Fevral ayının 11-də Azərbaycan Təhsil İşçiləri Azad Həmkarlar İttifaqı Respublika Komitəsi Rəyasət Heyətinin iclası keçirilmişdir. ATİAHİ RK-nın sədri, millət vəkili Səttar Mehbalıyevin sədrliyi ilə keçirilən iclasda Rəyasət Heyətinin gündəliyi səsə qoyularaq təsdiq olunmuşdur. Sonra gündəlikdə duran məsələlərlə bağlı məruzələr dinlənilmişdir.

Əvvəlcə RK-nın sədr müavini Şaiq Əsgərov ötən il ATİAHİ RK-da və üzv təşkilatlarda ittifaq üzvlərinin qəbulu, ərizə və şikayətlərinə baxılmasının vəziyyəti barədə məruzə etmişdir.
Məruzəçi bildirmişdir ki, 2009-cu il ərzində Azərbaycan Təhsil İşçiləri Azad Həmkarlar İttifaqı Respublika Komitəsinə xidmətdə olan təşkilatlarda çalışan işçilərdən və təhsil alan gənclərdən ümumilikdə 625 ərizə, şikayət və müraciətlər daxil olmuşdur.
ATİAHİ RK-ya daxil olan ərizə və şikayətləri araşdırarkən müəyyən olunmuşdur ki, müraciətlər beş məsələ ilə-sosial-iqtisadi hüquqların müdafiəsi, əmək qanunvericiliyi, yollayış, maddi yardım, təşkilati və digər məsələlərlə bağlı olmuşdur.
İttifaq üzvlərindən daxil olmuş ərizə, şikayət, təklif və müraciətlərə vaxtında və düzgün baxılması, təlimata uyğun həll edilməsi RK-nın daim diqqət mərkəzindədir.
Lakin bəzi şəhər, rayon və ali məktəb həmkarlar ittifaqı komitələrində bu məsələyə laqeyd yanaşmışlar.
Belə ki, Respublika Komitəsi rəhbərliyinin imzası ilə 2009-cu ilin dekabrın 24-də bütün üzv təşkilatlara Rəyasət Heyətində müzakirə etmək üçün ittifaq üzvlərinin qəbulu, ərizə və şikayətlərinə baxılmasının vəziyyəti barədə 2010-cu ilin yanvarın 15-dək məlumat vermələri xahiş edilmişdir. Ağstafa, Gədəbəy, Qəbələ rayon komitələri, Azərbaycan Müəllimlər İnstitutunun Gəncə filialı, Lənkəran Dövlət Universiteti, Azərbaycan İctimai Siyasi Universiteti, Azərbaycan Beynəlxalq Universiteti həmkarlar ittifaqı komitələri cavab yazmağı tamamilə unutmuşlar. Qəbələ rayon komitəsinə isə bir neçə dəfə telefonla zəng olunub deyilsə də, heç bir məlumat almaq mümkün olmamışdır. Mingəçevir, Lənkəran və Gəncə şəhərləri, Qaradağ, Ağdaş, Ucar, Balakən, Oğuz, Qusar, Suraxanı, Lerik, Xocalı rayon komitələri, Azərbaycan Dövlət Mədəniyyət və İncəsənət Universiteti, Azərbaycan Texnologiya Universiteti, Azərbaycan Müəllimlər İnstitutunun Ağcabədi filialı, Bakı Avrasiya Universiteti, Azərbaycan Universiteti həmkarlar ittifaqı komitələri üzvlərinin qəbulu, ərizə və şikayətlərinin baxılmasının real vəziyyətinə uyğun gəlməyən qeyri-müəyyən cavablar və rəqəmlər yazmışlar. 27 sahə həmkarlar ittifaqı arasında Azərbaycan Təhsil İşçiləri Azad Həmkarlar İttifaqının üzvləri intellektual səviyyələrinə görə xüsusilə fərqlənməlidir. Ən azından ona görə ki, onlar təhsil işçiləridir və təhsil verənlərdir. Lakin bizim aldığımız məktublarda, elə anlaşılmazlıqlar, elə ifadələr olur ki, buna ancaq təəssüflənmək olar.
