Hadı Rəcəbli: "Şadlıq evlərinə lisenziyaların verilməsinin korrupsiyaya yol açacağı haqda iddialar əsassızdır"

"Mərasimlər haqqında" qanunun qəbulu ilə bağlı cəmiyyətdə birmənalı mövqe yoxdur. Bəziləri toy və yas mərasimləri ilə bağlı qanunun qəbulunun zəruriliyini önə çəksələr də, digərləri bu yöndə hansısa qanunvericilik aktının olmasının kəskin şəkildə əleyhinə çıxır.
Milli Məclisin Sosial Siyasət daimi Komitəsinin sədri Hadı Rəcəbli də ikinci mövqeyi nümayiş etdirənlərdəndir. O, yeni qanuna ehtiyac görmür. Qərara almışıq ki, məsələ ilə bağlı ayrıca qanun qəbul etməkdənsə, "Lisenziyalar haqqında" qanuna müəyyən dəyişiklikləri nəzərdə tutan müvafiq qanunvericilik aktını hazırlamaq daha məqsədəuyğun olar:
“Bizcə şadlıq evlərinin fəaliyyətinin lisenziyalaşdırılması Mədəniyyət və Turizm Nazirliyinin səlahiyyətinə verilməlidir. Qoy onlar şadlıq evlərindəki akustika, səsləndirmə və digər məsələlərə nəzarəti həyata keçirsinlər. Şadlıq evlərindəki toy mərasimlərində baş verən ifratçılıq və israfçılığın, müşahidə olunan biabırçılığın qarşısını almağın yolunu ancaq bunda görürük”.
Beləliklə, Milli Məclisin payız sessiyasında "Lisenziyalar haqqında" qanuna əlavələr ediləcək. Bununla da ölkədə fəaliyyət göstərən şadlıq evlərinə lisenziya verilməsi Mədəniyyət və Turizm Nazirliyinə tapşırılacaq. Komitə sədrinin sözlərinə görə, şadlıq evlərinə lisenziyaların verilməsinin korrupsiyaya yol açacağı haqda iddialar əsassızdır.
Çünki Mədəniyyət və Turizm Nazirliyi hazırda mehmanxanalara lisenziyalar verir və bu iş tam şəffaf aparılır: "Ona görə də narahatçılığa əsas yoxdur" - deyə H.Rəcəbli vurğuladı. O, əlavə etdi ki, şadlıq evləri lisenziyalaşdırıldıqdan sonra "Mərasimlər haqqında" qanunun qəbuluna ehtiyac duyularsa, yenidən müzakirələrə başlanılacaq.
Komitə sədri parlamentin payız sessiyasında müzakirəsini planlaşdırdıqları digər qanun layihələri barədə də məlumat verdi. Onun sözlərinə görə, komitə payız sessiyası üçün Milli Məclis aparatının sosial qanunvericilik şöbəsi ilə birlikdə "Sosial xidmət haqqında" qanun layihəsi hazırlayır. Qanun sosial sahədə çalışan işçilərlə bağlı münasibətləri tənzimləyəcək. H.Rəcəblinin dediyinə görə, artıq sənədin ilkin variantı üzərində iş aparılır: "Hesab edirəm ki, bu, çox vacib bir qanundur. Məlum olduğu kimi, sosial xidmət Azərbaycanda yeni formalaşmaqda olan bir institutdur. Ona görə də biz bu sahənin fəaliyyətinin hüquqi cəhətdən tənzimlənməsini nəzərdə tutan qanun layihəsini hazırlamalıyıq. Artıq ilkin variantı işlənilən sənədin parlamentin payız sessiyasında müzakirəyə çıxarılması nəzərdə tutulub".
Bundan əlavə, komitə "Gənc ailələrin sosial müdafiəsi", "İlkin səhiyyə haqqında" qanun layihələrini də müzakirələrə təqdim etməyə hazırlaşır. Görüləcək işlər sırasında "AİDS-lə mübarizə haqqında" yeni qanunun hazırlanması da var. H.Rəcəbli dedi ki, bu il Əmək Məcəlləsinə bir sıra əhəmiyyətli dəyişikliklər edilib. Lakin iqtisadi münasibətlərdə baş verən inkişaf bizi vadar edir ki, bu işi bu istiqamətdə payız sessiyasında da davam etdirək. Komitə ictimai yerlərdə siqaret çəkilməsinə qadağa qoyan qanunun qəbul edilməsi ilə bağlı millət vəkilləri tərəfindən səsləndirilən təkliflərə də baxmaq niyyətindədir. Əhaliyə göstərilən sosial xidmət qanunla tənzimlənəcək.
Söhbət əsnasında öyrəndik ki, Milli Məclisin Sosial Siyasət daimi Komitəsi tərəfindən Ailə Məcəlləsinin monitorinqi davam edir. Bu barədə də məlumat verən komitə sədri bildirdi ki, artıq məcəlləyə dəyişikliklərin edilməsi üçün ortada müəyyən materiallar var: "Məsələ orasındadır ki, qanunda dəyişiklikləri toplum şəkildə etdikdə müəyyən narahatlıqlar yaranır. Yəni, müəyyən məsələlər var ki, onlar dərhal həllini tapmalıdır, digərlərinin həlli üçün isə müəyyən zaman kəsiyinə ehtiyac var. Belə halları nəzərə alaraq işimizi bundan sonra da davam etdirmək istəyirik ki, Məcəlləyə köklü dəyişiklik edə bilək".
Komitə sədrinin bildirdiyinə görə, nikaha daxil olan şəxslərin sağlamlıq haqqında arayış verməsi və nikah yaşının artırılması kimi məsələlər də müzakirə mövzusudur. Hələ ki, bu məsələlər ətrafında ciddi müzakirələr aparıldığından konkret variant üzərində dayanmaq mümkün deyil.

çap üçün verisya