Onunla salamlaşanda istər-istəməz ruhuna bir rahatlıq hakim olur. Üzün günəşdən sonra açılan səma kimi işıqlanır. Onun sadəliyi sənə də sirayət edir.

Mən Fikrət Nuriyevi belə tanıyıram. Onu ilk dəfə Azərbaycan Həmkarlar İttifaqları Konfederasiyasında 11 il əvvəl görmüşəm. Ötən illər ərzində zaman saçlarının ağını bir az da tündləşdirib, zahiri görkəminə hiss ediləcək dərəcədə əl gəzdirib. Amma xarakterinə toxunmağa cəsarət etməyib. Uşaqlıq dostlarnın dediyinə görə, elə o, ağlıkəsəndən belədir. Xoş ünsiyyət qurmaq istəyi alnına yazılıb. Lovğalıqdan, xüdpəsəndlikdən uzaq adamdır. Baxmayaraq ki, özünü çoxlarından fərqləndirməyə «əsası» da var idi. Rəhmətlik atası uzun müddət rəhbər vəzifələrdə işləyib. Zaqafqaziya üzrə dəmir yolu sədrinin birinci müavni olub. Elə Fikrət müəllimin özü də cəmiyyətdə sayılıb-seçilən qurumlarda çalışıb. Sadəliyindən qidalanan işgüzarlığı, istedadı onu vəzifədən-vəzifəyə çəkib aparıb. Heç bir vəzifədə vicdanını, səmimiyyətini nəyəsə qurban verməyib. Necə deyərlər, işin düzələninə gedib. Deyir ki, Bakının rayonlarının birində o vaxt böyük səlahiyyətlərə malik olan xalq nəzarəti komitəsinin sədri işləyirdim. Siqnal gəldi ki, filan mağazada minlərlə sayda az tapılan xarici qida məhsulu ikiqat qiymətinə satılır. Təcili qrup yaradıb yoxlama apardıq. Deyilənlər təsdiqini tapdı. Mən əslində akt bağlayıb, məhsulu müsadirə edib, işi prokurorluğa verməli idim. Nəticədə məsul şəxs soğan kimi soyulacaq, sözügedən qida məhsulları alıcılara bəlkə daha da baha qiymətə satılacaqdı. Mağaza müdiri, əlbəttə, xalqı aldatdığına görə nifrətə layiq idi. Amma ailə sahibi idi. Özümü bir anlıq ata kimi onun yerinə qoydum. Atasız uşaqların aqibəti gözlərim önünə gəldi. Ehtiyac onları əxlaqsızlığa, xuliqanlığa sürükləyəcəkdi. Düşündüklərimdən dəhşətə gəldim.
Mağaza müdiri yalvarır və rüşvət təklif edirdi. Mən ona dedim: “Gəl belə edək, bu məhsulların öz qiymətinə yarmarka şəklində açıq satışını təşkil edək. Qiymətdə itirəcəyin, yəqin ki, mənə təklif etdiyin rüşvətdən az olacaq”. Sevincindən az qaldı əlimdən öpə. Beləliklə, həm camaat qazandı, həm də bir ailə bədbəxtçilikdən qurtuldu.
F. Nuriyevin əmək fəaliyyəti illərində belə hadisələr saysız-hesabsızdır. Azərbaycan KP Mərkəzi Komitəsində işlədiyi illərdə də vəzifənin verdiyi imkanlar daxilində haqsızlığa məruz qalan insanların ümid yerinə çevrilməyə çalışırdı.
Fikrət müəllim üçün deputatlığı dövrü xüsusilə unudulmazdır. 1991-ci il oktyabrın 18-də Ali Sovetdə Prezidentin iştirakı ilə respublikamızın müstəqilliyi elan edildi. Zalda ilk dəfə olaraq üçrəngli bayrağımız dövlətçiliyimizin rəsmi atributu kimi dalğalandı. Bu bayrağın rəsmiləşməsi anlarının iştirakçılarından biri də Fikrət müəllim idi. Müqəddəs bayrağımızın zala gətirilməsi deputatlar içərisindən məhz ona həvalə olunmuşdu.
Müstəqilliyimizin ilk ili Fikrət müəllim hələ dirçəldilməsi uzun, yorucu zəhmət tələb edən turizm sahəsində fəaliyyətə başladı. Onu Turizm və Ekskursiyalar Şurasının sədri vəzifəsinə göndərdilər. İnqilablar, naşı adamlar Şuranı, demək olar ki, tamamilə yararsız hala salmışdı. Mərkəzi aparat nə edəcəyini bilmirdi. Çaşqınlıq, məğlubiyyətlə barışmaq hissi heç bir nicat yeri qoymamışdı. Səttar Mehbalıyevin Azərbaycan Həmkarlar İttifaqına lider seçilməsi, elə ilk günlərdən o dövrün yüksək çinli məmurlarının dağıdıcı siyasətinə qarşı mübarizəsi bu qurumun, eləcə də onun nəzdində fəaliyyət göstərən turizm və ekskursiyalar şurasının xilasına, yenidən fəal həyata qayıtmasına ümidlər yaratdı.
Həmkarlar ittifaqının digər əmlakı, mülkiyyəti kimi turist bazaları da əsl sahiblərindən alınmaq ərəfəsindəydi. Bu proses təkcə Azərbaycanda deyil, bütün keçmiş postsovet məkanında gedirdi. S. Mehbalıyev, silahdaşları, o cümlədən F. Nuriyev haqq, ədalət yerini tapana qədər, şişirtmə olmasın, bir ömrə bəs edən əziyyət çəkdilər. Onların mətanəti, əqidələrindən, mübarizələrindən geri çəkilməmələri nəticəsində keçmiş SSRİ respublikalarından təkcə Azərbaycanda həmkarlar ittifaqlarının sağlamlıq ocaqları, turist bazaları qorunub saxlanıldı.
Fikrət müəllim o günləri belə xatırlayır: bir regiondakı turist bazasından münaqişəni həll edib. Bakıya çatanda digər regionda olan turist bazamıza yerli hakimiyyət tərəfindən hücum barədə xəbər gəlirdi. Necə deyərlər, əl-üzümüzə su vurmamış ora yollanırdıq.
F. Nuriyev o mübarizələrin hədər getmədiyinə sevinir: «AHİK sədri, millət vəkili S. Mehbalıyevin başçılığı ilə biz bu gün işçilərin, onların ailə üzvlərinin böyük məmnuniyyətlə dincəldiyi turizm şəbəkəsi qura bilmişik»,-deyir. -«Biz bu şəbəkəni daim təkmilləşdirir, müasirləşdiririk».
İki gündən sonra Fikrət müəllimin 60 yaşı tamam olur. Amma qurub yaratmaq arzuları o qədər çoxdur ki, onları reallaşdırmaq üçün hələ ən azı 60 il də yaşamalıdır.
Deyirlər ürəyi təmiz, saf niyyətli, xeyirxah insanlar qocalmır. Fikrət müəllim bu deyimin canlı təsdiqidir.
Sizə uzun ömür, bitib-tükənməyən daxili cavanlıq arzusu ilə
Bəyalı SAFAOĞLU.

çap üçün verisya