Vətəndaşlığı olmayan şəxs ölkə ərazisinə daxil olduğu dəqiqədən ciddi nəzarətdə saxlanılır

“Ölkə ərazisində olma və yaşamalarını qanuniləşdirən əcnəbilərlə yanaşı, qanunvericiliyin tələblərinə riayət etməkdən boyun qaçıranlar da var". Bunu Dövlət Miqrasiya Xidmətinin (DMX) rəisi Arzu Rəhimov bildirdi. Xidmət rəhbərinin sözlərinə görə, miqrasiya sahəsində qanunvericiliyin beynəlxalq norma və müasir dövrün tələblərinə uyğunlaşdırılması, tənzimlənməyən miqrasiya proseslərinin neqativ təsirinin aradan qaldırılması, milli təhlükəsizliyin və sabit sosial-iqtisadi inkişafın təşkili qurumun prioritet vəzifələrindəndir. Bu vəzifələr sırasında əhalinin mütənasib yerləşdirilməsi, miqrantların intellektual və əmək potensialından istifadə edilməsi, insan alveri də daxil olmaqla, qeyri-qanuni miqrasiyanın qarşısının alınması önəmli yer tutur. Dövlət orqanları qarşısındakı vəzifələrdən biri də miqrasiya proseslərinin idarə edilməsi sahəsində nəzarətin gücləndirilməsidir.
Bu məqsədlə adıçəkilən quruma miqrasiya proseslərinin təhlili, vaxtaşırı hesabatların və statistik məlumatların hazırlanması, həmçinin yeni texnologiyaların tətbiqi ilə vahid uçotun təmin edilməsi tapşırığı verilib. Vahid Miqrasiya Məlumat Sisteminin yaradılması miqrasiya proseslərinin dinamikası barədə təsəvvür yaratmaqla, qeyri-qanuni hallarla mübarizə və təhlükəsizliyin təmin olunmasına əlverişli şərait yaradıb: "Həmin məlumat sistemi vasitəsilə əcnəbi və vətəndaşlığı olmayan şəxslərin ölkə ərazisinə daxil olduğu dəqiqədən harada olması və nə işlə məşğul olması nəzarətdə saxlanılır. O cümlədən əcnəbilərin və vətəndaşlığı olmayan şəxslərin ölkə ərazisində olma müddətləri də müəyyən edilir. Mövcud qanunvericiliyə edilən əlavə və dəyişikliyə əsasən, əcnəbilərin Azərbaycanda müvəqqəti və daimi yaşaması üçün lazımi sənədlər təsdiqlənib, qeydiyyat sistemi təkmilləşdirilıb. Həmçinin, ölkə vətəndaşlığına qəbul üzrə əlavə meyarlar müəyyən edilib, miqrasiya qanunvericiliyinin pozulmasına görə məsuliyyət artırılıb".
Xidmət rəisinin bildirdiyinə görə, Dövlət Miqrasiya Xidmətinə müraciət edib ölkə ərazisində olma və yaşamalarını qanuniləşdirən əcnəbilər olduğu kimi, qaydalardan boyun qaçıranlar da var: "Qeyri-qanuni miqrasiyanın qarşısının alınması isə respublikamızın milli təhlükəsizliyinin təmini baxımından vacib şərtlərdən biridir. Miqrasiya nəzarəti sistemi qeyri-qanuni miqrasiya ilə bağlı mövcud vəziyyətə adekvat olmalıdır. Miqrasiya prosesləri üzrə idarəetmə beynəlxalq öhdəliklərin yerinə yetirilməsini, insan hüquq və azadlıqlarının, dövlətin milli maraqlarının və təhlükəsizliyinin etibarlı qorunmasını tələb edir. Bu sahədə xarici ölkələrin müvafiq strukturları və beynəlxalq təşkilatlarla əməkdaşlığın gücləndirilməsi, həmsərhəd dövlətlərlə müqavilə prosesinin aktivləşdirilməsi, öhdəlikləri müəyyən edən və məsuliyyət nəzərdə tutan müvafiq sazişlərin bağlanması üzrə tədbirlər həyata keçirilir".
Nəzarətin gücləndirilməsi üzrə normativ-hüquqi aktların, o cümlədən ölkəmizin ərazisindən tranzit keçid qaydaları, daxili miqrasiyanın hüquqi tənzimlənməsi, qeyri-qanuni miqrantların ölkə ərazisindən çıxarılması, müxtəlif dövlət orqanlarının fəaliyyətlərinin səmərəli əlaqələndirilməsi və işin məqsədyönlü təşkili istiqamətində konkret addımlar atılır: "Xidmət ölkə ərazisində qanunsuz yaşayan, əmək fəaliyyəti ilə məşğul olan əcnəbi və vətəndaşlığı olmayan şəxslərin aşkar edilməsi istiqamətində müntəzəm tədbirlər həyata keçirir. Müəyyən edilmiş inzibati pozuntu halları qanunvericiliyin tələblərinə uyğun olaraq araşdırılır və müvafiq qərarlar qəbul olunur".
"Bir pəncərə" prinsipinin tətbiqindən də danışan A.Rəhimov dedi ki, sistem miqrasiya proseslərini daha işlək mexanizm əsasında idarə edir, operativliyin təmin olunmasına və problemlərin aradan qaldırılmasına yardım edib. Bununla da quruma daxil olan müraciətlərin sayı artıb, vahid prinsipin icrasında ciddi nəzarət mexanizmi yaradılıb. "Bir pəncərə" prinsipi tətbiq ediləndən bu günə qədər Dövlət Miqrasiya Xidmətinə 60 mindən artıq müraciət daxil olub. Müraciət edənlərin rahatlığının təmin edilməsi, onların DMX-yə regionlardan uzaq məsafə qət etməməsi, həmçinin xidmətin fəaliyyətinin genişləndirilməsi, regionlarda miqrasiya proseslərinin tənzimlənməsi məqsədi ilə qurumun regional idarələrinin təşkili işi uğurla davam etdirilir. Bu gün Xidmətin Şirvan, Yevlax, Lənkəran regional miqrasiya idarələri fəaliyyət göstərir. Hazırda digər regionlarda idarə və qanunsuz miqrantların saxlanılma mərkəzlərinin tikinti işləri intensiv davam etdirilməkdədir.

Gülər KƏRİMLİ.

çap üçün verisya