Yəqin ki, bir qədər sonra barəsində danışacağımız tədbiri Ermənistandan gəlmiş xanım heç də xoş təəssüratlarla xatırlamayacaq. Əvvəla, ona görə ki, 7 ölkənin onlarla təmsilçisinin toplaşdığı məclisdə Azərbaycanın uğurları qarşısında Ermənistanın məzlum vəziyyətini etiraf etmişdi. İkincisi, ölkəsinin işğalçılıq siyasətinə görə ətrafdakıların qınaq obyektinə çevrilmişdi. Söhbət Dövlət İdarələri İctimai Xidmət İşçiləri Həmkarlar İttifaqı Beynəlxalq Federasiyasının mayın 11-13-də Kiyevdə keçirilmiş Şura iclasının ziyafət mərasimində baş vermiş insidentdən gedir.

Azərbaycan Dövlət İdarələri və İctimai Xidmət İşçiləri Həmkarlar İttifaqı Respublika Komitəsinin sədri Hikmət Osmanov ziyafətdə qısa nitq söyləmiş və Ukraynanın oxşar həmkarlar ittifaqı mərkəzinin 20 nəfərlik nümayəndə heyətini Bakıya dəvət etmişdi. Hikmət müəllimdən sonra söz istəyən ermənistanlı xanım təəssüflə demişdi ki, mən istərdim həmkarlar ittifaqına Azərbaycanda olan münasibət bizdə də olsun. Təmsilçisi olduğum təşkilat ölkəmizə qonaq dəvət etmək imkanında deyil. Maliyyə cəhətdən korluq çəkirik. Dövlət, hökumət məmurları bizi danışıq aparmaq üçün belə yaxına buraxmırlar. Kütlə içərisində nüfuzumuz aşağı səviyyədədir. Sıralarımız get-gedə seyrəlir. Təkcə son 2 ildə üzvlərimizin sayı 4 min nəfər azalıb. Başqa sözlə, 18 min nəfərdən 14 min nəfərə düşüb.
Yerdən haqlı olaraq soruşurlar: Azərbaycanı yaxşı mənada nümunə gətirirsiniz. Bəs niyə Qarabağı uzun illərdir problemə döndərmisiniz?
Xanım ölkəmizin iqtisadi, sosial yüksəlişinə qibtəsini, bəlkə də paxıllığını gizlədə bilməsə də suala erməni xisləti ilə cavab verdi: Dağlıq Qarabağ müstəqil dövlətdir, bizim onların əvəzinə danışmaq səlahiyyətimiz yoxdur.
"Əlbəttə, mən bir Azərbaycan övladı olaraq erməni həmkarımızın beynəlxalq səviyyədə söylədiyi yalanını ifşa etmədən vətənə dönə bilməzdim. Yenidən söz alıb danışdım. Əsl həqiqəti qısa da olsa dəlillərlə məclis üzvlərinə çatdırdım. Daha sonra dedim ki, hörmətli Prezidentimiz İlham Əliyev dəfələrlə dünya ictimaiyyətinin diqqətinə çatdırıb ki, əgər danışıqlar nəticə verməsə biz torpaqlarımızı güc yolu ilə azad edəcəyik. Onu da nəzərə çatdırdım ki, torpaqlarımız uğrunda müharibə başlasa xalqımız, bütün həmkarlar ittifaqı üzvləri, o cümlədən mən özüm son damla qanımıza qədər vuruşacağıq", - deyə Hikmət müəllim bildirdi.
H.Osmanov dedi ki, məni ən çox sevindirən o oldu ki, bu insidentdən sonra bir neçə ölkənin nümayəndələri otağıma gəlib mənim haqlı olduğumu deməyi özlərinə borc bildiklərini söylədilər. Bir daha müşahidə etdim ki, artıq dünya ictimaiyyətinin Dağlıq Qarabağ münaqişəsinə münasibəti Azərbaycanın xeyrinə dəyişməkdədir.
Tədbirin mövzusu ilə əlaqəsi olmayan bu hadisəni nisbətən belə geniş yazmağımız bəlkə də bəzi oxucularımıza anlaşılmaz görünəcək. Amma biz bunu lazım bildik. Ona görə ki, Vətəndən kənara çıxan hər kəs, peşəsindən, səfərinin məqsədindən asılı olmayaraq, ilk növbədə özünü Azərbaycan vətəndaşı kimi aparmalıdır. Azərbaycanın mənafeyini hər şeydən uca tutmalıdır. Biz Hikmət müəllimin timsalında bunu demək istədik.
İndi də qayıdaq Şuranın iclasına. İldə iki dəfə baş tutan bu iclasların əsas məqsədi təcrübə mübadiləsi aparmaq, bir-birinin problemlərini dinləmək, problemlərin aradan qaldırılmasında əlbir fəaliyyət göstərməkdən və sairədən ibarətdir. Sözügedən iclasda cari məsələlərə baxıldı.
Ən çox maraq doğuran məsələ üzv təşkilatların üzləşdikləri problemlər barədə oldu. Bu məsələ ətrafında edilən çıxışlardan məlum oldu ki, üzv təşkilatlarda problemlər əsasən eynidir. Hökumət-həmkarlar ittifaqı, işəgötürənlər-həmkarlar ittifaqı münasibətləri ürəkaçan deyil. Tarif sazişləri, kollektiv müqavilələr ya bağlanmır, ya da istənilən məzmunda olmur. Həmkarlar ittifaqının fəaliyyətinə məhdudiyyətlər qoyulur, üzvlərinin, üzv təşkilatlarının sayında artım əvəzinə, azalma prosesi gedir…
Təbii ki, bu fonda Azərbaycan nümayəndəsinin çıxışı böyük maraq doğurdu. Hikmət müəllim çıxışında bildirdi ki, Azərbaycan həmkarlar ittifaqlarının elə ciddi problemləri yoxdur. Şəxsən ölkə başçısı respublikamızda gedən demokratik, sosial proseslərdə həmkarlar ittifaqının iştirakında maraqlıdır. Təşkilatımız bu missiyanı ləyaqətlə yerinə yetirməsi üçün qayğısını əsirgəmir. Azərbaycan həmkarlar ittifaqlarının sədri cənab Səttar Mehbalıyev parlamentin üzvüdür. Bir çox sosialyönümlü qanun layihəsinin təşəbbüskarıdır. Elə son illərdə Hİ liderinin təklifi ilə Əmək Məcəlləsinə onlarla əlavə və dəyişiklik edilmişdir. Həmkarlar ittifaqları xalq arasında da böyük nüfuza malikdir. Sıralarımız get-gedə genişlənməkdədir. Təkcə mənim rəhbəri olduğum qurumun üzvlərinin sayı son 3 ildə 3 min nəfər artmışdır.
Baş idarələrlə, müəssisə və təşkilatların demək olar ki, hamısı ilə tarif sazişləri, kollektiv müqavilələr bağlanıb.
Əlbəttə, bütün bunlar asan başa gəlmir. Biz bu uğurlara zəngin təcrübəmiz və əzmkarlığımız nəticəsində nail oluruq.
Şuranın iclası üzv təşkilatlar tərəfindən faydalı tədbir kimi dəyərləndirildi.

"ÜlfƏt"

çap üçün verisya