ABŞ-da 5 min 764 yoluxma faktı qeydə alınıb. Yaponiya rəsmiləri də 200-ə qədər adamın «Donuz qripi»nə yoluxduğu faktını təsdiq edib. Yoluxanların əksəriyyəti yuxarı sinif şagirdləri və kollec tələbələridir. Virusun daha geniş miqyas almaması üçün artıq 4 mindən artıq məktəb fəaliyyətini dayandırıb. Qripin qarşısını almaq məqsədi ilə bir sıra qabaqlayıcı tədbirlər həyata keçirilsə də, H1N1 «qurban»larının sayı artmaqda davam edir.
Azərbaycanda isə «Donuz qripi»nə yoluxma faktı qeydə alınmasa da, xəstəxanalar artıq hazır vəziyyətə gətirilib. Səhiyyə Nazirliyinin mətbuat xidmətindən verilən məlumata görə, artıq bir sıra tibb müəssisələrində virusun yayılma yolları və təhlükəsizlik tədbirləri ilə bağlı maarifləndirmə işlərinə start verilib. Qrip və kəskin respirator infeksiyaların müayinəsini aparan Respublika Taun Əleyhinə Stansiya gücləndirilmiş iş rejiminə keçib. «A qripi» virusunun vaxtında aşkarlanması və müvafiq tədbirlərin görülməsi üçün stansiyanın 100-ə qədər tibbi personalı növbətçilik sistemi ilə işləyir. Bir sözlə, virusun yayılma tendensiyası nəzarətdədir, mütəxəssislərin araşdırmaları, eləcə də son məlumatlar daim izlənilir. Əlaqədar orqanlarla birlikdə virusun yayıldığı ölkələrdən vətənə dönənlərin hamısı ciddi yoxlanmadan keçirilir.

Təsərrüfatlarda aparılan yoxlamalar hələ ki, təhlükənin olmadığını göstərib

Beynəlxalq strukturların həyəcan təbili çalmasına baxmayaraq, yerli bazarlarımızda donuz ətinin satışına hələ də qadağa qoyulmayıb. Kənd Təsərrüfatı Nazirliyi yanında Dövlət Baytarlıq Xidmətindən verilən məlumata görə, xəstəlik insana yalnız bu virusa yoluxan donuz vasitəsilə keçə bilər. Ölkədə infeksiyaya yoluxma faktı qeydə alınmadığından belə bir qadağaya hələ ki, əsas yoxdur. Qeyd edək ki, donuzçuluq təsərrüfatlarında aparılan ilk monitorinqin nəticələri də ölkədə epizootik durumun sabit olduğunu göstərib. Aprelin 27-dən etibarən ölkə ərazisində keçirilmiş monitorinq zamanı seçmə üsulla donuzlardan götürülmüş 388 qan nümunəsinin müayinəsi başa çatıb. Dövlət Baytarlıq Xidmətindən verilən məlumata görə, monitorinq zamanı təsərrüfatların heç birində nə xəstə, nə də xəstəlikdən tələf olan heyvanlara rast gəlinməyib. Bütün bunlara baxmayaraq, Dövlət Baytarlıq Xidməti monitorinqləri bundan sonra da davam etdirmək niyyətindədir.
Xidmətdən bildirilib ki, iyunun 1-dən növbəti monitorinq həyata keçiriləcək. Xəstəliyin profilaktikası üçün ölkəmizdə dərman vasitələrinin, dezinfeksiyaedici maddələrin, fərdi qoruyucu vasitələrin ehtiyatı yaradılıb, rayon və şəhər baytarlıq idarələri ərazilərində fəaliyyət göstərən donuzçuluq təsərrüfatlarında xəstəliyə qarşı baytarlıq-sanitariya tələblərinə uyğun tədbirlərin həyata keçirilməsi ilə bağlı tapşırıqlar verilib.

Qrip epidemiyası dünya iqtisadiyyatına 3 trilyon dollar ziyan vuracaq, iqtisadi artımı 5 faiz azaldacaq

