QIŞ MÖVSÜMÜNDƏ 2050 BİNAYA İSTİLİK VERMƏK MÜMKÜN OLACAQ

Qış mövsümünün başlanması ilə əhalinin problemləri bir qədər də artır. Əsasən də paytaxtın istiliklə təminatında problemlər özünü göstərir. Bu günədək bu istiqamətdə müəyyən işlər görülsə də, paytaxtın istilik təminatı problemini tam həll etmək üçün yetərli sayılmır. Maraqlıdır, bu qış mövsümündə paytaxt əhalisinin istiliklə təminatı hansı səviyyədədir?
Məsələyə münasibət bildirən "Azəristiliktəchizat" Açıq Səhmdar Cəmiyyətinin şöbə rəisi Rafiq Əliyev cari ildə bu istiqamətdə xeyli iş görüldüyünü bildirdi: "Cari ildə 107 məktəb, 53 uşaq bağçası, 44 səhiyyə obyektində istilik təchizatındakı problemlərinin aradan qaldırılması istiqamətində tədbirlər nəzərdə tutulurdu. Bu günədək Bakı şəhərində 53 məktəbin daxili istilik sistemləri əsaslı təmir edilib. 17 məktəb üçün yeni qazanxana tikilib, daxili istilik şəbəkəsi isə bərpa olunub. 18 məktəbin qazanxana sistemləri modernləşdirilib. Yəni köhnələr sökülüb, yerində müasir formada qazanxana tikilib və ən müasir avadanlıqlarla təchiz edilib. 3 məktəbin də yalnız istismar müddətini başa vurmuş daxili istilik təchizatı yenidən qurulub. Onların istilik mənbəyi köhnə olmaqla zirzəmidə yerləşən qazanxana olduğundan əvvəlki sistem ləğv edilərək, birbaşa "Azəristiliktəchizat"ın yaxınlığındakı istilik mənbəyinə qoşulub. 16 məktəb üçün də yeni qazanxananın bərpası 3-5 günə tamamlanacaq. Ümumiyyətlə, ötən dövrdə Bakıda yerləşən 333 məktəbdən 148-i, hansı ki, istilik mənbəyi bizdədir, onların hamısı bu il fasiləsiz istiliklə təmin edilib. Qalanları da "Azəristiliktəchizat"ın investisiya proqramına düşdüyündən, onların da təmiri növbəti ildə baş tutacaq. Bir çox məktəb vardır ki, onların istilik təminatı Təhsil Nazirliyinə aiddir. Proqramda nəzərdə tutulan 44 səhiyyə obyektindən 17-də daxili istilik, su təchizatı sistemləri bərpa olunub. 3 səhiyyə müəssisəsi üçün yeni qazanxana tikilib. 7 səhiyyə obyektində qazanxana modernləşdirilib. Və onların hamısında daxili istilik qurğuları əsaslı təmir edilib. 2 səhiyyə obyektində isə daxili sistem bərpa olunaraq, "Azəristilik"in mənbəyinə qoşulub. Uşaq bağçalarında görülən analoji tədbirlərə gəlincə, onların 37-nin istilik təchizatı tam bərpa edilib. Bunlar ötən mövsümlərdə istilik almayan obyektlərdir". Mütəxəssisin sözlərinə görə, yaşayış obyektlərinin qışa hazırlığı ilə əlaqədar 6 qazanxana, 5 istilik məntəqəsi cəmiyyətin daxili vəsaitləri hesabına əsaslı təmir edilib: "58 qazanxana mexaniki və kimyəvi üsulla təmizlənib. 206 nəzarət cihazı, 258 nasos avadanlığı, 34 elektrik mühərriki əsaslı təmir edilib. 5745 siyirtmə, 56934 paqon metr magistral və məhəllədaxili istilik xətləri əsaslı və cari təmir edilib. 48 nasos, 705 siyirtmə yenisilə əvəzlənib.
Həyata keçirilən tədbirlər nəticəsində ötən il "Azəristilik" tərəfindən Bakıda 1750 yaşayış binası istiliklə təchiz edilib. Bu il əlavə olaraq 300 binanın istilik mənbəyi yaradılıb. Qış mövsümündə onların tam istiliklə təmin edilməsi planlaşdırılıb".
Bakının istilik təchizatının tam yaxşılaşdırılması məsələsinə münasibət bildirən R.Əliyev paytaxtdakı 3180 binadan 2050-nə istilik vermək mümkün olacağını bildirdi: "Qalan binalardan 154-nün istilik sistemləri tavan və döşəmədə yerləşib. Onlar sıradan çıxıbdır. Təmir etmək üçünsə camaatın yaşayış mənzilinə ziyan vurmaq olmaz. Bərpası üçün yeni istilik sistemləri yaradılmalıdır. Eyni zamanda şəhərin mərkəzində bir çox tarixi, arxitektur yaşayış binaları vardır ki, onlar üçün də yeni istilik mənbəyinin yaradılması müəyyən problem yaradır. Hansı ki, həmin binalar mənzil-istismar sahələrinin tabeçiliyində olarkən qazanxanaları yerləşən ərazilər özəlləşib. Həmin əraziyə daxil olub qazanxana quraşdırılmasına icazə verilmir. Başqa yerdə də qazanxana tikintisi üçün yer yoxdur. Hardasa belə binaların sayı 450-yə yaxındır. Ümumilikdə 600-dən bir qədər artıq binada bu günün özündə istilik sistemlərini bərpa etmək mümkün deyil".
Qeyd edək ki, "Azəristiliktəchizat"a məxsus qazanxanalar əsasən maye qazla işləyir. Ötən 9 aya hardasa 42 min 872 kubmetr qaz işlənib. Hazırda istiliklə təchizata görə hər kvadratmetr yaşayış sahəsi üçün 5 qəpik ödənilir.

çap üçün verisya