"İnsanların rifah halının yaxşılaşdırılması daim ölkə başçısının diqqət mərkəzindədir. Məhz bu siyasətin nəticəsidir ki, işçilərin əmək, sosial və digər hüquqlarının müdafiəçisi funksiyasını yerinə yetirən həmkarlar ittifaqları təşkilatının fəaliyyəti xüsusilə son on ildə layiqincə qiymətləndirilir".
Bu sözləri Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyev dörd gün əvvəl AHİK-in iclas zalında baş tutan mərasimdə söylədi. Ölkə başçısı tərəfindən bir qrup həmkarlar ittifaqı işçisinə verilmiş dövlət fəxri adlarının və medalların təqdimolunması məqsədi ilə keçirilən mərasimi giriş sözü ilə açan S. Mehbalıyev ilk öncə yüksək qiymətə görə Respublikamızın Prezidentinə minnətdarlığını bildirdi. Həmkarlar ittifaqlarının fəaliyyəti və vətəndaşların layiqli işlə təmin edilməsi üçün ölkədə aparılan iqtisadi, sosial islahatların əhəmiyyətindən danışdı. Dedi ki, əhalinin məşğulluğu, yoxsulluğun azaldılması, regionların inkişafı və sair sahələrdə son 4-5 ildə genişmiqyaslı fəaliyyəti əhatə edən dövlət proqramları qəbul edilib. Artıq insanlar nəinki işlə təmin edilir, hətta layiqli iş yerləri seçmək imkanı qazanıblar. Bütün bu nailiyyətlər həmkarlar ittifaqlarının üzərinə düşən funksiyaları yerinə yetirməsinə baza yaradır, köməklik göstərir.
Sədr bugünkü yüksəlişin heç də asanlıqla başa gəlmədiyini xatırlatdı. Dedi ki, 90-cı illərin əvvəlləri elə bu zalda əyləşənlərin çoxunun yadındadır. O dövrdə qısa vaxt ərzində hakimiyyətdə olmuş "cəbhəçilər" xalqı dilənçi gününə salmışdılar. Uzun illərdən bəri toplanmış təcrübəni, qurulmuş maddi sərvətləri vurub dağıdırdılar. Xalqın sıravi üzvlərinin müdafiəçisi olan həmkarlar ittifaqlarını yollarının üstündə ciddi maneə kimi gördüklərindən ona qarşı amansız hücuma keçmişdilər. Bu qurumu mənəvi sıxıntılar yaşamağa məcbur edir, qanuni əmlakını mənimsəməyə cəhd göstərirdilər.
Zamanın keşməkeşlərindən çıxmış Azərbaycan həmkarlar ittifaqları təbii ki, asanlıqla, cəmiyyət səhnəsindən gedə bilməzdi. Biz müqavimət göstərir, qanuni haqqımızı çətinliklə olsa da, qoruyurduq. Xalqın və onun təşkilatı olan həmkarlar ittifaqlarının belə sıxıntılı günlərində ümummilli liderimiz Heydər Əliyevin hakimiyyətə qayıtması bugünkü azad, demokratik cəmiyyət quruculuğunun başlanğıcının əsasını qoydu.
S. Mehbalıyev daha sonra mərasim iştirakçılarının nəzərinə çatdırdı: Ümummilli liderin şəxsən bizim təşkilat üçün nələr etdiyi hamımızın gözü qarşısında olub. Ən böyük xidmətlərindən biri hakimiyyətinin ilk illərində həmkarlar ittifaqlarının qanunvericilik bazasının yaradılması üçün etdiyi təşəbbüskarlıq olub.
Ümummilli lider vaxtaşırı həmkarlar ittifaqı fəalları ilə görüşlər keçirir, qurultaylarımıza təbrik məktubları göndərir, qurumun fəaliyyətinin güclənməsinə və cəmiyyətdə rolunun artmasına şərait yaradırdı.
Həmkarlar ittifaqlarına bu isti münasibət ümummilli liderin layiqli davamçısı cənab İlham Əliyev tərəfindən də davam etdirilməkdədir. Onun sərəncamı ilə bir qrup işçimiz Azərbaycan həmkarlar ittifaqlarının 100 illik yubileyi ərəfəsində orden, medal və fəxri adlarla mükafatlandırılmışdı.
Həmçinin turizm sahəsinin 70 illiyi, kurortlar şəbəkəsinin 60 illiyi münasibətilə, idman sahəsində əldə edilən nailiyyətlərə görə 18 aprel 2007-ci il tarixdə imzaladığı sərəncamla həmkarlar ittifaqı əməkdaşlarından 30 nəfəri medal və fəxri adlarla təltif edildi.
AHİK sədri bu diqqəti respublika həmkarlar ittifaqlarına göstərilən qayğı kimi qiymətləndirdi. O, həmkarlar ittifaqlarının 2008-ci il prezident seçkisində İlham Əliyev cənablarının yenidən prezidentliyə namizədliyini irəli sürmək niyyətində olduğunu bildirdi.
Tədbirin sonunda AHİK sədri, millət vəkili S. Mehbalıyev öz adından və tədbir iştirakçıları adından bir daha Azərbaycan Respublikası Prezidenti İlham Əliyevə dərin minnətdarlığını bildirərək təltif olunanlara fəxri adların vəsiqələrini və "Tərəqqi" medalını təqdim etdi.
“Ülfət”

çap üçün verisya