Cəmiyyətimizin əsas vəzifəsi elektrik enerjisinin ötürülməsi və istehlakçıları fasiləsiz, etibarlı və keyfiyyətli elektrik enerjisi ilə təmin etməkdən ibarətdir. Təbii ki, belə mürəkkəb sistemi idarə edən kollektivin hər bir üzvünün maddi, mənəvi, sosial-iqtisadi, məişət, istirahət, sağlamlıq qayğıları həm rəhbərlik, həm də həmkarlar ittifaqı komitəsinin diqqətindən kənarda qala bilməz.

Bu diqqətin real nəticələr verməsindən ötrü HİK öz işinə yaradıcılıqla yanaşır, səmərəli tədbirlər həyata keçirir.
Məsələn, həmkarlar ittifaqı komitəsində fəaliyyət sahələri üzrə komissiyalar yaradılmışdır. Komissiyaların tərkibinə bütün struktur bölmələrindən fəallar cəlb edilmişdir. Onların işi barədə HİK-də daim dinlənilmə aparılır. Həmkarlar İttifaqı Komitəsinin işlərinə müəssisənin ən aktiv qüvvələri cəlb olunur və onların sərbəst fəaliyyəti üçün lazımi şərait yaradılır. Müxtəlif sahələrdə sex komitələri fəaliyyət göstərir. Bu qurum həmkarlar təşkilatını təmsil edən nümayəndələr hesabına formalaşıb. İşçilər onları maraqlandıran məsələlər barədə bu numayəndələrə müraciət edirlər.
Böyük sevinc hissi ilə qeyd etmək istəyirəm ki, kollektiv müqavilənin öhdəlikləri vaxtında yerinə yetirilir. Nəzərdə tutulmuş bütün sosial güzəşt, müavinət, mükafat və maddi köməkliklər tam ödənilir. Kollektiv müqaviləyə əsasən, əməkhaqqı fonduna aid edilməyən sosial xarakterli ödəmələr 2008-ci ildə 100422,0 manat, 2009-cu ildə isə artırılaraq 139717,0 manat olmuşdur. Qeyd etməliyəm ki, əməyin nəticələrinə görə verilən mükafatlar, maddi köməkliklər işçilər arasında sosial-ədalət prinsipinin gözlənilməsi məqsədi ilə müəssisənin rəhbərliyi və HİK-i arasında razılaşdırılma əsasında struktur bölmələri üzrə aparılır.
Komitənin fəaliyyət istiqamətinin ən vacibi işçilərin sosial hüquqlarının əmək və istehsal intizamının qorunması, möhkəmləndirilməsidir. İşçilərin hər bir müraciətinə diqqət və həssaslıqla yanaşılır, dərindən öyrənilir, konkret təkliflərlə rəhbərliyə müraciət edilir. Demək olar ki, bütün hallarda müraciətlər qanun çərçivəsində müsbət həllini tapır. Mütəmadi olaraq iş yerlərinə reydlər keçirilir, geniş izahatlar aparılır, profilaktik tədbirlər görülür. Görülən işlərin nəticəsidir ki, son illər əmək və istehsalat intizamının, işçilərin sosial hüquqlarının pozulma halları minimuma enmişdir.
Həmkarlar İttifaqı Komitəsi işçilərin iş şəraitinin yaxşılaşdırılması, əməyin mühafizəsi, texniki-təhlükəsizlik qaydalarının yerinə yetirilməsi, avadanlıq, mexanizm və qurguların düzgün istismar edilməsi kimi sahələrə ciddi nəzarət edir. Belə ki, zərərli və ağır iş şəraitində işləyənlər tibbi müayinədən keçirilmiş, struktur bölmələrə tibbi çantalar paylanmış, bütün iş yerləri attestasiya edilmiş, sanitar qovşaqları təmir olunmuşdur.
Hər ay komitənin iştirakı ilə texniki- təhlükəsizlik günü keçirilir. Aşkar edilmiş çatışmamazlıqlar növbəti gün rəhbərliklə müzakirə edilərək qüsurların aradan qaldırılması üçün məsul şəxslərə müvafiq göstərişlər verilir.
Hər il bizim təşkilatçılığımız ilə Energetiklər günü, dövlət, Milli və dini bayramlar qeyd edilir.
İşçilərin idmanla məşğul olmaları üçün şəbəkədə xüsusi yer ayrılmışdır, burada tennis, dama, şahmat və nərd oyunları həvəskarları asudə vaxtlarında məşğul olurlar. Özünə güvənənlər hətta cəmiyyət üzrə yarışlara qoşulur. Təbii ki, qalib gəldikdə qiymətli hədiyyə ilə mükafatlandırılır.
Mütəmadi olaraq respublikanın səfalı guşələrinə, tarixi bölgələrinə gəzintilər təşkil edirik.
İşçilərin istəklərinə uygun olaraq teatr tamaşalarına baxış təşkil olunur.
Şəbəkədə çalışan şəhid ailələri, Qarabağ müharibəsi iştirakçılarına və kollektiv müqaviləyə uyğun olaraq işəgötürən tərəfindən maddi-mənəvi köməkliklər edilir.
İlk təşkilatın maddi-texniki bazası daim möhkəmləndirilir ki, bu da gündəlik fəaliyyətinin genişlənməsinə müsbət təsirini göstərir.

Eldar Ocaqquliyev,
"Abşeron Yüksək Gərginlikli
Elektrik Şəbəkəsi" MMC-nin
Həmkarlar İttifaqı
Komitəsinin sədri.

çap üçün verisya