Bələdiyyə Qulluqçuları Həmkarlar İttifaqının (BQHİ) II qurultayı olmuşdur. Respublika Komitəsinin sədri Şəmsəddin Məhərrəmov qurumun beş illik fəaliyyəti barədə hesabat vermişdir.

Natiq qeyd etmişdir ki, 2002-ci ildən fəaliyyət göstərən BQHİ hazırda 62 rayon komitəsini, 2254 ilk təşkilatı və 20500 həmkarlar ittifaqı üzvünü birləşdirir. Hesabat dövründə ittifaqın 10 Məclisi və İcraiyyə Komitəsinin 55 iclası keçirilmişdir. Bu iclaslarda işçilərin sosial-iqtisadi problemlərinin aradan qaldırlması, bələdiyyələrdə keçirilən mədəni-kütləvi tədbirlərdə həmkarlar ittifaqının iştirakı, işçilərin sosial müdafiəsinin təşkili, maliyyə məsələləri, əməyin və sağlamlığın mühafizəsi və s. məsələlərə baxılmışdır. Yığıncaqların əksəriyyətində işəgötürənlərin nümayəndələrinin iştirakı təmin edilmişdir.
Həmkarlar ittifaqı təşkilatları ilə bələdiyyələr arasında bağlanılan kollektiv müqavilələrin ittifaqın İcraiyyə Komitəsi tərəfindən təsdiq olunmuş nümunəvi forması hazırlanıb yerlərə göndərilmişdir. Aparat işçiləri rayonlara ezam edilərək Hİ təşkilatlarına lazımi kömək göstərmişlər. Nəticədə hesabat dövründə ittifaq üzrə 1920 kollektiv müqavilə bağlanmışdır. İndi yerlərdə işçilərin əməkhaqlarının yaxşılaşdırılması, bələdiyyə qulluqçularının sağlamlığının qorunması, əməyin mühafizəsi, istirahətin təşkili və digər məsələlər kollektiv müqavilələrlə tənzimlənir.
Hesabat müddətində BQHİ Respublika Komitəsi və onun yerli strukturları ittifaq üzvlərinin ərizə, şikayət və təkliflərinə diqqətlə yanaşmış, qaldırılan məsələlərin qanunvericilik baxımından həll olunmasına çalışmışdır. Daxil olan ərizə və şikayətlərin 50-60 faizi işəgötürənlər tərəfindən əmək qanunvericiliyinin pozulması ilə işçilərin işdən azad edilməsi olmuşdur.
Respublika Komitəsinin sədri bildirdi ki, bələdiyyələrə 2-ci seçkidən sonra bu strukturda çalışan işçilərin kütləvi şəkildə qanunsuz işdən çıxarılması hallarına yol verilmişdir. Belə vəziyyətə Bakı şəhər və bəzi rayon bələdiyyələrində rast gəlinmişdir. Ədliyyə Nazirliyinin Bələdiyyələrlə İş Mərkəzinin və Bələdiyyə Qulluqçuları Həmkarlar İttifaqı rəhbərliyinin birgə səyi nəticəsində işçilərin bir hissəsi yenidən öz vəzifələrinə bərpa olunmuşdur.
Qurultayda deyildi ki, bələdiyyə üzvlərinin və işçilərin sosial müdafiəsinin təmin olunması məqsədilə Respublika Komitəsinin mütəxəssisləri "Bələdiyyə üzvlərinin və qulluqçularının sosial təminatı haqqında" Qanun layihəsi işləyib hazırlamış, müzakirə olunmaq üçün Milli Məclisin regional komissiyasına təqdim etmişdir.
Yığıncaqda həmçinin, əməyin mühafizəsi, gender bərabərliyi və gənclər siyasəti, Hİ işçilərinin və fəalların təhsilə cəlb olunması, idmana diqqətin artırılması, sanatoriya-kurort müəssisələrinə, istirahət ocaqlarına yollayışların ayrılması və s. məsələlər barədə də geniş söhbət getdi.
Məruzə və çıxışlarda hesabat dövründə görülmüş bu və digər işlərlə yanaşı, bəzi çatışmazlıqlar da göstərilmişdir. İlk növbədə bildirildi ki, şəhər, rayon komitələri və birbaşa ittifaqın nəzdində fəaliyyət göstərən ilk Hİ təşkilatları Nizamnamədə müəyyən olunmuş qaydada üzvlük haqlarının yığılmasında çətinliklərlə üzləşirlər. Bu onunla izah olunur ki, ya bələdiyyələr öz işçilərinə əməkhaqqı hesablamır, ya da hesablanmış əməkhaqları özlərində saxlanılır. Eyni zamanda, yığılan vəsait də komitələrin hesabına köçürülmür və nəticədə həmin məbləğdən təyinatı üzrə istifadə olunmur, başqa məqsədlərə sərf edilir. Bir sıra bələdiyyələrdə əməkhaqqı yaşayış səviyyəsinə uyğun deyildir. Bələdiyyələrdə çalışan vətəndaşların bir hissəsi keyfiyyətli səhiyyə xidmətindən və təhsildən kənarda qalır.
Qurultay qarşıdakı fəaliyyət dövrü üçün yeni vəzifələr müəyyənləşdirdi. Yığıncaqda həmçinin Təftiş Komisiyasının hesabatı dinlənilmiş, sahə həmkarlar ittifaqının nizamnaməsinə əlavələr və dəyişikliklər edilmişdir.
Qurultay sahə həmkarlar ittifaqının rəhbər orqanlarını müəyyənləşdirmişdir.
Şəmsəddin Məhərrəmov yenidən Bələdiyyə Qulluqçuları Həmkarlar İttifaqı Respublika Komitəsinin sədri seçilmişdir.
Qurultayda AHİK-in katibi, aprarat rəhbəri Həsən Cəfərov çıxış etmiş, yığıncaqda deyilmiş nöqsan və çatışmazlıqların səbəblərinin araşdırlmasını, onların aradan qaldırılması üçün müvafiq tədbirlərin görülməsini, ittifaqın strukturunun daha da təkmilləşdirilməsini, maliyyə vəsaitlərinin toplanması və xərclənməsi işlərinə nəzarətin gücləndirilməsini, Hİ üzvlərinin əmək qanunvericiliyinin tələblərinə müvafiq olaraq hüquq və mənafelərinin müdafiəsinin gücləndirilməsini diqqətə çatdırmışdır.
Qurultayın işində AHİK sədrinin müavini Cavanşir Alxasov iştirak etmişdir.

çap üçün verisya