə keçirsə - 110 manat, digər şəhər və rayonlarda - 44 manat dövlət rüsumu tutulur. Həmin Qanunun 26-cı maddəsində nəzərdə tutulan qaydada daşınmaz əmlak üzərində mülkiyyət hüquqlarının dövlət qeydiyyatına alınması barədə çıxarışın verilməsi üçün - 30 manat, daşınmaz əmlaka dair texniki sənədlərin (pasport və plan ölçü) verilməsi üçün -50 manat, vərəsəlik nəticəsində əldə edilmiş hüquqların, bölünmə nəticəsində əvvəlki hüquq sahibində qalan hissə üzərindəki hüquqların, yüklülüyün (girov, ipoteka, icarə, istifadə, lizinq, servitut və s.), icarə və istifadə hüquqlarının yüklülüyünün və özgəninkiləşdirilməsinin dövlət qeydiyyatının aparılması - 20 manat məbləğində dövlət rüsumu tutulur.

- Qardaşım uzun müddət əmək fəaliyyəti ilə məşğul olub. Artıq o, vəfat edib. Bilmək istəyirəm ki, ailə başçısını itirməyə görə ailə üzvlərinin pensiya almaq hüququ varmı?

Adil XƏLİLOV,
Zərdab rayonu.

-"Əmək pensiyaları haqqında" qanunun 14-cü maddəsinə əsasən, vəfat etmiş və ya həlak olmuş ailə başçısının öhdəsində olan (vəfat edənin tam təminatında olan və ya ondan özlərinin yaşayışı üçün daimi və əsas vəsait mənbəyi kimi kömək alan) aşağıdakı ailə üzvlərinin ailə başçısını itirməyə görə əmək pensiyası hüququ vardır: vəfat etmiş və ya həlak olmuş şəxslərin övladları: 18 yaşına çatmamış; 18 yaşına çatanadək I və ya II qrup əlil olmuş 18 yaşdan yuxarı; təhsil müəssisələrinin əyani şöbəsində təhsil alanlar, lakin ən çoxu 23 yaşına çatanadək; ata, ana, ər (arvad) pensiya yaşına - kişilər 62 yaşa, qadınlar 57 yaşa çatmışdırsa, yaxud I və ya II qrup əlildirsə; yaşından və əmək qabiliyyətindən asılı olmayaraq valideynlərdən biri və ya ər (arvad), yaxud baba, nənə, qardaş, bacı vəfat etmiş və ya həlak olmuş ailə başçısının 8 yaşına çatmamış uşaqlarına, qardaşlarına, bacılarına, nəvələrinə baxırsa və işləmirsə. Sığorta olunan qanunvericilikdə nəzərdə tutulmuş qaydada xəbərsiz itkin düşmüş və ya ölmüş elan edildiyi halda, onun ailə üzvləri vəfat etmiş və ya həlak olmuş ailə başçısının ailə üzvləri ilə bərabər əsaslarla ailə başçısını itirməyə görə əmək pensiyası hüququna malikdirlər. Xəbərsiz itkin düşmüş və ya ölmüş elan edilən sığorta olunan qayıtdıqda və ya onun olduğu yer aşkar edildikdə, onun ailə üzvlərinə ödənilən ailə başçısını itirməyə görə əmək pensiyası dayandırılır.

çap üçün verisya