Sərnişin sıxlığından asılı olaraq dəmir yolu və avtovağzalda əlavə tədbirlər görüləcək

Bu suallara cavab tapmaq üçün ilk növbədə Dövlət Dəmir Yolunun kassalarına baş çəkdik. Bütün kassaların qarşısında növbələr yaranmışdı. İstər ölkə xaricinə, istərsə də bölgələrə getmək istəyənlərin sayı kifayət qədər çox idi. Əksər istiqamətlərə martın 18 və 19-na olan biletlər satılmışdı. Kassalardan ayrılan bəzi şəxslərin üzlərindəki narazılıq göstərirdi ki, bilet ala bilməyiblər. Onlardan biri - 53 yaşlı Hüseyn Əmirovun sözlərinə görə, ayda 2 dəfə paytaxta gəlib gedir: "Balakən rayonunda yaşayıram. İki övladım Bakıda yaşadığından bayram ərəfəsində onlara baş çəkməyə gəlmişəm. Qatarla getmək həm təhlükəsiz, həm də rahat olduğu üçün həmişə bu nəqliyyat növündən istifadə edirəm. Həmişə günün istənilən vaxtı bilet ala bilirdim. İndi isə bu günə bilet tapa bilməmişəm".

Bundan sonra kassalardan birinə yaxınlaşıb növbəyə durduq. Məndən öndə dayanmış şəxs Qazax rayonuna bilet istədi. Ona ancaq plaskarta boş yer olduğu bildirildi. Bakı-Köçərili qatarında SV-yə bilet almaq barədə eşidəndə kassir xanım bilet olmadığını dedi. Kupeyə isə yalnız martın 21-nə bilet var idi.
Məsələyə münasibət bildirən "Azərbaycan Dəmir Yolları" Qapalı Səhmdar Cəmiyyəti mətbuat xidmətinin rəhbəri Nadir Əzməmmədov Novruz bayramı ilə əlaqədar kollektivin gücləndirilmiş iş rejimində işləyəcəklərini söylədi: "İstirahət və bayram günləri ilə əlaqədar yaranan sərnişin sıxlığını nəzərə alan cəmiyyətin sərnişin daşımaları departamenti ölkə daxilində hərəkət edən sərnişin qatarlarına əlavə vaqonların qoşulmasını təmin edəcək. Sərnişin sıxlığından asılı olaraq bayram günlərində 15-20 əlavə vaqonun qoşulması nəzərdə tutulur. Bundan başqa, operativliyin və təhlükəsizliyin təmin olunması məqsədi ilə müvafiq strukturlar növbəli iş rejimi ilə işləyəcək".
N.Əzməmmədov biletlərin qiymətində heç bir artım olmayacağını bildirdi: "Respublika daxilinə gediş üçün qiymətlərdə heç bir artım olmayıb və olmayacaq da. Sərnişinlər həmişəki qaydada bilet ala biləcəklər. Bayram ərəfəsində bilet satışına nəzarət gücləndiriləcək. Hazırda da bu işə nəzarət var. Lakin bayram zamanı sərnişinlərin çoxluğundan istifadə edən bəzi şəxslərin öncədən bilet alıb, sonradan digərlərinə satması halları da olur. Bunun qarşısının alınması üçün sərnişinlərə ancaq şəxsiyyət vəsiqəsini təqdim etdikdə bilet verilir və vaqonlara da şəxsiyyət vəsiqəsini təqdim etdikdə buraxılır".
Nəqliyyat Nazirliyi Katibliyinin müdiri Namiq Həsənov isə bildirdi ki, bayram günlərində Bakı Beynəlxalq Avtovağzalı da gücləndirilmiş iş rejimində işləyəcək: "Adətən bayram ərəfəsində rayonlara gedən sərnişinlərin sayı artır. Bu zaman avtovağzalda da sıxlıq yaranır. Sərnişinlərin vaxtında və təhlükəsiz mənzil başına çatdırılmasını təmin etmək üçün lazım olan bütün istiqamətlərdə əlavə avtobuslar xəttə buraxılacaq. Artıq bununla bağlı tədbirlərə başlanılıb. Sonradan həmin sərnişinlər geri qayıdarkən problem yaranmaması üçün bölgələrdə də tədbirlər görüləcək".
Sərnişin sıxlığından istifadə edərək qiymətlərin bahalaşmasına gəldikdə isə N.Həsənov vətəndaşlara öncədən bilet almağı məsləhət bildi: "Yaxşı olardı ki, sərnişinlər əvvəlcədən bilet alsın. Belə olduqda onlardan heç kim əlavə pul ala bilməz. Bununla yanaşı, ciddi nəzarət tədbirləri də görüləcək".
“AZAL” Hava Yollarının mətbuat xidmətindən isə bildirdilər ki, artıq martın 13-dən başlayaraq Naxçıvana reyslərin sayı artırılıb: "Sərnişin sıxlığı ilə bağlı əlavə olaraq bir reys həyata keçirilir. Yaxın günlərdə ehtiyac olsa, reyslərin sayı artırılacaq".
Bayram günlərində "Azərenerji" ASC, "Azərsu" SC və "Azəriqaz" da gücləndirilmiş iş rejimində işləyəcək. "Azərenerji" ASC-nin ictimaiyyətlə əlaqələr şöbəsindən bildirildi ki, bayram ilə əlaqədar qurumun bütün regional enerji təchizatı müəssisələri gücləndirilmiş iş rejiminə keçirilib. Bayram günlərində enerjiyə artan tələbat nəzərə alınaraq, əlavə mal-material ehtiyatı yaradılıb və növbətçi briqadaların sayı artırılıb. Briqadalar nəqliyyat vasitələri ilə təmin edilib.
Səhmdar cəmiyyətinin mətbuat xidməti Mərkəzi Dispetçer İdarəsinə istinadən bildirir ki, bayram günlərində tələbatın artmasına baxmayaraq, ölkədə elektrik enerjisi ilə təminatda problem olmayacaq. Enerji istehsalının həcmi istehlaka uyğun həddə çatdırılacaq.
"Azəriqaz" İstehsalat Birliyindən də bildirildi ki, əhalinin istehlakçı qruplarına verilən qazın sutkalıq həcmi artırıldığından problemlər yaranmayacaq. Bəzi ərazilərdə məhdudiyyətlərin tətbiq olunması magistral və birləşdirici qaz kəmərlərində aparılan tikinti-təmir işləri ilə əlaqədardır. Bayram günləri təmir işlərinə fasilə veriləcək.
"Azərsu" SC-dən də bildirildi ki, bayram günləri hətta borclu abonentlərin də mənzillərinin su ilə təchizatı dayandırılmayacaq.
X.AZƏR.

çap üçün verisya