1998-ci ildə bulvar Milli Park statusu alaraq Bakı Şəhər İcra Hakimiyyətinin, habelə Mədəniyyət və Turizm Nazirliyinin tabeliyinə verilib. Prezident İlham Əliyevin 2008-ci ildə imzaladığı sərəncamla Nazirlər Kabineti yanında Dənizkənarı Bulvar İdarəsinin yaradılmasından sonra burada əsaslı yenidənqurma işləri aparılıb. Bundan sonra dənizkənarı bulvarın Bakının müasir memarlıq tələblərinə uyğun yenidən qurulması, mühafizəsi, qorunması, bərpası və inkişafı baxımından xeyli işlər görülüb. Aparılan abadlıq və quruculuq işləri çərçivəsində Milli Parkda yeni ağaclar əkilib, yeni çəmənliklər salınıb. İtaliya, Türkiyə, Hollandiya, İran və digər ölkələrdən Banzayi, Taksus, Bakkafa, Buksus, Arizona şamı, İleks ağacları gətirilib. Ərazisinə asfalt örtük götürülərək qırma-dekorativ daş döşənib. Müxtəlif guşələrində yüngül konstruksiyalı yığılıb-sökülən yeni kafelər quraşdırılıb. Bundan başqa, parkın işıqlandırma sistemi tamamilə yenidən qurulub. Oturacaqlar təzələnib, ətrafına zibil qutuları qoyulub. Dənizkənarı Bulvar ərazisində dənizin kənarına çay daşları tökülüb. Çay-çınqıl daşlarını yalnız üzərinə çəkilmiş məftil torlar saxlayır. Sahildəki sədlər dəyişdirilib və pilləkənlər qoyulub. Ərazidə təmir işləri bu gün də davam etdirilir. Gələcəkdə parkın ərazisi Əl Oyunları Sarayından Bibiheybət pirinədək, Dəniz Limanından isə Zığ qəsəbəsinədək genişləndiriləcəkdir. Bulvarın ərazisindəki attraksionlar da dəyişdirilərək yeniləri ilə əvəzlənib. Bir sözlə, dənizkənarı bulvarda aparılan yenidənqurma işləri, yaşıllıqlar ilk baxışdan insanda xoş ovqat yaradır. Amma...
Bakı bulvarında gördüyümüz dəyişiklik bununla bitmir. Əvvəllər axşam və səhər saatlarında dolu olan bulvarda o qədər də adam gözə dəymirdi. Hətta yeni qurulan skamiyaların da çoxu boş qalmışdı. Əvvəllər bulvarda nərd, domino oynayan qocalar da yoxa çıxmışdılar. Bəlkə də bu, çayxanaların təyinatını dəyişməsi, ya da bulvardakı qiymətlərlə bağlıdır? Mətbuatda gedən tənqidi yazılardan sonra qiymətlər müəyyən qədər aşağı salınsa da, yenə şəhərin digər yerlərindən xeyli bahadır. Mağazalarda 20 qəpiyə olan yarım litrlik qazsız su burada 40 qəpiyə satılır. Mağazada 30 qəpiyə ala biləcəyimiz kiçik "jalə" şirələri 60 qəpikdir. Digər suların qiyməti isə çəkisi və növünə görə dəyişir. Bulvarda qaynadılmış qarğıdalı 1 manat 50 qəpik, "popkorn" 50 qəpiyə satılır. Hot-doq almaq üçün isə ən azı 1 manat 50 qəpik xərcləmək lazımdır. Milli Parkda dönər 1 manat 50 qəpik, hamburger isə 60-70 qəpiyədir. Müxtəlif növ dondurmaların ən ucuzu 50 qəpikdən aşağı deyil.
Nəzarət gücləndirilsə də Milli Parkda olan kafe və restoranlarda qiymətlər baha olaraq qalır. Bir çaynik çayın qiyməti 2 manatdan başlayır. Əlavə sifarişdən asılı olaraq, qiymətlər 10 manatadək arta bilər. Yeməklərin qiyməti isə sifarişdən asılıdır. Bakı sakinlərinin daha çox sevdiyi kabab sifariş etsən, ən azı 6 manat xərcləməlisən.

