YOXLAMALARDAN SONRA 2061 ƏMƏK MÜQAVİLƏSİNİN BAĞLANMASINA NAİL OLUNUB

Yasamal rayonu ərazisində hündürmərtəbəli binanın uçmasından sonra tikinti sahəsinə nəzarət daha da gücləndirildi. Həmin hadisədən bir müddət keçmiş Əmək və Əhalinin Sosial Müdafiəsi Nazirliyinin Dövlət Əmək Müfəttişliyi tikinti şirkətlərində yoxlamalara başladı. Yoxlamalar nəticəsində aşkarlanan əsas nöqsanlar təhlükəsizlik qaydalarına riayət edilməməsi və əmək müqavilələrinin bağlanmaması ilə bağlı idi. Hazırda davam etdirilən yoxlamaların başlanmasından təxminən iki aya yaxın vaxt keçir. Tikinti şirkətlərində təhlükəsizlik qaydalarına necə riayət edilməsini aydınlaşdırmaq üçün onlardan bir neçəsinə baş çəkdik.
Yasamal rayonu ərazisində hündürmərtəbəli bina tikintisi ilə məşğul olan "SGS" şirkətində olduq. Tikintidə çalışan fəhlələrin demək olar ki, hamısı xüsusi geyimdə idi. Fəhlələr eyni formada olan inşaat geyimi və dəbilqə ilə təmin edilib.
Tikintidə fəhlə işləyən Xəyyam Həsənovun sözlərinə görə, onlar burada işlədikləri ilk gündən əmək müqaviləsi bağlanılıb: "Artıq 6 aya yaxındır bu şirkətdə işləyirəm. Həmin müqavilədə hər iki tərəfin məsuliyyəti müəyyənləşib. Fəhlələr işə başladığı dövrdən dəbilqə, geyim və digər təhlükəsizlik ləvazimatları ilə təmin edilib".
Xətai rayonunda tikinti aparan "Babək" MTK şirkətində geyimlə təmin edilən fəhlələrin sayı o qədər də çox deyildi. Həmin şirkətdə fəhlə işləyən Vüsal Ağayev təhlükəsizlik qaydaları ilə tanış olduğunu bildirir: "Bizə geyim və dəbilqə verilib. Lakin mən həmin paltarda işləyə bilmirəm. Ona görə də xüsusi geyimdən imtina etmişəm. Dəbilqədə də işləmək mənə çətindir. Amma öz təhlükəsizliyimi təmin etməyə çalışıram".
Əmək müqaviləsi bağlamadan çalışan Vüsal Ağayev buna ehtiyac görmür: "Əməkhaqqımı vaxtlı-vaxtında və razılaşdığımız miqdarda, yəni günə 10 manat alıram. Əgər maaşim vaxtında verilirsə, daha müqavilə nə lazımdır? Buna görə heç özümüz də əmək müqaviləsi bağlamağa maraq göstərmirik".
Həmin şirkətdə usta işləyən Akif Hümbətov isə xüsusi geyimdə olmasa da, başında dəbilqə var. Ustanın sözlərinə görə, işçilərə təhlükəsizlik vasitələrindən istifadə etmək tapşırılır: "Lakin işçilərin bəziləri həmin vasitələrdən istifadə etmir. Səhər iş başlayanda işçilərin hamısında dəbilqə olur. Sonradan isə onların bir çoxu adi geyimdə işləyir. Buna görə də fəhlələrin xüsusi geyimdə olmamasına tikinti şirkəti cavabdeh deyil".
Sonradan baş çəkdiymiz "Azinko", "Azərinşaat" şirkətlərinin inşa etdiyi binalarda işləyənlər də xüsusi geyimdə idi. İş icraçıları ilə söhbətdən məlum oldu ki, fəhlə və ustaların təhlükəsizlik qaydalarına riayət etməsinə ciddi nəzarət edilir. Onlar bu geyim vasitələrindən istifadə etmələri üçün xəbərdar olunublar. İşçilərlə əmək müqaviləsi bağlandığını bildirən şirkət nümayəndələri onlara verilən əməkhaqqı barədə danışmaq istəmədi.
Dövlət Əmək Müfəttişliyindən aldığımız məlumata görə, hazırda da tikinti şirkətlərində yoxlamalar davam etdirilir. Bu günədək respublika ərazisində 168 tikinti şirkətinin fəaliyyəti yoxlanılıb. Araşdırma aparılan şirkətlərdən 138-i Bakıda, 21-i Sumqayıt və Abşeronda, 9-u Gəncədə fəaliyyət göstərir.
Yoxlamalar nəticəsində aşkarlanan əsas nöqsanlardan biri işçilərlə əmək müqavilələrinin bağlanmaması idi. Yoxlamalardan sonra 2061 əmək müqaviləsinin bağlanmasına nail olunub. Bunlardan da 1510-u paytaxtda fəaliyyət göstərən şirkətlərin payına düşür. Yoxlamalardan sonra tikinti sektorunda 500-ə yaxın vətəndaşın əməkhaqqı yüksəldilib.
Yoxlamalar nəticəsində fəaliyyəti dayandırılan 6 tikinti şirkətindən üçü göstərilən nöqsanları aradan qaldırdığı üçün artıq işə başlayıb. Qalan üç şirkət də nöqsanları aradan qaldırması barədə Dövlət Əmək Müfəttişliyinə müraciət edib. Onlardan 1-də təmir işlərinin aparılmasına icazə verilib. Digər iki şirkətdə isə yaxın vaxtlarda təkrar yoxlamalar aparılacaq və aşkarlanan neqativ halların necə aradan qaldırılması öyrəniləcək.
Bu ilin 11 ayı ərzində istehsalatda 273 bədbəxt hadisə baş verib ki, onların da 100-ü ölümlə, 173-ü isə xəsarətlə nəticələnib. Nəticədə 133 nəfər dünyasını dəyişib, 214 nəfər isə müxtəlif növ xəsarət alıb. Tikinti sektorunda baş verən 66 bədbəxt hadisə nəticəsində 63 nəfər həlak olub, 44 nəfər isə xəsarət alıb.

çap üçün verisya