CƏFƏR ƏHMƏDOV: "ƏGƏR SATICIDAN TƏLƏB OLUNANDA SERTİFİKAT GÖSTƏRMİRSƏ, DEMƏLİ, BİZ ONA MÜSBƏT RƏY VERMƏMİŞİK"

NƏSİB QULİYEV: "HƏMİN OYUNCAQLARIN ƏKSƏRİYYƏTİ KİMYƏVİ MADDƏLƏRDƏN HAZIRLANDIĞINA GÖRƏ, UŞAQLARDA ALLERGİYA TÖRƏDİR"

Məsələyə münasibət bildirən Uşaq Hüquqları Üzrə QHT Alyansının sədri Nabil Seyidov oyuncaqlarda təhlükəli maddələrin olmasını müəyyənləşdirməyin çətin olduğunu bildirir: "Bunun üçün hər kəs kimyəvi laborator maddələr gəzdirməlidir ki, bunu aşkar etsin. Zərərli oyuncaqların gətirilməsi və satılması yalnız Azərbaycanda baş vermir. Dünyanın demək olar ki, bütün ölkələrində belə hallar olur. Problemə bir neçə aspektdən yanaşmaq lazımdır. Birincisi, əhali oyuncaqları hökumət tərəfindən tanınmış mağazalardan almalıdır. Eyni zamanda hər bir oyuncağın üzərində Azərbaycan dilində təsvir olmalıdır. Digər tərəfdən, oyuncağın üzərində onun sertifikatlaşdırılması da göstərilməlidir. Əgər sertifikatlaşdırılmayıbsa, onda onun tərkibində zərərli maddələrin olması ehtimalı böyükdür. İnsanlar adətən küçələrdən çox ucuz qiymətlərə oyuncaq alırlar. Nəticəsi bir ay ərzində bilinmir. Lakin sonradan bunun fəsadları yaşanır".

"QEYRİ-RƏSMİ YOLLA GƏTİRİLƏN OYUNCAQLARA NƏZARƏT ETMƏK MÜMKÜN DEYİL"

Nabil Seyidovun qənaətinə görə, xarici ölkələrlə bu məsələlər qarşılıqlı müqavilələrlə nizamlanmalıdır: "Müqavilə əsasında ölkəmizə gətirilən mallar isə Respublika Gigiyena və Epidemiologiya Mərkəzində yoxlanmalıdır. Eyni zamanda mütəmadi olaraq monitorinqlər aparılmalıdır".
Respublika Gigiyena və Epidemiologiya Mərkəzinin gigiyena-epidemiologiya şöbəsinin müdiri Zirəddin Kazımov isə bildirdi ki, qurum xaricdən gətirilən mallara nəzarət etmək imkanına malik deyil. Qurum təmsilçisinin sözlərinə görə, bu məsələyə Respublika Karantin Müfəttişliyi nəzarət edir, biz isə yalnız daxil olan müraciət formasında həmin malın tərkibini öyrənə bilərik.
Hazırda Azərbaycanın istehlak bazarında qeyri-sağlam uşaq oyuncaqlarının olduğunu deyən Respublika Karantin Müfəttişliyinin rəis müavini Cəfər Əhmədov belə malların ölkəmizə müxtəlif ölkələrdən gətirildiyini bildirdi: "Uşaq oyuncaqları ölkəmizə Avropanın müxtəlif ölkələrindən, Amerikadan, əsasən də Çindən gətirilir. Gətirilən bu oyuncaqlar rəsmi olaraq ölkəyə daxil olursa, dövlətin nəzarətindədir. Bu halda onların təhlükəli, yaxud təhlükəsiz olması öyrənilir. Amma qeyri-rəsmi yolla gətirilən oyuncaqlara isə nəzarət etmək mümkün deyil. Bu da yalnız Azərbaycanda deyil, bütün dünyada belə hallar baş verir. Biz mümkün qədər bu məsələlərə nəzarət edirik. Qeyri-rəsmi gətirilənlərə isə nə gömrük, nə də sərhəd xidməti nəzarət edə bilir".
Cəfər Əhmədov bu məqsədlə bir çox ticarət obyektlərində araşdırmalar aparıldığını bildirdi: "Monitorinq zamanı bir çox obyektlərdə qanunsuz oyuncaqlar aşkar etmişik. Həmin malların 30-40 faizində qurğuşun, ağır metal aşkarlanıb. Bu malları ölkəyə gətirənlər də azərbaycanlılardır. Onlar ilk öncə Səhiyyə Nazirliyinə müraciət etməlidirlər ki, bu mallar nə dərəcədə standartlara uyğundur. Yalnız bundan sonra satışa çıxarmalıdırlar. Fiziki və hüquqi şəxslər var ki, gətirdikləri uşaq oyuncaqlarına gigiyenik sertifikatı bizdən alırlar. Xaricdən gələn bu oyuncağa nəzarət bizim tərəfdən aparılır. Əgər satıcıdan tələb olunanda sertifikat göstərmirsə, deməli, biz ona müsbət rəy verməmişik".
Son dövrlərdə uşaqların müxtəlif dəri xəstəlikləri ilə bağlı əziyyət çəkdiyini deyən Pediatriya İnstitutunun direktoru Nəsib Quliyev də bu tip oyuncaqların orqanizmə zərərli olduğunu inkar etmir: "Həmin oyuncaqların əksəriyyəti kimyəvi maddələrdən hazırlandığına görə, onlar uşaqlarda allergiya və zəhərlənmələr törədir. Uşaqlar üçün hazırlanan bütün geyim və oyuncaqların hamısı indeferent tərkibli maddələrdən hazırlanmalıdır. Orada toksiki təsir göstərən nə varsa, kənara çıxarılmalıdır. Təsadüfi deyil ki, bir çox ölkələrdə bundan imtina ediblər. Hesab edirəm ki, Azərbaycanda da bu istiqamətdə ciddi tədbirlər görülməlidir".
Həkimin sözlərinə görə, son zamanlar alergik zədələnmələrlə, ağızda yaralarla, dəridə səpgilərlə bağlı daha çox müraciətlər olur: "Əsasən erkən yaş dövrünə aid körpələr bu xəstəliklərdən əziyyət çəkirlər. Bu baxımdan biz də bu məsələnin tezliklə həll olunacağını gözləyirik".

çap üçün verisya