Bakının sürətlə böyüdüyü göz qabağındadır. Küçələr və prospektlər genişləndirilib, yollara keyfiyyətli asfalt döşənib, şəhərin müxtəlif nöqtələrində körpülər, yol ötürücüləri, tunellər tikilib istifadəyə verilib.

Son vaxtlar Bakının simasını dəyişən faktorlardan biri də şəhərdə inşa edilən yeni çoxmərtəbəli tikililərdir. Artıq paytaxt əhalisinin böyük bir hissəsi bu binalarda məskunlaşmağa başlayıblar. Amma yeni binalar gözəlliklə bərabər, yeni problemlər də gətiriblər.
Bu problemlərdən ən ağrılısı təbii qazla təminatın olmamasıdır. Məsələ burasındadır ki, inşaat şirkətləri əvvəlcədən sakinlərin bütün kommunal xidmətlərlə təmin olunacaqlarını bildirsələr də, sonradan vədlərinə əməl etmirlər. Təbii ki, mənzillərin qazla təmin edilməməsinin əsas səbəbi yeni tikililərin Dövlət Qəbul Komissiyasına tam təhvil verilməməsidir. Qanunvericiliyə və müvafiq normativ aktlara görə, yeni tikililərə qazın verilməsi binaların tam təhvil verilməsindən, layihədə göstərilən bütün öhdəliklərin yerinə yetirilməsindən və görülən işlərin standartlara uyğun olmasından asılıdır. Son vaxtların təcrübəsi göstərir ki, problemlər həm sahibkarların, həm də yeni tikilmiş binalarda mənzil alan vətəndaşların səhlənkarlığı ucbatından yaranır. Belə ki, binalar təhvil verilməmiş buraya elektrik və suyun verilməsi təmin olunur. Bundan istifadə edən vətəndaşlar yeni tikilmiş, amma tam təhvil verilməmiş binalara köçüblər. Belə olan halda tikinti şirkətləri əlavə xərc çəkib Dövlət Qəbul Komissiyasından təhvil aktı almaqda maraqlı olmurlar.
Kommunikasiya xətlərinin normal vəziyyətə gətirilməsi üçün sakinlər tikinti şirkətlərinə deyil, hökumət qurumlarına müraciət edirlər. Təbii ki bu halda hökumət qurumları vətəndaşların problemlərinin həllində aciz duruma düşürlər. Hazırda Bakıda elə yeni tikilmiş binalar var ki, onlarda 3 ildir məskunlaşma gedib, amma qazın nə vaxt veriləcəyi hələ də məlum deyil. Bəzi hallarda isə sakinlər binaları inşa edən tikinti şirkətlərinin sahiblərini belə tapa bilmirlər. Bəzi tikinti şirkətləri isə, ümumiyyətlə, fəaliyyətlərini dayandırıblar. Bu problemlə üzləşən vətəndaşların problemlərinin həlli ilə bağlı dəfələrlə parlamentdə də məsələ qaldırılıb. Məsələn, millət vəkili Qənirə Paşayeva hesab edir ki, yaranmış problemin həllində əsasən tikinti şirkətləri günahkar olduqlarından dövlət vətəndaşların problemlərinin həllinə bir çarə tapmalıdır. Dövlət orqanları isə deyirlər ki, tam təhvil verilməmiş yeni tikiliyə qazın verilməsi cinayətdir. Çünki bu, həmin binalarda yaşayan yüzlərlə insanın təhlükəsizliyinin təmin edilməsi baxımından yolverilməzdir.
Məhz bu çatışmazlıqların tənzimlənməsi məqsədi ilə parlament "Elektroenergetika haqqında", "Su təchizatı və tullantı suları haqqında" və "Qaz təchizatı haqqında" qanunlara əlavə və dəyişikliklər edib. Dəyişikliklərə əsasən, Dövlət Qəbul Komissiyası yeni tikilən hər hansı binanı tam istismara qəbul edənədək bu binaya, onun mənzillərinə elektrik, qaz və su verilə bilməz. Eyni zamanda yeni tikilən yaşayış binaları tam istismara qəbul edilənədək mənzillərdə elektrik, qaz və su sayğaclarının quraşdırılmasına icazə verilməyəcək.
Milli Məclisin Təbii Ehtiyatlar, Energetika və Ekologiya Komitəsinin sədr müavini Elton Məmmədov hesab edir ki, bu dəyişikliklər müvafiq qanunvericiliyin təkmilləşdirilməsi xarakteri daşıyır və vətəndaşların xeyrinədir. Yəni vətəndaş Dövlət Qəbulu Komissiyası tərəfindən qəbul edilməyən binalarda məskunlaşa bilməyəcək. Bu vəziyyətdən çıxmaq üçün tikinti şirkətləri məcbur olub üzərilərinə düşən bütün öhdəlikləri yerinə yetirəcəklər ki, tikdikləri bina komissiya tərəfindən qəbul olunsun və sata bilsinlər.
Yeni tikilmiş binaların problemləri təkcə təbii qazın qıtlığı ilə bitmir. Məsələ burasındadır ki, Dövlət Qəbul Komissiyası tərəfindən qəbul olunmayan binalara mülkiyyət hüququnu təsdiq edən qeydiyyat şəhadətnamələri də verilmir. Bu mənzillərin sahibləri mülkiyyəti tikinti şirkətindən adi müqavilə ilə alırlar. Sonradan vətəndaş mənzilini yenidən satmaq istəyəndə əlavə problemlə üzləşir. Alıcı mənzilin qeydiyyat şəhadətnaməsini ("kupça"sını) tələb edir. Ev sahibi isə bu sənədi təqdim edə bilmir.
Ekspertlərin fikrincə, Milli Məclisdə qəbul olunan sözügedən əlavə və dəyişikliklər bu problemin də həllinə dəstək olacaq.
Amma bir məsələ də var ki, qanun geriyə şamil edilmir. Hazırda küllü miqdarda pul verib qazsız mənzillərdə yaşayanlar problemin həlli üçün bir az da gözləməli olacaqlar - tikinti şirkətləri insafa gəlib binaları Dövlət Qəbul Komissiyasına təhvil verənə kimi.

Gülər KƏRİMLİ.

çap üçün verisya