ÖLKƏYƏ GƏTIRILƏN GÜN EYNƏKLƏRI VƏ DIGƏR OPTIK LƏVAZIMATLAR YOXLANILACAQ

Yaz mövsümü ilə əlaqədar əhali arasında gün eynəklərinə tələbat bir qədər artıb. Artıq paytaxt küçələrində, metro stansiyalarının yaxınlığında heç bir gigiyenik tələblərə cavab verməyən eynəklər satılır. Azərbaycanda, gün eynəkləri də daxil olmaqla, optik ləvazimatlar istehsal olunmadığından, onlar əsasən xaricdən gətirilir. Lakin ölkəyə gətirilən eynəklərin böyük əksəriyyəti standartlara uyğun deyil və indiyədək də vahid mərkəzdə ekspertiza olunmur. İstifadəyə yararsız eynəklərin taxılması isə insanların sağlamlığına mənfi təsir göstərir.
Acınacaqlı hal ondan ibarətdir ki, eynək seçərkən çoxları onun hazırlandığı materiala, onun keyfiyyətinə yox, formaya üstünlük verir. Bu da sonradan həm gözdə, həm də ümumilikdə orqanizmdə müxtəlif fəsadlar törədir. Hətta həkim məsləhəti olmadan alınan eynəklərdən uzunmüddətli istifadə göz xərçənginin yaranma ehtimalını artırır.
Problemə münasibət bildirən Dövlət Karantin Müfəttişliyi bazarda satılan eynəklərin ölkəyə gizli yollarla gətirildiyini və bu səbəbdən həmin eynəklərin əksəriyyətinə sertifikat verilmədiyni iddia edir. Paytaxtda baş çəkdiyimiz istənilən eynək satışı mağazalarında, istərsə də pərakəndə satış yerlərində müxtəlif firmaların etiketləri ilə eynəklər satılır. Üzərində ayrı-ayrı xarici firmaların etiketləri yapışdırılan eynəklərin qiyməti də bir-birindən kəskin fərqlənir. Metronun "Nizami", "28 May", "Neftçilər" stansiyalarının yaxınlığında eynək satışı ilə məşğul olanlardan heç biri satdığı məhsulun keyfiyyət sertifikatının olmadığını və ümumiyyətlə, bundan xəbərsiz olduqlarını bildirdilər.
Satıcıların sözlərinə görə, onlar eynəklərin hansı ölkədən gətirildiyindən xəbərsizdirlər. Satdıqları eynəkləri "Sədərək" Ticarət Mərkəzindən alıblar. Yalnız metronun "28 May" stansiyasının yaxınlığında eynək satışı ilə məşğul olan Elxan adlı satıcı eynəklərin Çin istehsalı olduğunu qeyd etdi: "Biz eynəkləri "Sədərək" yarmarkasından gətiririk və onlar bu məhsulların Çindən idxal edildiyni bildirirlər. Eynəklərin qiyməti isə keyfiyyət və formadan asılı olaraq dəyişir. Hazırda satışda 2 manatdan başlayaraq 10 manatadək eynəklər var".
İnsanların daha gur olduğu "Fəvvarələr" meydanındakı eynək mağazalarında da keyfiyyət sertifikatı yox idi. Qiymətlərin şəhərin digər yerlərinə nisbətən yüksək olduğu həmin mağazalarda 15 manatdan başlayaraq 150-200 manata qədər qiyməti olan eynək tapmaq mümkündür.
Satıcılar dünyanın aparıcı şirkətlərinə məxsus eynək satdıqlarını bildirsələr də, eynəklərin ölkəyə hansı yollarla idxal edildiyini açıqlamaq istəmədilər. Onların sözlərinə görə, satdıqları məhsulun haradan gətirilməsi və keyfiyyət sertifikatı olması barədə məlumatları mağazanın müdirindən almaq olar. Mağaza müdirini isə tapmaq qeyri-mümkün oldu.
Eynəklərlə bağlı problemə münasibət bildirən tanınmış göz həkimi, cərrah Paşa Qəlbinur son zamanlar metro stansiyalarının çıxışlarında, yol kənarında eynək satışının narahatlıq yaratdığını qeyd etdi: "Bu sahədən başı çıxmayan, göz həkimi olmayanlar insanların gözünü yoxlayaraq onlara eynək məsləhət görür. Bu zaman eynək alan şəxsə zahirən yaraşan, əslində insanların gözlərinə uyğun olmayan eynəklər məsləhət görülür. Nəticədə isə həmin eynəklər onların gözlərində müxtəlif fəsadlar yaradır.
Düzgün təyin edilməyən eynək göz əyarının dəyişməsinə səbəb olur və bu problemi sonradan aradan qaldırmaq üçün çox zaman cərrahi müdaxiləyə ehtiyac yaranır. Bu səbəbdən həm optik, həm də göz eynəklərinin seçilməsi zamanı göz həkiminə müraciət etmək daha düzgün olardı.
Qiyməti nisbətən ucuz saxta şüşələrdən hazırlanan və Çində istehsal edilən həmin eynəklər gözə daha çox zərərdir. Lakin hazırda küçələrdə əsasən həmin ölkədə istehsal edilən eynəklər satılır".
Paşa Qəlbinurun sözlərinə görə, eynək alarkən onun hazırlandığı şüşənin keyfiyyəti, onun ölçüsünün üzərində yazdığı əyara uyğun olması yoxlanılmalıdır. Buna görə də vətəndaşların istər optik, istərsə də gün eynəkləri seçərkən göz həkimi ilə məsləhətləşməsi vacib olardı.
Səhiyyə Nazirliyindən aldığımız məlumata görə, artıq optik ləvazimatlarla bağlı bu problemlərin həlli üçün bu qurumda ayrıca ekspertiza şöbəsi yaradılıb. Hazırda şöbədə müvafiq ekspertizaların aparılması üçün lazımi avadanlıqlar alınır. Yaxın vaxtlarda fəaliyyətə başlayacaq ekspertiza şöbəsində ölkəyə gətirilən gün eynəkləri, eləcə də digər optik ləvazimatlar yoxlanılacaq. Yalnız yoxlamadan keçən eynəklərin satışına icazə veriləcək.

Ayxan KAZIMLI.

çap üçün verisya