Azərbaycan Dövlət Xəzər Dəniz Gəmiçiliyi Mənzil-Kommunal Təsərrüfatı İdarəsi Həmkarlar İttifaqı Komitəsinin normal fəaliyyət göstərməsindən ötürü hər cür şərait mövcuddur. Öz işini dövrün tələblərinə uyğun quran təşkilat üzvlərinin hüquqlarının müdafiəsi üçün idarə və müəssisə rəhbərliyi ilə möhkəm əlaqə yaratmağı bacarmışdır. İdarədə 200-ə yaxın işçi çalışır. Tərkibində 5 mənzil-istismar sahəsini birləşdirən idarənin həmçinin 1 yataqxanası və 1 təmir-tikinti sahəsi var.
Komitə sədri Abdulla Atakişiyevin dediyinə görə, idarənin maliyyə vəziyyəti yaxşılaşdıqca işçilərin sosial, mənzil-məişət şəraiti, istirahət hüquqları da bir o qədər təmin olunur.
Komitə sədri onu da dedi ki, idarənin xidmətində olan müəssisələrdə işçilərin əmək, sosial və iqtisadi hüquqlarının müdafiəsində çox güclü vasitə kimi kollektiv müqavilənin imkanlarından istifadə edilir. HİK-in yaxından iştirakı ilə bu ilin martın 28-də işəgötürənlə kollektiv müqavilə bağlanmışdır. 9 fəsildən ibarət kollektiv müqavilə bütövlükdə bəyənilmişdir.
Əməyin təşkili və ödənilməsi məsələsinə toxunan komitə sədri söylədi ki, qarşıya qoyulan öhdəliklər yerinə yetirilir. Belə ki, dalandarların əməyi xeyli yüngülləşdirilmişdir. Məhəllələrdən zibillərin daşınması üçün daha müasir konteynerlər gətirilmişdir. Bu da əl əməyindən istifadəni azaltmağa imkan vermişdir.
Fəhlə və qulluqçular əməkhaqlarını Gəmiçiliyin rəisi tərəfindən təsdiq edilmiş ştat cədvəlinə uyğun alırlar. Ötən dövr ərzində işçilərin əməkhaqları 50 faiz artırılmışdır. Qazançı, gözətçi və qapıçılara gecə vaxtı hər saat işə görə bir saatlıq tarif dərəcələrinin 20 faizi miqdarında əlavə əməkhaqqı ödənilir.
Abdulla müəllim deyir ki, əmək intizamının möhkəmləndirilməsi, əməyin mühafizəsi həm müdiriyyətin, həm də həmkarlar ittifaqı komitəsinin başlıca vəzifələrindəndir. Bütün sahələr iş alətləri ilə təmin olunmuşdur. Qadın əməyinin yüngülləşdirilməsi, qadınlara göstərilən qayğı daima diqqət mərkəzindədir.
İşçilərin istirahətinə də biganə yanaşılmır. Ötən il 1 nəfər "Bilgəh" sanatoriyasına, 12 ailə "Gəmi təmirçisi" istirahət evinə yollayış almışdır. Bu ilin 3-cü kvartalında "Bilgəh"ə, "Abşeron"a, "Günəşli"yə yollayış üçün üst-üstə dörd müraciət daxil olub. Çalışacağıq ki, onların istirahətini və müalicəsini təmin edək.
"Gəmi təmirçisi" istirahət evi yay mövsümünü iyunun 20-də açacaqdır. İşçilərimiz yollayışın ümumi məbləğinin 15%-ni ödəməklə bu imkandan bəhrələnəcəklər.
8 yubilyar 1 aylıq vəzifə maaşı həcmində mükafatlandırılmışdır. 8 Mart Qadınlar bayramında 92 qadının hər birinə 30 manat həcmində mükafat təqdim edilmişdir. 25 ildən yuxarı işləyən kişilərə və 20 ildən yuxarı işləyən qadınlara 2 aylıq vəzifə maaşı miqdarında birdəfəlik müavinət verilmişdir. Yubiley yaşları qeyd olunan 7 əməkdaş 1 aylıq maaşı həcmində mükafatlandırılmışdır.
Pensiyaya gedənlər isə 2 aylıq maaşı qədər əlavə pul mükafatı ilə yola salınmışlar.
Komitə sədri söhbət əsnasında problemlərdən də yan ötmədi. Dedi ki, idarənin müəyyən çətinliklərlə üzləşməsi dərhal həmkarlar ittifaqı komitəsinə təsir göstərir. Belə ki, komitənin fəaliyyəti həmkarlar ittifaqı üzvlərinin əməkhaqlarından tutulan 2 faiz üzvlük haqqı və təşkilatın əməkhaqqı fondundan ayrılan 0,15 faiz vəsaitdən asılıdır. Bütün çətinliklərə baxmayaraq, Mənzil Kommunal Təsərrüfatı İdarəsinin rəisi Səmədağa Aslanovun kollektivə olan diqqət və qayğısı işin ahəngdar getməsində az rolu oynamır.
Onu da qeyd edim ki, hələ neçə il öncə bir çox idarələrin mənzil fondu Bakı Şəhər İcra Hakimiyyətinin balansına verildiyi vaxt Gəmiçiliyin rəisi Aydın Bəşirov 200-dən çox işçinin taleyinə biganə qalmadı. Onların gələcəkdə işsiz qalmaması üçün xüsusi məktubla Nazirlər Kabinetinə müraciət etdi. Müraciət nəzərə alındı. Bu gün bir sıra çətinliklərimiz olsa da, etiraf edilməlidir ki, Gəmiçiliyin Mənzil-Kommunal Təsərrüfatı İdarəsinin işçiləri digərlərindən yaxşı yaşayırlar. "Aylarla suların qoynunda olan dənizçi mənzil-istismar sahələrində mehribanlıqla qarşılanır və yola salınır. Gəmiçilik rəhbərliyinin göstərdiyi qayğıya kommunalçılar da əməli işlə cavab verirlər. Mənzil-Kommunal Təsərrüfatı İdarəsinin işçiləri həmişə olduğu kimi, bundan sonra da Gəmiçiliyin adına layiq işləyəcəklər"-deyə, komitə sədri bildirdi. Abdulla müəllim sonda onu da dedi ki, qarşıya çıxan bir sıra problem məsələlər həmkarlar ittifaqı komitəsinin güclü nəzarəti nəticəsində həllini tapır.

Rasim SÜLEYMANOV.

çap üçün verisya