Aprelin 13-də Təhsil İşçiləri Azad Həmkarlar İttifaqı Respublika Komitəsinin Ümumdünya Əməyin Mühafizəsi (28 Aprel) Gününə həsr etdiyi ilk seminar Göyçay şəhərində baş tutmuşdur.

Ətraf rayonlarda fəaliyyət göstərən həmkarlar ittifaqı liderlərinin və fəallarının da dəvət edildiyi tədbir "Yeni şəraitdə əmək sferasında profilaktika və risklərin idarə olunması" devizi altında keçirilmişdir.
Tədbir iştirakçıları əvvəlcə yeni tikilmiş Heydər Əliyev Mərkəzi ilə tanış olmuş, ulu öndərin abidəsi önünə əklillər qoymuş və xatirə şəkli çəkdirmişlər.

Çox hörmətli Səttar Suliddin oğlu!

Artıq bir ildir ki, qlobal maliyyə böhranı MDB ölkələrini əhatə etmişdir. Sosial-iqtisadi durum dövlətlərin demək olar hamısında kəskinləşmiş, lakin bu gün Azərbaycanda hökumətin həyata keçirdiyi realist siyasət və həmkarlar ittifaqlarının səyləri nəticəsində böhranın təsiri ölkəmizdə o qədər də hiss olunmur.
Antiböhran siyasətinin həyata keçirilməsi şəraitində Azərbaycan Həmkarlar İttifaqları Konfederasiyası iqtisadiyyatın nəbzində əlini saxlamaqla kifayətlənməmiş, öz müsbət təcrübəsini regionun digər ölkə həmkarlar ittifaqları ilə də bölüşmüşdür. Ümumi Həmkarlar İttifaqları Konfederasiyası Azərbaycan həmkarlar ittifaqlarının sosial-iqtisadi vəziyyətə dair apardıqları monitorinqin nəticələri barədə müntəzəm surətdə məlumatlandırılır. Bu materiallar ölkədəki vəziyyəti təfsilatı ilə səciyyələndirir, məşğulluğun dinamikasını, əhalinin gəlirlərini, əməkhaqqı daxil olmaqla, açıqlayır. Bütün bunlar həmkarlar ittifaqlarının işində, onların düzgün mövqeyinin və taktikasının işlənilməsində həvəsləndirici amil kimi böyük rol oynamışlar.
Ümumi Həmkarlar İttifaqlarının bütün üzv təşkilatları faydalana biləcək görülən işlərin nəticələrinə görə Sizə səmimi təşəkkürümüzü bildiririk.

Hörmətlə, ÜHİK-in Baş katibi V.P.Şerbakov.

Martın 31-dən aprelin 2-dək Sarayeva şəhərində Beynəlxalq İnşaat və Ağac Emalı İşçilərinin Həmkarlar İttifaqının Cənub-Şərq Şöbəsinin təşəbbüsü və təşkilatçılığı ilə qeyri-qanuni miqrantların problemlərinə həsr olunmuş iclas keçirilmişdir.

İclasda Azərbaycan, Serbiya, Bosniya və Herseqovinanın həmkarlar ittifaqı işçiləri, qeyri-hökumət təşkilatlarının nümayəndələri iştirak etmişlər. Tədbirə vaxtilə Azərbaycanda fəaliyyət göstərmiş bir neçə Serbiya vətəndaşı da dəvət olunmuşdu.

Beynəlxalq Əmək Təşkilatı ilk dəfə 30 il öncə "qeyri-formal sektor" anlayışından istifadə etmişdir. Söhbət etiraf olunmayan, qeydiyyatdan keçməyən, mühafizə edilməyən və ya dövlət hakimiyyət orqanları tərəfindən hüquqi cəhətdən tənzimlənməyən əməkdən gedirdi.

1991-ci ildə Beynəlxalq Əmək Konfransının 78-ci sessiyasında "qeyri-formal sektorun dilemması" müzakirə edilmişdir. Dilemma ondan ibarətdir ki, BƏT və onun üçtərəfli iştirakçıları ya yeni iş yerlərinin və gəlir gətirən məşğulluğun mənbəyi olan qeyri-formal sektoru həvəsləndirməli və yaxud onlar bu sektora qanunvericiliyin və sosial müdafiənin şamil edilməsinə çalışmalıdırlar. O zaman xüsusilə vurğulanmışdı ki, BƏT-in qeyri-formal iqtisadiyyata dəstək verməsindən və ya onun inkişafının tərəfdarı kimi çıxış etməsindən söhbət belə gedə bilməz. Bu gün də dilemm qüvvədədir, lakin o, miqyasca daha da kəskinləşmiş və mürəkkəbləşmişdir.

Azərbaycan Həmkarlar İttifaqları Konfederasiyasında (AHİK) 31 mart - Azərbaycanlıların soyqırımının 92-ci ildönümünə həsr olunmuş tədbir keçirilmişdir.
AHİK-in sədri, Milli Məclisin deputatı Səttar Mehbalıyev mənfur qonşularımızın tarix boyu azərbaycanlılara qarşı apardıqları soyqırımı siyasətinin dəhşətli nəticələrindən danışmış, bu faciəni böyük dövlətlərin yürütdükləri imperiya siyasətinin acı yekunu kimi qiymətləndirmişdir.

S.Mehbalıyev ermənilərin azərbaycanlılara qarşı soyqırımı siyasətini müxtəlif dövrlərdə fərqli formalarda həyata keçirdiklərini, bu proseslərin kütləvi qətllər və hərbi əməliyyatlarla müşayiət olunduğunu qeyd etmişdir. O, xain qonşularımızın məkrli siyasətinin tarixi faktlara əsaslanaraq ifşa edilməsinin, həqiqətin dünya ictimaiyyətinə olduğu kimi çatdırılmasının zəruriliyini vurğulamışdır.

Novruz bayramı ilə əlaqədar Azərbaycan həmkarlar ittifaqları da bir sıra şənliklər və xeyriyyə tədbirləri həyata keçirəcəklər. Bu sayımızda həmin tədbirlərin bir neçəsi barədə qısa xülasə ilə oxucularımızı tanış edirik.