Təxminən 9 min fəhlənin çalışdığı zavodda tətil artıq 3 həftəni keçmişdir. Şirkətin rəhbərləri güzəştə gedərək işçilərin əməkhaqlarını 30% qaldırmışlar. Lakin işçilər bu artımın 50 faiz olmasında israrlıdırlar.
Rəhbərlik işçilərin tətilinin qanunsuz olduğunu bildirərək onları məhkəməyə vermişdir. Vilayət məhkəməsi ötən həftə işçilərin lehinə qərar qəbul etmişdir. Bununla yanaşı, məhkəmə dəymiş ziyanın, eləcə də məhkəmə xərclərinin ödənilməsini şirkət rəhbərliyinin üzərinə qoymuşdur. Zavodun həmkarlar ittifaqının sədri İon İordaçe məhkəmənin qərarını alqışlayaraq bildirmişdir ki, işçilərin 40%-i aktiv olaraq tətilə qoşulmuş və qalanları isə tətil haqqında bəyanata imza atmışdır. Verilən məlumata görə, tətil zavoda hər gün 10 milyon avro ziyan vurur.


Etiraz aksiyası

Sloveniya

Ötən həftə Sloveniyanın paytaxtı Lyublyanada keçirilən Avropa maliyyə nazirlərinin görüşü 45 min nəfərin etiraz nümayişi ilə qarşılandı. Avropa Həmkarlar İttifaqları Konfederasiyası (AHİK) tərəfindən təşkil edilmiş mitinqdə qitənin 39 ölkəsindən 54 həmkarlar ittifaqı milli mərkəzinin nümayəndələri təmsil olunurdu. Paytaxtın "Konqresni" adlanan mərkəzi meydanında qurulan tribunadan müxtəlif ölkələrin həmkarlar ittifaqları liderlərinin çıxışı dinlənildi. Mitinq Sloveniya musiqiçilərinin ifaları ilə başa çatdı.
Etiraz aksiyasında AHİK-in baş katibi Con Monks çıxış edərək, "Biz ona görə buradayıq ki, avropalı işçilərin əməkhaqlarının artırılmasına ehtiyac var. Maaşlarımızın gündən-günə azalmasına dözə bilmərik. Super zənginlərin, qumarxana kapitalistlərinin sərvətlərimizi əlimizdən alan sistemlərini qəbul etmək fikrimiz yoxdur" - dedi. C. Monks Avropa həmkarlar ittifaqlarının işçilərin ədalətli və davamlı olaraq əməkhaqqı artımını istədiyini qeyd etdi.
Tədbirdə çıxış edən Sloveniya Müstəqil Həmkarlar İttifaqları Birliyinin prezidenti Dusan Semolic demişdir: "Bizim iqtisadiyyatımız sürətlə inkişaf edir. Lakin onunla bərabər inflyasiya da böyüyür. İşçilərin vəziyyəti gündən- günə pisləşir. İşəgötürənlər özləri qazandıqları halda, işçilərin əməkhaqlarını artırmaq istəmirlər".
Natiq daha sonra qeyd etmişdir: "Sloveniya və Avropa işçiləri buna layiq deyil. Aşağı əməkhaqqı aşağı pensiya deməkdir, bu da insanlıqdan çox uzaqdır. İşçilər müəssisə üçün yaratdıqları mənfəətdən pay almaq hüququna sahibdir".
Nümayişin təşkilatçıları bu yolla maliyyə nazirlərinin diqqətini işçilərin əməkhaqqı məsələsinə yönəltmək niyyətində olduqlarını bildirdilər.


Maaşların artımı tələbi

Rusiya

Bir neçə gün əvvəl Sverdlovsk vilayətində "Sevuralboksitrud" (Subr) Açıq Səhmdar Cəmiyyətinin mədən işçiləri tətil keçirmişlər. Onların bir hissəsi müddətsiz aclıq elan etmişdir.
Mədən İşçiləri Müstəqil Həmkarlar İttifaqının sədr müavini Aleksandr Anisimovun "İnterfaks" agentliyinə verdiyi məlumata görə, aksiyaya 66 nəfər qoşulmuşdur. O, demişdir ki, aclıq elan etmiş fəhlələr hazırda "Krasnaya Şapoçka" mədəninin inzibati binasındadırlar.
Anisimovun sözlərinə görə, aksiya iştirakçıları təşkilatın müdiriyyətindən irəli sürdükləri tələblərin təsdiqlənməsi üçün "Kalinskaya" mədənində işçilərin ümumi yığıncağının keçirilməsini tələb edirlər.
Bir müddət əvvəl verilən məlumata görə, "Krasnaya Şapoçka" mədənində işləyən 100-dən çox fəhlə mədəndən çıxmaqdan imtina etmiş və tətilə başlamışdılar. Mədən işçiləri hazırkı mükafatlandırmanı saxlamaqla yanaşı, tarif göstəricilərinin 50% artırılmasını, şənbə gününün iş qrafikindən çıxarılmasını, kollektiv müqavilə bağlanmasını və "Qlubokaya Çeremuxovskaya" mədəninin tikintisi üçün maliyyə vəsaitinin ayrılmasını tələb edirdilər. Tətil təxminən 10 sutka davam etmişdir. Daha sonra aksiya iştirakçıları mədəndən yuxarı qalxmışlar.
Təşkil olunmuş əmək qrupu, əmək münasibətlərinin nizama salınması ilə əlaqədar onlarla danışıq aparmış, lakin tərəflər heç bir kompromisə gələ bilməmişlər.
Bu aksiya "Subr"da olan ilk tətil deyil. Xatırladırıq ki, 2003-cü ilin payızında 500-dən artıq işçi 6 gün mədəndən çıxmaqdan imtina etmişdilər. O zaman müdiriyyət qarşısında maaşlarının 1000 ABŞ dollarına qədər artırılması və iş normasının azaldılması tələbini qoymuşdular. Barışıq komissiyası ilə müqavilə bağlandıqdan sonra mədən işçiləri tətili dayandırmışdılar.

çap üçün verisya