Sürətlə əhatə dairəsini genişləndirən «Donuz qripi» yalnız insanların sağlamlığını təhlükə altına almaqla kifayətlənməyib. Dünya iqtisadiyyatının onsuz da çətin durumunu daha da çətinləşdirməkdə davam edir. Əcnəbi ekspertlər isə artıq yeni qrip dalğasının dünya iqtisadiyyatının dirçəlməsinə mane olacağından və yenicə əldə olunmuş kövrək sabitliyi pozacağından narahatdırlar. Artıq birjalarda neftin ucuzlaşması buna əyani sübutdur. Neftin qiyməti isə ötən vaxtlarla müqayisədə daha iki faiz aşağı düşüb. İnvestorlar narahatdırlar ki, qrip təhlükəsinə görə avia uçuşlarının azalması neftə tələbatı azalda bilər. Buna görə də neftlə yanaşı, aviaşirkətlərin səhmləri də ucuzlaşmağa başlayıb. Bunun əvəzində isə əczaçılıq şirkətlərinin səhmləri bahalaşmaqdadır. Məlumdur ki, bundan sonra dərmanlara tələbat artacaq. Maliyyə birjalarında isə riskli valyutaların - yəni avro və dolların məzənnəsi aşağı düşür. Dünya iqtisadiyyatında dirçəlmənin yenicə başladığını qeyd edən əcnəbi ekspertlər budəfəki epidemiyanın iqtisadi dirçəlişi dayandıracağanı proqnozlaşdırırlar. Dünya Bankının ötənilki hesabatına görə, ümumiyyətlə, növündən asılı olmayaraq, qrip epidemiyası dünya iqtisadiyyatına 3 trilyon dollar ziyan vuracaq və dünyadakı iqtisadi artımı 5 faiz azaldacaq.
Məlumat üçün bildirək ki, 2003-cü ildə yayılan «Quş qripi» virusu Asiya ölkələrinə 40 milyard dollar ziyan vurmuşdu. Bu fəsadların ən çox hiss edildiyi sektor isə məhz turizm sahəsi olmuşdu. Beynəlxalq Valyuta Fondu isə bəyan edib ki, bu virus olmasa belə, dünyadakı iqtisadi dirçəliş 2010-cu ildən tez başlamayacaq.

Donuz və mal ətindən hazırlanan məhsulların həcmi son 1 ayda 30 faiz aşağı düşüb

Maraqlıdır, yerli iqtisadçılarımız əcnəbi eksperlərlə nə dərəcə razıdırlar?
Problemə münasibət bildirən iqtisadçı-ekspert Vüqar Bayramov məsələni şərh edərkən qeyd etdi ki, qrip bir sıra sektorlarda tənəzzülü daha da sürətləndirəcək: «A qripi» durğunluqla müşahidə olunan sektorların sayını artıracaq. Çünki virus yalnız kənd təsərrüfatı, o cümlədən heyvandarlıq sahələrinə deyil, eyni zamanda başqa sektorlara da təsir göstərəcək. Bu qripin yayılması bir sıra sənaye sektorlarında, o cümlədən yeyinti sənayesində fəaliyyət göstərən bir sıra müəssisələri müflisləşmə həddinə gətirib çıxara bilər. «A qripi» aşkarlandıqdan sonra dünyada donuz və mal ətindən hazırlanan məhsulların həcmi yalnız son bir ayda 30 faiz aşağı düşüb. Güman edilir ki, məhz istehlakın aşağı düşməsi həmin məhsulların istehsalı ilə məşğul olanların müflisləşməsinə gətirib çıxaracaq. Bu da həm iqtisadi, həm də sosial baxımından arzuolunan deyil».

London sammiti ilə müqayisədə təqribən 1,5 dəfə çox vəsait ayrılıb

V.Bayramovun sözlərinə görə, qripin gündən-günə əhatə dairəsini genişləndirməsi nəticə etibarilə qlobal krizisin ömrünün uzanmasına gətirib çıxaracaq: «Sözsüz ki, virus tapılmamışdan öncə də beynəlxalq maliyyə qurumları qlobal krizisin ən yaxşı halda 2010-cu ilin əvvəllərində başa çatacağını proqnozlaşdırırlar. Amma virusun yayılması böhranın yaxın zamanlarda başa çatacağı ilə bağlı hər hansı bir nikbinlik yaratmır. Bütün hallarda qripin aşkarlanmasından sonra dünya iqtisadiyyatına dəyən zərər məhz «Böyük İyirmilik»in London sammitində ayırdığı vəsaitdən çoxdur. Belə olan halda nəzərə alaq ki, məhz «Böyük İyirmilik» qlobal maliyyə böhranından azad olmaq üçüın 1,9 trilyon dollar vəsait ayırmışdı. Amma virusla mübarizədə ayrılan məbləğ həmin vəsaitdən təxminən 1,5 dəfə çoxdur. Bu qədər vəsait ayrılması dünya iqtisadiyyatının onsuz da çətin durumunu daha da kölgə altına salacaq».

çap üçün verisya