MƏSAFƏYƏ GÖRƏ VERGİYƏ CƏLB EDİLMƏSİ ÜÇÜN TAKSİLƏRƏ SAYĞAC QURAŞDIRILACAQ

Nəqliyyat Nazirliyi sərnişin avtobuslarında biletlərin tətbiq edilməsi istiqamətində iş aparır. Gələn ilin əvvəlindən şəhər daxilində sərnişin daşınması ilə məşğul olan avtobuslarda biletlərdən istifadənin tətbiq edilməsi nəzərdə tutulur. Nəqliyyat Nazirliyi katibliyinin müdiri Namiq Həsənovun sözlərinə görə, bu məsələnin gecikməsi biletlərin tətbiq edilməsinin kampaniya xarakterli olmaması istəyindən irəli gəlir: "Buna görə də çalışırıq ki, bu iş sistemli qurulsun. Şəhərdaxili sərnişin nəqliyyatında biletlərin tətbiq edilməsindən öncə bu xidməti göstərən nəqliyyatın sayının müəyyənləşməsi vacibdir. Hazırda da marşrutlar öyrənilir, oxşar marşrutlar ixtisar edilir və müəyyən qayda-qanun yaradılmasına çalışırıq. Bu işlər başa çatdırıldıqdan sonra xətlərdə nə qədər avtobusun işləməsi dəqiq aydınlaşacaq. Məhz bundan sonra biletlərin tətbiqi effektiv ola bilər".
N.Həsənovun sözlərinə görə, hazırda da qiymət artımına yol verilməsinin qarşısının alınması üçün müəyyən tədbirlər görülür: "Nazirlik maarifləndirmə işlərinin aparılmasını davam etdirir. Bu kimi hallara yol verən sürücülərə qarşı sərt cəza tətbiq edilir. Eyni zamanda hər bir avtobusun üzərində qət etdiyi məsafə və ona uyğun qiymət əksini tapıb. Buna görə də son vaxtlar bu kimi neqativ hallara az rast gəlinir".
Paytaxtda tikilən körpülərdə işlərin ləngiməsini həmin ərazilərdən çoxsaylı kommunikasiya xətlərinin keçməsi ilə əlaqələndirən N.Həsənov yaxın günlərdə daha bir körpü istifadəyə veriləcəyini qeyd etdi: "Hazırda üçüncü mikrorayon dairəsində inşa edilən körpüdə işlər tamamlanmaq üzrədir. Bakıda inşa edilən digər körpü və yol ötürücülərində də işlər davam etdirilir. Həmin ərazilərdən keçən çoxsaylı kommunikasiya xətlərinin yerlərinin dəyişdirilməsi və tikinti aparılan ərazilərdən bəzi obyektlərin köçürülməsi işləri vaxtında təhvil verməyə mane oldu. Əzizbəyov dairəsində və "Xalqlar Dostluğu"nda inşa edilən körpülərdə işlərin böyük bir hissəsi görülüb. 2008-ci ilin əvvəllərində hər iki körpü istifadəyə veriləcək. "Excesior" mehmanxanasının yaxınlığında tikilən körpü isə gələn ilin birinci rübü ərzində istifadəyə verilməsi nəzərdə tutulur".
N.Həsənovun sözlərinə görə, tikilməkdə olan piyada keçidlərində də işlər davam etdirilir: "Ümumilikdə paytaxtda 13 piyada keçidinin tikintisi nəzərdə tutulmuşdu. Gələn ilin sonunadək tikilməsi nəzərdə tutulan həmin piyada keçidinin hamısı istifadəyə veriləcək. Eyni zamanda paytaxtda bir neçə əlavə körpü və yeraltı qarajın tikintisi də nəzərdə tutulur. Yeni avtovağzal isə gələn ilin sonunadək istifadəyə veriləcək. Hazırda yeni avtovağzalın tikintisində də işlər sürətləndirilib. Avtovağzalda işlər nəzərdə tutulduğu vaxtda başa çatdırılacaq. Həmin vağzalın istifadəyə verilməsi ilə şəhərdə tıxacların bir qədər də azalması nəzərdə tutulur".
Ötən ay 3552 avtobusa fərqlənmə nişanı və marşrut vərəqəsi verildiyini qeyd edən N.Həsənov bunun nəticəsində dövlət büdcəsinə 166657,2 manat vəsait daxil olduğunu qeyd etdi: "Hazırda sərnişindaşıma ilə məşğul olan nəqliyyat vasitələrinə fərqlənmə nişanı verilməklə vergiyə cəlb edilir. Ötən ay sərnişin daşınması ilə məşğul olan 5454 taksiyə fərqlənmə nişanı verilib. Həmin fərqlənmə nişanlarının verilməsi nəticəsində dövlət büdcəsinə 98172 manat vəsait daxil olub. Taksilər üçün bir fərqlənmə nişanınn qiyməti 18 manatdır.
Sərnişin daşınması ilə məşğul olan taksilər vergidən yayınarsa, Vergilər Məcəlləsinə uyğun cərimə tətbiq olunur. Məsafəyə görə vergi tətbiq edilməsi üçün taksi fəaliyyəti ilə məşğul olan avtomobillərə sayğacların quraşdırılması nəzərdə tutulub. Hazırda Nəqliyyat Nazirliyi "Mercedes", Renault" və "Skoda" şirkəti ilə danışıqlar aparır. Eyni zamanda taksi parklarının yaradılması sahəsində də işlərimizi davam etdiririk. Yeni taksi parkları fəaliyyətə başladıqdan sonra bu məsələ tənzimlənəcək. Həmçinin xəttə buraxılacaq yeni taksilərdə sayğacların quraşdırılması nəzərdə tutulub. Bundan sonra taksi fəaliyyəti ilə məşğul olan şəxslər məsafəyə görə vergi ödəməli olacaq".

çap üçün verisya