Vüqar Səfərli: "Müsabiqə şərtlərinin pozulduğu üzə çıxsa kiv-lər məhkəməyə veriləcək"

Narazı qalan təşkilatlar sentyabrın 5-nə qədər apelyasiya komissiyalarına müraciət edə bilər

"Trend" İnformasiya Agentliyində Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun 2009-cu il KİV-lərə maliyyə dəstəyi müsabiqəsinin nəticələri haqqında mətbuat konfransı keçirildi. Tədbirdə Fondun icraçı direktoru Vüqar Səfərli müsabiqənin gedişi, qaliblərin seçim mexanizmi barədə məlumat verdi. Bildirdi ki, 2009-cu il iyulun 1-dən elan edilən müsabiqədə iştirak etmək üçün 112 layihə təqdim olunub: "Onlardan 109-u birbaşa, 3-ü isə poçt vasitəsilə Fonda daxil edilib. Təşkilatların 25-i lazım olan sənədləri təqdim etməmiş və ya layihələri hazırlayarkən qüsurlara yol vermişlər. Beləliklə ekspertlər 87 layihəni qiymətləndirmişlər.
Qiymətləndirmədə 12 ekspert iştirak edib. Onlar media və layihələrlə iş təcrübəsi olan, respublikada tanınan mütəxəssislərdir. Hər layihəyə 3 ekspert qiymət verib. Qiymətlər ümumiləşdirildikdən sonra məlum olub ki, 15 layihə zəruri keçid balını toplaya bilməyib. 17 layihə isə ümumilikdə zəruri keçid balını toplayıb. Lakin öz istiqamətində digər layihələrdən az bal topladıqları üçün qalib ola bilməyib. Nəticədə təqdim edilən 55 layihə müsabiqənin qalibi olub. Onlardan 30-u qəzet, 13-ü informasiya agentliyi, 6-ı jurnalist təşkilatı və 6-ı digər əlaqəli təşkilatlar kateqoriyasına aiddir".
V.Səfərli qeyd etdi ki, layihələrin icrası dörd ay müddətində iki mərhələdə həyata keçiriləcək: "Hər mərhələ iki aydan ibarətdir. Birinci mərhələdə müsabiqədə qalib gələn KİV-ə maliyyə yardımının 50 faizi ödəniləcək. Sonra fondun əməkdaşları araşdırma aparacaqlar. Layihə lazımınca, müsabiqə şərtlərini pozmadan icra olunursa, onda vəsaitin qalan hissəsi də ödəniləcək. Aparılan araşdırmalar zamanı müsabiqə şərtlərinin pozulduğu aşkarlanarsa, bu zaman fond layihəni həyata keçirən KİV-i məhkəməyə verəcək".
Konfrans çərçivəsində Fondun Müşahidə Şurasının sədri Ümid Mirzəyev müsabiqədə qalib gələn kütləvi informasiya vasitələrinin adlarını açıqladı: "Müsabiqədə "Ülfət", "Ədalət", "Azadlıq", "Bakı-xəbər", "Xalq Cəbhəsi", "Səs", "Kaspi", "525-ci qəzet", "Olaylar", "Azad Azərbaycan", "Palitra", "AzərNews", "Novoye vremya", "Şərq", "Üç nöqtə", "Paritet", "Mövqe", "Yeni Azərbaycan", "Bizim yol", "Oxu məni", "Hərbi and", "Addım", "Futbol+qol", "Mərkəz", "Proqnoz", "Vətən uğrunda", "Paralel", "Yeni Musavat", "Həftə içi", "Təzadlar" qəzetləri, "Trend", "ASSA-İradə", "Azadinform", "Azəri Press", "Səs" informasiya agentlikləri müsabiqədə qalib hesab olunmuşlar. Bununla yanaşı, müsabiqədə bir sıra aidiyyəti təşkilatların da təqdim etdiyi layihələr yüksək qiymətləndilirib. "Beynəlxalq Avrasiya Mətbuat Fondu", "RUH" Azərbaycan Jurnalistləri Komitəsi, "Yeni fikir" Jurnalist Həmrəyliyi İctimai Birliyi, "Müstəqil Araşdırmaçı Jurnalistlər" Liqası, "Azərbaycan Müstəqil Jurnalistlər" Liqası, Azərbaycan Mətbuat Şurası, "Zərdabi Mətbuat Mərkəzi" İctimai Birliyi, "Jurnalist Qadınlar" Assosiasiyası, "Tərəfsiz Jurnalistlər" İctimai Birliyi, Jurnalistlərin Həmkarlar İttifaqı, Azərbaycan Jurnalistlər Birliyi, "Azərbaycan Demokratik Jurnalistlər" Liqası, "Polisə Dəstək", "İctimaiyyətlə Əlaqələrin İnkişafı", "Sən Tək Deyilsən", Müstəqil Hüquq Mərkəzi, "Qloballaşma və Milli Həmrəylik" ictimai birliyinin təqdim etdiyi layihələr müsabiqə qalibləri sırasındadır".
Müşahidə Şurasının üzvü, Azərbaycan Mətbuat Şurasının sədri Əflatun Amaşov çıxışında müsabiqənin Azərbaycanda mətbuatın inkişafına göstərəcəyi təsiri vurğuladı: "Dövlət mətbuata birdəfəlik yardım ayırdı. Əminəm ki, KİV-lərə edilən yardımlar bununla kifayətlənməyəcək. Bundan sonra KİV-lərə rəsmi qurumların reklam və elanlarının verilməsinə çalışacağıq. Bu məsələdə də Türkiyə təcrübəsini Azərbaycana gətirməyi planlaşdırırıq. Eyni zamanda jurnalistlərin peşəkarlığının artırılması istiqamətində də addımlar atılacaq".
Tədbir çərçivəsində həmçinin, bildirildi ki, müsabiqənin gedişindən narazı olanlar və layihəsi uğur qazanmayan KİV-lər ayın 5-nə kimi fondun apelyasiya komitəsinə yazılı şəkildə müraciət edə bilərlər. Qeyd edək ki, sentyabrın 5-dən sonra edilən müraciətlərə baxılmayacaq.
Məlumat üçün bildirək ki, müsabiqədə qaliblər sırasında adları çıxmayan KİV-lərin siyahısı kivdf.gov.az saytında açıqlanacaq. Onların müsabiqədə qalib gəlməməsinin səbəbləri də göstəriləcək.

Gülər KƏRİMLİ

çap üçün verisya