"Ülfət" qəzetinin redaksiyasında "Real və qeyri-leqal iqtisadiyyatda işçilərin təşkilatlandırılması" mövzusunda dəyirmi masa keçirilmişdir.

Tədbirdə qeyri-formal iqtisadiyyatın leqallaşdırılması, burada çalışan işçilərin sosial hüquqlarını tələb etməkdən ötrü təşkilatlanması üçün həmkarlar ittifaqları nə etməlidir, işçilər arasında maarifləndirmə işi hansı üsullarla həyata keçirilməlidir, insanlarla əlaqə qurarkən onların etimadını, inamını necə qazanmalı, işəgötürənlərin işçilərin təşkilatlanma istəyinə qarşı müqavimətini necə qırmalı və sair suallar araşdırılmışdır.
Dəyirmi masa arxasında fikir mübadiləsində AHİK-in baş mütəxəssisi Arif İbrahimov, İnşaat Kompleksi İşçiləri Müstəqil HİRK-in sədri Umud Hüseynov, Dövlət Əmək Müfəttişliyinin sektor müdiri Nizami Əhmədov, Sahibkarlıq və Elm, Elmi-İstehsalat Müəssisələri İşçilərinin Müstəqil HİRK sədrinin müavini Zenfira Bünyatova və Metal İşçiləri Hİ Federasiyasının vitse-prezidenti Feyzulla Əsədov iştirak etmişlər.

Oktyabrın 12-də Azərbaycan Həmkarlar İttifaqları Konfederasiyasının (AHİK) sədri, Milli Məclisin deputatı Səttar Mehbalıyev ölkəmizdə səfərdə olan Misir Səhiyyə İşçiləri Həmkarlar İttifaqının sədri, ölkə parlamentinin deputatı Abdelhamid İsmail Xedrinin rəhbərlik etdiyi nümayəndə heyəti ilə görüşmüşdür.

AHİK sədri, Milli Məclisin deputatı Səttar Mehbalıyev qonaqlara Azərbaycan həmkarlar ittifaqlarının yaranma tarixi, inkişaf mərhələləri, fəaliyyəti, strukturu və görülən işlər barədə məlumat vermişdir. Bildirmişdir ki, Azərbaycan müstəqilliyini bərpa etdikdən sonra həmkarlar ittifaqı təşkilatlarının da fəaliyyətində dönüş yaranmışdır. Bu gün AHİK-in 1 milyon 600 mindən çox üzvü vardır.
Xarici ölkələrin həmkarlar təşkilatları nümayəndə heyətlərinin ölkəmizə səfərlərinin ikitərəfli əlaqələrin möhkəmlənməsində və inkişaf etiməsində önəmli rol oynadığını qeyd edən sədr vurğulamışdır ki, rəhbərlik etdiyi qurumun Misir həmkarlar təşkilatları ilə sıx əlaqələri vardır.

Oktyabrın 6-da yay imtahan sessiyasının nəticələrinə görə əlaçı və həmkarlar ittifaqı təşkilatının fəalı olan ali məktəb tələbələrinə Azərbaycan Təhsil İşçiləri Azad Həmkarlar İttifaqı Respublika Komitəsinin adlı təqaüdünün verilməsinə həsr olunmuş mərasim keçirilmişdir.

Tədbiri giriş sözü ilə Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyev açmışdır. AHİK sədri bildirmişdir ki, ali məktəb tələbələrinə adlı təqaüdün verilməsi ATİAHİ Respublika Komitəsinin gənclərlə bağlı həyata keçirdiyi tədbirlər sırasında mühüm yerlərdən birini tutur. Adlı təqaüd 1995-ci ildə Respublika Komitəsinin Rəyasət Heyətinin qərarı ilə təsis edilmişdir. Bu günə qədər min üç yüz əlli nəfərdən yuxarı tələbə bu təqaüddən yararlanmışdır.

Oktyabrın 4-də Azərbaycan Həmkarlar İttifaqları Konfederasiyasında (AHİK) Azərbaycan Respublikasının dövlət müstəqilliyinin bərpasının 20-ci ildönümünə həsr olunmuş tədbir keçirilmişdir.

