Ümummilli lider Heydər Əliyevin anadan olmasının 87-ci ildönümü münasibətilə Bakı şəhəri ümumtəhsil məktəbləri müəllimlərinin iştirakı ilə "İstedadlı şagirdlərin potensial imkanlarının inkişaf etdirilməsinin optimal yolları" mövzusunda elmi-metodik konfrans keçirilmişdir. Azərbaycan Təhsil İşçiləri Azad Həmkarlar İttifaqı Respublika Komitəsi və Bakı Şəhəri üzrə Təhsil İdarəsinin birgə qərarı ilə təşkil olunan elmi-metodik konfransın yekun toplantısı may ayının 6-da AHİK-in böyük akt zalında baş tutmuşdur. Tədbirdə təhsil naziri Misir Mərdanov, ATİAHİ Respublika Komitəsinin sədri, millət vəkili Səttar Mehbalıyev, Bakı Şəhəri üzrə Təhsil İdarəsinin müdiri Nailə Rzaquliyeva, Bakı şəhərindəki orta ümumtəhsil məktəblərinin direktorları və müəllimlər iştirak etmişlər.
Tədbiri giriş sözü ilə Bakı Şəhəri üzrə Təhsil İdarəsinin müdiri Nailə Rzaquliyeva açaraq qeyd etmişdir ki, bütün şüurlu fəaliyyətini doğma Azərbaycanımızın inkişafına və çiçəklənməsinə həsr etmiş ulu öndər müəllimlərin əməyini yüksək qiymətləndirmiş, təhsilimizin inkişafının qayğısına qalmışdır: "Təhsili inkişafın başlıca şərti adlandıran ümummilli lider deyirdi: "Həyatın bütün sahələrində əldə olunmuş nailiyyətlərin başında duran, onun əsasını təşkil edən, kökü olan məktəbdir, təhsildir, müəllimdir". Ulu öndər milli sərvətimiz olan istedadların qayğısına qalmaq, onların istedadını inkişaf etdirmək sahəsində bizim üçün böyük miras qoymuşdur. İstedadlı uşaqları sevən, onların hər uğuruna sevinən, doğma övladları kimi bağrına basan dahi şəxsiyyət demişdir: "Bugünkü kiçik istedadlar, amma çox zərif, insanı heyrətə gətirən, insanı sevindirən o istedad nümunələri gələcəyin qönçələridir. Bu qönçələr açılacaqdır. Bu qönçələr gözəl görünəcəkdir və Azərbaycanı gülüzarlığa döndərəcəkdir". N.Rzaquliyeva qeyd etmişdir ki, təməli ümummilli lider Heydər Əliyev tərəfindən qoyulan istedadlara diqqət və qayğı bu gün də ən yüksək səviyyədə davam etdirilməkdədir: "Azərbaycan Respublikasının Prezidenti İlham Əliyevin 17 aprel 2006-cı il tarixli sərəncamı ilə təsdiq edilmiş "Xüsusi istedada malik olan uşaqların, gənclərin yaradıcılıq potensialının inkişafı üzrə Dövlət Proqramı" bu mənada müstəsna əhəmiyyət daşıyır. Proqramın icrası sayəsində görülən işlərin sayının və səviyyəsinin artması, hər dəfə yeni istedadların müəyyən edilməsi bizi çox sevindirir. Heydər Əliyev Fondunun, onun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın istedadlara diqqət və qayğısı da xüsusi qeyd edilməlidir".
İstedadların üzə çıxarılaraq inkişaf etdirilməsində müəllimin rolunun böyük olduğunu qeyd edən N.Rzaquliyeva bildirmişdir ki, müəllimlərin şagirdlərlə işləmək metodları da fərqlidir. Bu mənada elmi-praktiki konfransın keçirilməsi əhəmiyyətlidir: "Müsabiqədə qabaqcıl və yaradıcı müəllimlər iştirak etmişlər. Təqdim olunmuş məqalələr ekspertlər tərəfindən qiymətləndirilmiş, 65 məqalə kitab halında çap olunmuşdur. Bundan başqa, məqaləsi ekspertlər tərəfindən yüksək qiymətləndirilən müəllimlərdən 21 nəfər mükafata və Fəxri fərmana layiq görülmüşdür".
Konfransda bir neçə müəllimin məqaləsi dinlənildikdən sonra Azərbaycan Təhsil İşçiləri Azad Həmkarlar İttifaqı Respublika Komitəsinin sədri, millət vəkili Səttar Mehbalıyev çıxış etmişdir. Millət vəkili konfransın ümummilli lider Heydər Əliyevin anadan olmasının 87-ci ildönümünə həsr olunduğunu vurğulayaraq qeyd etmişdir ki, Azərbaycan xalqı durduqca Heydər Əliyev də yaşayacaq. Çünki bu dövlətin banisi məhz ümummilli lider Heydər Əliyevdir: "Bu gün Azərbaycan dövləti sürətlə inkişaf edir. Bu, əsası ümummilli lider Heydər Əliyev tərəfindən qoyulan və Prezident İlham Əliyev tərəfindən uğurla davam etdirilən inkişaf strategiyasının nəticəsidir". S.Mehbalıyev ümummilli liderin müəllimlərə hər zaman diqqət və qayğı göstərdiyini bildirərək söyləmişdir ki, hər kəs əldə etdiyi uğurlara görə müəlliminə borcludur: "Müəllimlər ziyalılığın zirvəsində dayanan insanlardır. Onlar millətin gələcəyinin təminatçılarıdır. Müəllim nə qədər savadlı olacaqsa, Azərbaycan gənci bir o qədər savadlı, istedadlı olacaq, dövlətimiz bir o qədər inkişaf edəcək. Mən bir daha müəllimlər qarşısında baş əyib deyirəm çox sağ olun ki, siz varsınız".
Konfransda çıxış edən təhsil naziri Misir Mərdanov isə qeyd etmişdir ki, dünyanın ayrı-ayrı ölkələrini idarəedən, dövlətləri və millətləri qabağa aparan istedadlı və qabiliyyətli insanlardır. Ona görə də ağıllı insanlar həmişə istedadların vaxtında müəyyən olunmasında maraqlı olmuşlar: "İstedadlı insanların vaxtında müəyyən olunması vacib amildir. Ola bilər ki, müəllim o istedadı üzə çıxara bilməsin. Bunun üçün məktəblərdə psixoloq kadrlara ehtiyac var. Həmçinin istedadların üzə çıxarılması üçün müəllim-valideyn münasibətləri qurulmalıdır. Təəssüf ki, əksər hallarda müəllimlə valideynin görüşü bizim cəmiyyətdə mənfi qiymətləndirilir. Amma müəllim, valideyn və məktəb vəhdət təşkil etməlidir".
İstedadların üzə çıxarılması işində ATİAHİ Respublika Komitəsinin fəaliyyətini təqdir edən nazir vurğulamışdır ki, birgə tədbirlər bundan sonra da davam etdiriləcək, Azərbaycan təhsilinin inkişafına yönəlmiş işlər həyata keçiriləcək.
Tədbirin sonunda M.Mərdanov və S.Mehbalıyev qaliblərə hədiyyə və Fəxri fərmanlar təqdim etmişlər.

çap üçün verisya