Mədəniyyət İşçiləri Müstəqil Həmkarlar İttifaqı Respublika Komitəsinin (MİMHİRK) III plenumu keçirilmişdir. Yığıncağa həmkarlar ittifaqı orqanlarının sədrləri, nazirliklərin, müəssisələrin, yaradıcılıq ittifaqlarının məsul işçiləri dəvət olunmuşdular.
Plenumda Azərbaycan Həmkarlar İttifaqları Konfederasiyasının III qurultayına nümayəndələr, AHİK-in Məclisinə və İcraiyyə Komitəsinə üzvlər seçilmişdir.
Respublika Komitəsinin sədri Cəmilə Səttarovanın "MİMHİ-nin şəhər, rayon və ilk təşkilatlarında gənclərlə işin təşkili və sosial mənafelərinin müdafiəsi vəziyyəti haqqında" məruzəsi dinlənilib müzakirə edilmişdir.
Qeyd olunmuşdur ki, bu gün MİMHİ-nin sıralarında olan üzvlərin 20 faizini gənclər təşkil edir. Respublika Komitəsi ölkədə həyata keçirilən gənclər siyasətinin müvəffəqiyyətlə yerinə yetirilməsi işinə fəal surətdə qoşularaq "2007-ci il - Gənclər ili" çərçivəsində bir sıra təşkilati və kütləvi tədbirlər həyata keçirmişdir. Gənclərlə sıx əməkdaşlıq qurmaq, onlarla daha səmərəli iş birliyi yaratmaq və həmkarlar ittifaqı sıralarına cəlb etmək məqsədi ilə RK-nın nəzdində "Gənclər arasında iş üzrə komissiya" yaradılmışdır. Komissiyanın əsas vəzifəsi gəncləri Hİ sıralarına gətirmək, onların təhsili və əmək hüquqlarının genişləndirilməsində fəallıq göstərmək, gənc həmkarlar ittifaqı kadrlarının və fəallarının təhsilinə və hazırlığına yardımçı olmaq, gəncləri həmkarlar ittifaqının seçkili orqanlarına cəlb etməkdir. Hazırda Respublika Komitəsinin tövsiyəsi ilə MİMHİ şəhər, rayon və ilk həmkarlar ittifaqı komitələrinin nəzdində 50-yə yaxın belə komissiya fəaliyyət göstərir. RK-nın bu komissiyalarla birgə hazırladığı silsilə tədbirlər böyük əhəmiyyət daşımışdır.
Respublika Komitəsi Bədən Tərbiyəsi və İdman, Əmək və Sosial Münasibətlər akademiyalarında "Sağlamlıq aksiyası" təşkil etmişdir. Yüzlərlə tələbə göz müayinəsindən keçirilmişdir.
Deyilmişdir ki, gənclərin irəli çəkilməsi, həmkarlar ittifaqının seçkili orqanlarına cəlb edilməsi və ixtisaslarının artırılması məqsədi ilə gənclər arasında iş üzrə komissiyaların təqdimatı əsasında mədəniyyət sahəsində çalışan xeyli işçi RK tərəfindən ixtisasartırma kurslarına göndərilmişdir.
Gənc işçilərin sosial vəziyyətinin yaxşılaşdırılması məsələsi Respublika Komitəsinin və üzv təşkilatlarının, onların nəzdində olan gənclər arasında iş üzrə komissiyaların daim diqqət mərkəzindədir. Respublika Komitəsinin təşəbbüsü ilə bir sıra müəssisə və təşkilatda bağlanan ərazi sazişlərinə və kollektiv müqavilələrə gənclərlə bağlı bölmə və bəndlər əlavə edilmişdir. Gənclər siyasətinin həyata keçirilməsində həmkarlar ittifaqı komitələrinin gördükləri işlərlə bağlı sorğu tərtib olunmuş, MİMHİ-nin bütün şəhər, rayon və ilk təşkilatlarına paylanmışdır.
Sorğunun nəticəsindən məlum olmuşdur ki, bütün bu müsbət işlərlə yanaşı, MİMHİ-nin gənclər siyasətində hələ bəzi çatışmazlıqlar və görüləcək işlər də mövcuddur. Belə ki, mədəniyyət sahəsində çalışan gənclərin sayı hələ də azlıq təşkil edir. Bunun da maaşların aşağı səviyyədə olması, iş yerlərində lazımi şəraitin yaradılmaması, gənclərin istirahət və asudə vaxtlarının düzgün təşkil edilməməsi, sosial təminat və güzəştlərin verilməməsi və sairdir.
Mədəniyyət İşçiləri Müstəqil Həmkarlar İttifaqı Respublika Komitəsinin plenumu müzakirəyə çıxarılmış məsələ ilə əlaqədar qərar qəbul etmişdir.
Respublika Komitəsi Rəyasət Heyətinin qərarı ilə gənclər arasında həmkarlar ittifaqı haqqında "Ən yaxşı məruzə" müsabiqəsi təsis olunmuşdur. Müsabiqə respublikanın müxtəlif regionlarını əhatə etmişdir. Müsabiqənin gedişinə nəzarət etmək və qalibləri müəyyənləşdirmək üçün münsiflər heyəti yaradılmışdır. Müsabiqəyə 25 məruzə göndərilmişdir.
Münsiflər heyəti tərəfindən 1-ci mükafata (100 manat məbləğində) Quba Rayon Mədəniyyət və Turizm Şöbəsi Həmkarlar İttifaqı Komitəsinin sədri Həqiqət Hüseynova, 2-ci mükafata (80 manat məbləğində) Zərdab Rayon Mədəniyyət və Turizm Şöbəsi "Veteranlar klubu"nun mədəni təşkilatçısı Günay Əhədova, 3-cü mükafata (50 manat məbləğində) Quba Rayon MKC-nin Həmkarlar İttifaqı Komitsəinin sədri, rayon komitəsinin üzvü Gülnisə Abbasova layiq görülmüşlər. Eyni zamanda hər biri 25 manat olmaqla, 4 həvəsləndirici mükafat da verilmişdir.

çap üçün verisya