Milli Məclisin yaz sessiyası başa çatsa da, deputatlar iyun ayında növbədənkənar sessiya çağırıblar. Artıq sessiyada müzakirə ediləcək məsələlərdən biri məlumdur. Parlament çoxdandır gözlənilən Hərbi Doktrina layihəsini müzakirəyə çıxarmağa hazırlaşır. İyunda keçirilməsi nəzərdə tutulan növbədənkənar sessiyada 2010-cu ilin dövlət büdcəsinə dəyişikliklər edilməsi ilə bağlı məsələ də müzakirəyə çıxarıla bilər. Bununla bağlı suallarımızı Milli Məclisin İqtisadiyyat Komitəsinin sədri Ziyad Səmədzadəyə ünvanladıq.

- Ziyad müəllim, maliyyə naziri Samir Şərifov mətbuata açıqlamasında 2010-cu ilin büdcəsinə dəyişikliklərin istisna olunmadığını bildirib. Siz bu barədə nə düşünürsünüz?
- Əvvəla qeyd edim ki, Azərbaycan iqtisadiyyatında dinamik sürət, inkişaf güclənməkdədir. İlin birinci rübü də artıq müsbət meyillərdən xəbər verir. Büdcə daxilolmalarında da artım var. Dövlət büdcəsi profisitlə icra olunmaqdadır. Eyni zamanda bildiyiniz kimi, ölkədə son günlər yaranmış təbii fəlakətlə əlaqədar olaraq çox ciddi işlər görülür. Onun vurduğu zərərin miqdarı hazırda müəyyənləşdirilir. Həmçinin qeyd edim ki, sözügedən təbii fəlakət zonasında yaşayan əhalinin sosial müdafiəsini gücləndirmək üçün Baş nazirin sədrliyi ilə müvafiq Dövlət Komissiyası yaradılıb. Çox güman ki, təbii fəlakət zonasında baş verənlər köklü surətdə təhlil ediləcək və bu baxımdan, görünür, bir sıra istiqamətlərdə də əlavə vəsaitlərə ehtiyac yaranacaq. Təbii, bu vəsaitləri də təcili surətdə ayırmaq lazımdır ki, dəymiş zərərlərin nəticələrini tezliklə aradan qaldırmaq mümkün olsun. Hesab edirəm ki, büdcəyə dəyişikliklərin nəzərdə tutulması da düşünülmüş addımlardır. Yəni büdcəyə dəyişikliklər elə-belə nəyinsə xatirinə edilmir. Reallığı obyektiv qiymətləndirən ölkə başçısı, Azərbaycan hökuməti yəqin ki, 2010-cu il üçün təsdiq edilmiş büdcə parametrlərində dəyişikliklər edəcək...
- Bu yöndə parlamentə konkret təkliflər daxil olubmu?
- Təkliflər daxil olmayıb, amma hazırda təbii fəlakət bölgəsində Dövlət Komissiyası işləyir və öz hesablamalarını aparır. Bu baxımdan, yəqin ki, yaxın günlərdə məsələyə aydınlıq gətiriləcək.
- Büdcəyə dəyişikliklər edilərsə, bu həm də büdcədən maliyyələşən təşkilatlarda işləyənlərin əməkhaqlarının, eyni zamanda pensiyaların artımına gətirib çıxara bilərmi?
- Onsuz da əməkhaqları bu il ərzində artacaq. Bunu cənab Prezident özü bəyan edib. Ancaq bu gün əsas məsələ təbii fəlakətlə bağlı dəymiş ziyanın obyektiv qiymətləndirilməsi məsələsidir. Dünyanın bütün ölkələrində, demək olar ki, bu cür təbii fəlakətlərə rast gəlmək mümkündür. Ancaq Azərbaycan hökuməti bütün bu çətinliklərə baxmayaraq, öz büdcəsinə dəyişiklik etməyi nəzərdə tutur. Düzünü desəm, mən indiyədək mətbuatda rast gəlməmişəm ki, hansısa ölkə öz büdcəsinə yenidən baxmaq istəyir. Lakin Azərbaycan hökuməti təcili qabaqlayıcı tədbirlər görmək, gələcəkdə belə hadisələrdən dəyən zərəri minimuma endirmək üçün büdcəyə baxmağı nəzərdə tutur.
- Yeri gəlmişkən, iqtisadçı-deputat həmkarlarınız dəfələrlə Büdcə Məcəlləsinin hazırlanması və qəbul olunması təklifi ilə çıxış ediblər. Bu sahədə də hansısa addımların atılması gözlənilirmi?
- Bilirsiniz, hər bir məsələnin öz vaxtı var. Dünyanın əksər ölkələrində Büdcə Məcəlləsi yoxdur. Büdcə sistemi ilə bağlı bu gün Azərbaycanın çox kamil, təkmil qanunları var və o qanunlar bizə beynəlxalq standartlara uyğun büdcə tərtibatını aparmağa imkan verir. Təbii ki, bütün qanunların bir sənəddə toplanması vacib məsələdir, amma bunun üçün həm vaxt lazımdır, həm də ayrı-ayrı qanunların fəaliyyət mexanizmini dərindən araşdırmaq gərəkdir. Bir sözlə, bunları araşdırmalı, ümumiləşdirmələr etməli və son qərar verməliyik. Yəni bu baxımdan mən gələcəkdə belə bir məcəllənin qəbulunu da istisna etmirəm.
- Millət vəkilləri tərəfindən həm də "Maliyyə nəzarəti haqqında" qanunun qəbul olunması yönündə israrlı təklif və tələblər səslənməkdədir...
- "Maliyyə nəzarəti haqqında" da qanunun qəbulu vacib məsələlərdəndir. İndi mən dəqiq deyə bilmərəm, bu məsələ qanun şəklində öz həllini tapacaq və ya qəbul edilmiş qanunlara dəyişikliklər olunacaq. Ancaq onu dəqiq bilirəm ki, bu yöndə əlimizdə kifayət qədər hüquqi mexanizm var. "Hesablama Palatası haqqında", "Büdcə sistemi haqqında", "Dövlət satınalmaları haqqında" qanunlar var, həmçinin bu yöndə digər icra mexanizmləri ortalıqdadır. Təbii ki, biz təzədən yeni orqanlar yaratmaq fikrində deyilik. Bizim fikrimiz ondan ibarətdir ki, qəbul edilmiş qanunların şəffaflığı təmin edilsin. Ancaq mən hələlik qəbul edilməsi gözlənilən "Maliyyə nəzarəti haqqında" qanunun strukturunu özüm üçün müəyyən edə bilməmişəm. Ya gərək qanunlar yığışıb bir yerdə olsun, ya da yeni qanun qəbul edilsin. Bununla yanaşı, bir daha qeyd edirəm, bu gün Hesablama Palatasının əlində kifayət qədər səlahiyyət var ki, istənilən dövlət müəssisəsini, büdcədən maliyyələşən təşkilatı yoxlasın, öz təkliflərini versin, bu təklifləri inzibati orqanlara göndərsin. Lakin Büdcə Məcəlləsinin qəbuluna ehtiyac var. Bunun üçün də gərək müəyyən hazırlıq işləri aparılsın.

Gülər KƏRİMLİ.

çap üçün verisya