Uşaqlar yeni attraksionlara ancaq kənardan baxa bilir

Bulvarın ərazisindəki uşaqların da ha çox sevdiyi attraksionlar da dəyişdirilərək yeniləri ilə əvəzlənib. Fransa və İtaliyadan gətirilmiş bu attraksionlardan istifadə baha olduğundan uşaqların böyük əksəriyyəti onda əylənə bilmirlər. Ümumiyyətlə, uşaqlar üçün nəzərdə tutulan əyləncə vasitələrinin ən ucuzunun qiyməti 1 manatdır. Bu qiymət isə yalnız Dəniz Limanının yaxınlığında olan attraksionlara aiddir. Bulvarın mərkəz hissəsində isə qiymətlər 1 manat 50 qəpik və 2 manatdır. Biz ərazidə olanda attraksionların ətrafı uşaqla dolu idi. Amma qiymətlər baha olduğundan uşaqların əksəriyyəti kənarda durub baxmaqla kifayətlənirdi. Dənizi səyahət etmək üçün ayrılan gəmini isə bu dəfə görmədik. Dənizkənarı bulvarın mühafizəçiləri gəminin təmirə dayandığını bildirdilər. Gəminin yenidən nə vaxt istifadəyə veriləcəyini isə heç kim bilmədi.
Bakı sakinləri dənizkənarı bulvarda istirahət üçün yaradılan şəraitdən razı olsalar da, qiymətlərdən narazıdırlar. Həftədə bir dəfə uşaqları Milli Parka gətirən İradə Babayeva burada olan xidmətlərdən istifadə edə bilmədiklərini deyir: "Yayda uşaqları şəhərdən kənara apara bilmədiyimdən həftədə bir dəfə bulvara gəlirik. Amma burada qiymətlər o qədər bahadır ki, məcbur olub suyu da şəhərdən alıb gətiririk. Uşaqlarımız attraksionlara həsrətdir. Əvvəlki attraksionların ən bahası 60 qəpik idi. İndi isə ən azı 2 manat verməliyik. Buna da həmişə imkanımız çatmır".
Əvvəllər günün bir hissəsini dənizkənarı bulvarda həmyaşıdları ilə söhbət etməklə keçirən 62 yaşlı Əlövsət Abbasov indi həftədə 1-2 dəfə buraya gəlir: "Təmirdən öncə özümüzlə nərd, domino, şahmat gətirib burada günümüzü keçirirdik. İndi nə o şərait var, nə də aparılan tikintilər buna imkan vermir. Elə burada da şəhərdəki kimi toz-torpaq, səs-küy əlindən dincəlmək olmur".
Dənizkənarı Bulvar İdarəsindən isə bildirirlər ki, qiymətlər bulvar ərazisində müqavilə əsasında işləyən sahibkarlar tərəfindən müəyyənləşdirilir. Hazırda isə Bulvar İdarəsində monitorinq qrupu yaradılıb. O, müqavilə əsasında fəaliyyət göstərən kafe, restoran, attraksion və ticarət obyektlərində qiymətlər və vətəndaşlara göstərilən xidmətin hansı səviyyədə olmasını araşdırır. Bundan sonra vətəndaşları aldadan və qiymətləri süni şəkildə qaldıran obyekt rəhbərlərinə ciddi xəbərdarlıq ediləcək. Eyni zamanda Bulvar İdarəsində vətəndaşların şikayətləri ilə bağlı qaynar xətt yaradılıb. Hazırda Milli Parkda fəaliyyət göstərən bütün ticarət obyektləri nömrələnib. Həmin ticarət köşklərinin qarşısına xüsusi elan vurulub və qaynar xətt nömrələri qeyd olunub. Vətəndaşlar tərəfindən daxil olan şikayətləri yerindəcə araşdırıb lazımi tədbirlər görüləcək. Dənizkənarı bulvarda qiymətlər barədə şikayəti olan vətəndaşlar 480-18-36 nömrəli qaynar xəttə müraciət edə bilərlər.

çap üçün verisya