AHİK sədri, Milli Məclisin deputatı Səttar Mehbalıyev ölkəmizin son 20 ildə keçdiyi inkişaf yolundan danışmışdır. S.Mehbalıyev müstəqilliyimizin bərpasının ilk illərində ölkəmizin bir çox problemlərlə üzləşdiyini bildirmiş, yalnız ümummilli lider Heydər Əliyevin ikinci dəfə hakimiyyətə qayıdışından sonra respublikada sabitliyin yarandığını, siyasi və iqtisadi islahatlara başlandığını qeyd etmişdir.

AHİK sədri, millət vəkili S.Mehbalıyev Fridrix Ebert Fondunun Cənubi Qafqaz üzrə koordinatoru M.Yobeliusu qəbul etmişdir

Sentyabrın 28-də Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyev Fridrix Ebert Fondunun Cənubi Qafqaz üzrə koordinatoru Matias Yobeliusu qəbul etmişdir. Məlumat üçün deyək ki, fond 1925-ci ildə demokratik yolla seçilən ilk alman reyxs-prezidenti Fridrix Ebertin vəsiyyəti əsasında formalaşıb. Fond çoxşaxəli fəaliyyət istiqamətinə malikdir. Demokratik prinsiplərə əsaslanan siyasi və ictimai təhsilə, dünyanın müxtəlif ölkələri ilə ictimai-siyasi dialoqlara dəstək göstərir. İstedadlı və cəmiyyətdə aktivliyi ilə seçilən tələbələrə və gənc alimlərə təqaüdlər ayırır. Bu missiyanın reallaşdırılması üçün fond öz imkanlarından istifadə etməklə yanaşı, həmkarlar ittifaqları, siyasi, iqtisadi və mədəni dairələrlə də əməkdaşlıq edir.
Baş ofisləri Bonn və Berlin şəhərlərində yerləşir. Dünyanın 33 ölkəsində ofisi var. 100-dən çox dövlətdə fəaliyyət planına malikdir. İllik büdcəsi 110 milyon avrodur.

Bolqarıstanın paytaxtı Sofiya şəhərində Pan Avropa Regional Şurasının (PARŞ) 4-cü yay məktəbi olmuşdur. Sentyabrın 21-dən 23-dək keçirilən tədbirdə 30-dək ölkənin və bir sıra beynəlxalq qurumların həmkarlar ittifaqı rəhbərləri və liderləri iştirak etmişlər.

Transmilli şirkətlər bir çox ölkələrin iqtisadiyyatında mühüm rol oynayır. Birbaşa investisiya və digər vasitələrlə belə müəssisələr kapitalın, texnologiya və əməyin ən səmərəli istifadəsinə yardım etməklə, həm özlərinə, həm də fəaliyyət göstərdikləri ölkələrə əsaslı xeyir gətirə bilərlər. Bəzən də transmilli şirkətlərin fəaliyyəti həmin ölkələrin milli və iqtisadi siyasət məqsədləri ilə uyğun gəlmir, şirkətlərdə çalışan işçilərin maraqları ilə ziddiyyət təşkil edir.

Bütün bu məsələlərə sentyabrın 29-da Bakıda "Milli səviyyədə layiqli əməyin təminatında transmilli şirkətlərin iştirakı: əsas hədəflər və nəticələr" mövzusunda keçirilən beynəlxalq konfransda aydınlıq gətirilməsinə çalışıldı.

Qloballaşan dünyada beynəlxalq korporasiyaların gücü qarşısında işçi insanlar necə dayana bilərlər?

1 Oktyabr - Beynəlxalq Ahıllar Günü münasibətilə Təhsil İşçiləri Azad Həmkarlar İttifaqı Respublika Komitəsinin əməkdaşları Əmək və Əhalinin Sosial Müdafiəsi Nazirliyinin Sabunçu rayonunun Bilgəh qəsəbəsində yerləşən müharibə və əmək əlilləri üçün pansionatının sakinləri ilə görüşmüşlər.

Dünən Mədəniyyət İşçiləri Müstəqil Həmkarlar İttifaqı Respublika Komitəsinə dəvət olunmuş bir qrup veteran incəsənət xadiminin şərəfinə düzəldilmiş şirniyyat süfrəsi arxasında əyləşənlər bəlkə də ikinci gənclik illərini yaşayırdılar.