- Hörmətli tərəfdaşlar!
Hörmətli konfrans iştirakçıları, xanımlar və cənablar!

Əsası ümummilli lider Heydər Əliyev tərəfindən qoyulan milli sosial-iqtisadi inkişaf modeli Azərbaycan Respublikası Prezidenti cənab İlham Əliyevin rəhbərliyi altında uğurla həyata keçirilir. Müasir Azərbaycanın inkişafı və vətəndaşların rifah halının yüksəldilməsi istiqamətində düşünülmüş, genişmiqyaslı işlər görülür. Sosial müdafiə sistemi keyfiyyətcə daim, dinamik şəkildə yeniləşir.
Dövlətimizin sosial-iqtisadi siyasətinin reallaşdırılmasında tərəfdaşlarımız olan hökumətlə, Sahibkarlar (İşəgötürənlər) Təşkilatlarının Milli Konfederasiyası ilə yanaşı həmkarlar ittifaqlarının da rolu az deyil. Bu üç təşkilat arasında bağlanan Baş Kollektiv Sazişdə ölkənin sosial-iqtisadi siyasəti və sosial əmək münasibətləri üzrə razılaşdırılmış mövqeləri əks etdirilir. Əmək hüquqlarının müdafiəsi, əməyin mühafizəsi, texniki və ekoloji təhlükəsizlik əməkdaşlığımızın prioritet istiqamətləridir.
Bildirməliyəm ki, bu sahədə sosial tərəfdaşlar olaraq səylərimizi ildən-ilə daha da sıx birləşdirmişik. "Layiqli Əmək Ölkə Proqramı"nın yerinə yetirilməsində istehsalatda baş vermiş bədbəxt hadisələrin tədqiqində əməkdaşlarımız, mütəxəssislərimiz birgə iştirak etmiş, əməyin mühafizəsi və digər məsələlərlə bağlı müxtəlif formatlı tədbirlər, o cümlədən konfranslar, seminarlar, treninqlər həyata keçirmişik.
Həmkarlar ittifaqları dövlət orqanlarının, ictimaiyyətin, mütəxəssislərin diqqətini əməyin mühafizəsi problemlərinə yönəltmək məqsədi ilə ənənəvi "Ümumdünya Əməyin Mühafizəsi Günü"nü (28 Aprel) və "Ümumdünya Layiqli Əmək Günü"nü (7 Oktyabr) geniş miqyasda qeyd etmişdir.
Son iki ildə həmkarlar ittifaqları təşkilatları tərəfindən 133 yoxlama aparılmış, 1709 nöqsan aşkara çıxarılmışdır. Yoxlamalar nəticəsində respublikamızda fəaliyyət göstərən inşaat, neft-qaz, elektroenergetika, dəmiryolu sahələrində risklərin daha çox olduğu müəyyənləşdirilmişdir. Bəzi sahələrdə iş yerlərinin attestasiyasınn vaxtaşırı aparılmaması, texniki təhlükəsizlik tədbirlərinin həyata keçirilməməsi səbəbindən risklər artır və müxtəlif xəsarətlərin alınmasına şərait yaranır. Belə hallara daha çox tikinti şirkətlərində rast gəlinir. Son iki ildə respublikamızın tikinti təşkilatlarında 157 bədbəxt hadisə baş vermiş, onlardan 57-si və ya 36,3 faizi ölümlə nəticələnmişdir. Halbuki həmkarlar ittifaqı tərəfindən normativ tələblərin pozulmasına dair rəsmi qaydada 945 göstəriş verilmişdir.
Lakin həmkarlar ittifaqlarının apardığı müşahidələr zamanı məlum olur ki, müvafiq normativ sənədlərin mövcudluğuna baxmayaraq, əməyin mühafizəsi ilə bağlı xeyli dərəcədə risklər mövcuddur. Son iki ildə profilaktika işlərinin əməyin mühafizəsi üzrə statistik göstəricilərinə görə, istehsalatda işçilər xeyli dərəcədə risklərə məruz qalırlar. Müəyyən edilmiş 6 mindən çox nöqsan hələ də risklərin mövcudluğunu göstərir. Müxtəlif xəstəliklər üzündən işçilərin əmək qabiliyyətsizliyi 15 000 gün olmuşdur. Bu xəstəliklər içərisində tənəffüs yollarının iltihabı, qanaxma və dəri xəstəlikləri üstünlük təşkil edir. Xəstələnən işçilərə verilən müavinətlərin həcmi müəssisələrin hesabına ödənildiyindən, işəgötürənlərin əməyin mühafizəsinə göstərdikləri maliyyə imkanları məhdudlaşdırılır. Müvafiq tədbirlər görülmədiyinin və iş yerlərinin attestasiyasına biganə münasibətin nəticəsidir ki, peşə xəstəlikləri əvvəlki illərə nisbətən 2 dəfə artmışdır.
Təəssüflə qeyd etməliyəm ki, bir sıra nazirlik, komitə və şirkətlərdə, səhmdar cəmiyyətlərdə, qeyri-dövlət müəssisələrində əməyin mühafizəsi, təhlükəsizlik texnikası və istehsalat sanitariyasına aid normativ aktların yenidən işlənib hazırlanmaması və əməyin mühafizəsinin vahid idarəetmə sisteminin zəif olması risklərin artmasına daha çox şərait yaradır. Bütün bunlar tərəfdaşların iştirakı ilə vahid koordinasiya mərkəzinin yaradılmasını günün vacib tələbi kimi ortaya qoymuşdur. Artıq neçə müddətdir ki, hökumət, həmkarlar ittifaqları və işəgötürənlər təşkilatının mütəxəssisləri sosial şuranın əsasnaməsi, strukturu və fəaliyyət mexanizmi üzərində işləyirdi. Bu gün biz-hər üç tərəf buna mütəxəssislərimizin gərgin əməyinin nəticəsində hazırlanmış "Təhlükəsiz və Sağlam Əmək Şəraiti (TSƏŞ) üzrə Milli Üçtərəfli (tripatriat) Sosial Şuranın yaradılması haqqında" sənədin imzalanması mərasiminə toplaşmışıq. Bu qurum fəaliyyətə başladıqdan sonra sadaladığımız problemlərin həlli baxımından böyük irəliləyişlərə nail olacağımız qaçılmazdır. İnanırıq ki, Sosial Şura əməyin mühafizəsinə dair qanunvericiliyin təkmilləşdirilməsinə və ona riayət edilməsinə, təhlükəsiz və sağlam əmək şəraitinin yaradılmasına, əməyin hərtərəfli mühafizəsinə dəyirli töhfələrini verəcək. Bizim üçün xoşdur ki, bu qurumun yaradılması barədə təklif partnyorlarımız tərəfindən də müsbət qarşılanmışdır.
Bu mötəbər konfransda apardığımız müzakirələr və qəbul edəcəyimiz qərarlar ölkəmizdə üçtərəfli partnyorluğun daha yüksək mərhələyə qədəm qoymasına xidmət edəcəkdir. Biz bu əməkdaşlığı qiymətləndirir və əhəmiyyətli hesab edirik.
Diqqətinizə görə təşəkkür edirəm!

çap üçün verisya