Bu məsələyə ATİAHİ RK sədri Səttar Mehbalıyev öz münasibətini bildirərək dedi ki, Azərbaycan xalqına güvənən, ona arxalanan, onun rifahı uğrunda fədakarlıqla çalışan ölkə Prezidenti hər bir vətəndaşın qayğısını öz qayğısı hesab edərək hər yerdə əhali ilə görüşərkən ilk növbədə onların problemlərini həll edir. Cənab İlham Əliyevin ən yüksək vəzifəli rəhbər işçidən tutmuş sıravi dövlət qulluqçusuna qədər hər bir məmurdan əsas tələbi budur ki, vətəndaşların bütün müraciətlərinə diqqət və qayğı ilə yanaşsınlar, onların haqlı, icrası mümkün olan tələblərini yerinə yetirsinlər. Konfederasiyanın və onun sahə təşkilatlarının hər bir vəzifəli şəxsi bu mühüm amili heç vaxt unutmamalıdırlar.
Daha sonra ATİAHİ RK-nın katibi, maliyyə şöbəsinin müdiri Mübariz Eyvazovun ittifaq üzvlərinin sanatoriya-kurort və istirahət evlərinə yollayışlarla təmin edilməsi sahəsində görülmüş işlər barədə məruzəsi dinlənildi.
İclasda cari məsələlər də müzakirə edilmişdir. Müzakirələr zamanı Azərbaycan Təhsil İşçiləri Azad Həmkarlar İttifaqının 90 illik yubileyinin, ümummilli lider Heydər Əliyevin anadan olmasının 87-ci ildönümünə həsr olunmuş ali məktəb tələbələrinin bədii yaradıcılıq festivalının, Azərbaycan Respublikası Təhsil Nazirliyi (TN) ATİAHİ RK ilə birgə ilin ən yaxşı məktəbdənkənar müəssisəsi nominasiyası üzrə respublika müsabiqəsinin, Azərbaycan Respublikası TN ilə ATİAHİ RK birgə Respublika ümumtəhsil məktəblərinin müəllimləri arasında şahmat yarışının keçirilməsi; Azərbaycan Respublikası TN ilə ATİAHİ RK-nın 2010-cu il üçün birgə tədbirlər planının təsdiqi, Azərbaycan TN ilə ATİAHİ RK arasında 2010-2012-ci illər üçün bağlanacaq Kollektiv Saziş layihəsinin hazırlanması ilə bağlı görüləcək işlər, ali məktəb tələbələrinə ATİAHİ RK-nin adlı təqaüdünün təyin edilməsi barədə məsələlərə baxılmışdır.
Rəyasət Heyətinin iclasından sonra Azərbaycan Təhsil İşçiləri Azad Həmkarlar İttifaqı Respublika Komitəsinin VIII Məclisi toplanmışdır. Məclisdə ATİAHİ RK-nın Məclis üzvləri və Rəyasət Heyəti üzvləri arasında qismən dəyişiklik edilməsi barədə; "AHİK-in üzv təşkilatlarında hesabat-seçki kampaniyalarının vahid müddətdə keçirilməsi barədə" AHİK-in 28 dekabr 2009-cu il tarixli II Məclisinin qərarının Azərbaycan Təhsil İşçiləri Azad Həmkarlar İttifaqının üzv təşkilatlarında yerinə yetirilməsi barədə məsələlər müzakirə olundu.
Sonda sədrin müavini Mirzə Cəfərzadənin Məclis iştirakçılarına üzv təşkilatlarından daxil olmuş statistik hesabatlar barədə məlumatında qeyd olundu ki, 2010-cu ilin yanvar ayının 1-nə dək ittifaq üzvlərinin sayı ötən ilə nisbətən 13988 nəfər artmışdır. Özəl təhsil müəssisələrində 1100 nəfər ittifaqa cəlb olunmuşdur.
Həmkarlar İttifaqlarının fəaliyyəti barədə ümumi illik statistik hesabatlar hər il yanvar ayının 20-dək Respublika Komitəsinə təqdim olunmalıdır.
Ümumi illik hesabat hər bir təşkilatın bir ildə gördüyü işlər barədə rəsmi məlumat olduğu üçün ryon, şəhər və rayon hüquqlu təşkilatlar üzərlərinə düşən məsuliyyəti düzgün başa düşməli, hesabatların tərtibində və yuxarı orqana vaxtında təqdim olunmasında daha diqqətli və məsuliyyətli olmalıdırlar.
Ə. İBADOV.

çap üçün verisya