- Bizim üçün hər bir nəticə olduqca qiymətlidir. Çünki onu çox çətinliklə qazanırıq", - deyə İnşaat Kompleksi İşçiləri Müstəqil Həmkarlar İttifaqı Respublika Komitəsi Təşkilat Şöbəsinin müdiri Seyfəddin Ağayev bildirdi. Söhbətimizin sonrakı məqamlarında aydın oldu ki, doğrudan da RK üçün heç nə asan başa gəlmir. Xüsusilə sıraların genişləndirilməsi.

İndi biz azad cəmiyyətdə yaşayırıq. İnsanlar ictimai qurumlara gözüyumulu, ucdantutma, necə deyərlər, itirəcəklərini, qazanacaqlarını ölçüb-biçmədən üzv yazılmırlar. Üzvlərin cəlb edilməsində isə başqa bir problem həmkarlar ittifaqı haqqında sovet dövründən qalma münasibətin hələ də beyinlərdən tam silinməməsidir. Həmsöhbətim "Biz bu baryerləri aşırıq, çətinliklə olsa da" , - dedi. O, "Akkord" Şirkətlər Qrupunda həmkarlar ittifaqı təşkilatı yaradılması zamanı RK-nın nümayiş etdirdiyi səbrdən, inadkarlıqdan, təbliğatçılıq bacarığından danışdı. Dedi ki, hazırda bu şirkətdə 3 minə yaxın üzvümüz var. Hamısını da adbaad tanıyırıq. Ad günlərini əzbərdən bilirik. Seyfəddin müəllim həm də burada Birləşmiş Həmkarlar İttifaqının sədridir. Xeyirdə, şərdə işçilərlə bir yerdə olmağı vəzifə borcu sayır. Komitədə üzvlərin hər hansı problemlə bağlı ərizələri həll edilənə qədər araşdırılır. Bu işdə təşkilatın arxa-dayağı, gücü ədalət, məsuliyyət və müdiriyyətlə qarşılıqlı iş birliyi qurmaq cəhdləridir.
Yaxın günlərdə sahə Hİ Respublika Komitəsinin xidmət dairəsinə daha bir neçə kollektiv qoşuldu. Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin 10 qurumunda həmkarlar ittifaqı komitəsi yaradıldı. Bu da əlavə təxminən 1100 nəfər üzv deməkdir.
Bu təşkilatların yaranması prosesinə hələ 1998-ci ildə başlanılmışdı. RK-nın məsul işçiləri kollektivlərin rəhbərləri ilə on dəfələrlə görüşmüş, işçilərin qarşısında çıxış etmişlər. İlk günlər, açığı söhbət alınmırdı. İmtina get-gedə tərəddüdlərlə əvəz olundu. Nəhayət, uzun danışıqlardan sonra razılıq əldə edildi. Müdiriyyət yəqin etdi ki, kollektivin bir çox sosial problemlərinin aradan qaldırılmasında həmkarlar ittifaqı yaxın köməkçisi olacaq. Əmək şəraitinin yaxşılaşmasına nəzarəti həyata keçirəcək. Başlıcası isə işəgötürənlə işçi arasında anlaşılmazlıq yaranarsa vasitəçi rolunu həmkarlar ittifaqı komitəsi öz üzərinə götürəcək. İşçilərin də ödəyəcəkləri üzvlük haqqı müqabilində qazanacaqları qat-qat artıq olacaqdı. Həmkarlar ittifaqının işəgötürənlərlə bağlayacağı kollektiv müqavilələr əmək, sosial hüquqlarını genişləndirəcəkdi. Əməklərinin mühafizəsinə, iş şəraitinin yaxşılaşdırılmasına güclü nəzarət mexanizminə nail olacaqdılar. Müdiriyyətlə artıq fərdi qaydada yox, təşkilatlanmış şəkildə danışıq aparacaqdılar. Üstəlik sağlamlıq, istirahət ocaqlarına ucuz qiymətlə getmək imkanları yaranacaqdı.
S. Ağayev deyir ki, bu komitələrdə təsis yığıncaqlarında böyük məsuliyyət və fəallıq müşahidə etdik. Hiss etdik ki, apardığımız təbliğat, payladığımız metodiki vəsait işçilərdə həmkarlar ittifaqının əsas missiyası haqqında dolğun təsəvvür yaradıb. Komitələrin sədri vəzifələrinə ən inanılmış, kifayət qədər təşkilatçılıq bacarığı olan insanların namizədliyini irəli sürüb təsdiqlədilər.
Seyfəddin müəllim onu da qeyd etməyi vacib saydı ki, təşkilat liderləri arasında təsadüfdənmi, ya bilərəkdənmi 70 faizə qədəri qadındır. 30 faizdən çoxu gənc, perspektivli kadrlardır.
Dediklərimdən elə çıxmasın ki, biz insanlarda həmkarlar ittifaqına meyil oyatmaq üçün yalnız danışıqlar, təbliğat aparırıq. Yox, təşkilatımızın insanların həyatında mühüm əhəmiyyətə malik olduğunu gündəlik əməli fəaliyyətimizlə də sübut edirik", - deyə Təşkilat Şöbəsinin müdiri söhbətin mövzusunu başqa məsələlərə yönəltdi. Bildirdi ki, RK kadrların ixtisas təhsilini daim diqqət mərkəzində saxlayır. Hər il ixtisasartırma kurslarına beynəlxalq, respublika, bölgə səviyyəli seminarlara onlarla komitə sədri və fəal göndərilir. Əməyin mühafizəsinə nəzarəti gücləndirmək məqsədi ilə müxtəlif tədbirlər həyata keçirilir. Belə tədbirlərdən biri də baxış müsabiqələridir. RK-nın təşkil etdiyi belə baxış-müsabiqələrin sonuncusu bu yaxınlarda başa çatmışdır.
Baxış-müsabiqədə qalib gəlmiş müəssisələrə və ayrı-ayrı işçilərə RK-nın təsis etdiyi qiymətli hədiyyələr və pul mükafatları verilmişdir.
Seyfəddin müəllim deyir ki, nə qədər uğur qazansaq da hər gün özü ilə yeni problemlər, yeni vəzifələr gətirir. Təvazökarlıqdan kənar olsa da deyim ki, kollektivimiz bu problemlərin, vəzifələrin öhdəsindən gəlmək iqtidarındadır.

çap üçün verisya