Maraqlıdır, həmin çimərliklərə buraxılış pullu olmalıdırmı? Çimərliyə daxil olmaq üçün tələb olunan bir-birindən fərqli rəqəmlər hansı əsasla müəyyənləşdirilir? İmkanı olmadığı üçün bu çimərliklərdən istifadə edə bilməyən və müvafiq qurumlar tərəfindən çirklənmiş elan edilən çimərliklərə gedən vətəndaşlar hansı xəstəliklərə yoluxa bilər? Bunun məsuliyyətini kim daşıyacaq? Hələ də açıq qalan bu kimi suallara aydınlıq gətirmək üçün qısa bir araşdırma apardıq.
Məsələyə münasibət bildirən Bakı Şəhər Ticarət və Xidmət Departamentinin Mətbuat Xidmətinin rəhbəri Əliabbas Bağırovun sözlərinə görə, çimərliklərə giriş üçün pul tələb olunması qanunsuzdur: "Bakı Şəhər İcra Hakimiyyəti başçısının sərəncamına əsasən, şəhər ətrafında Xəzər dənizinə giriş pulsuzdur. Əgər kimsə dəniz sahilinə giriş üçün vətəndaşdan pul tələb edirsə, qanunu pozmuş olur. Həmin şəxslər hüquq-mühafizə orqanları tərəfindən cəzalandırılmalıdır. Yalnız duş kabinələri, sahil çarpayıları kimi xidmətlərə görə sahibkar pul ala bilər. Amma departament çimərliklərdə bu kimi xidmətlərin qiymətinin tənzimlənməsinə müdaxilə edə bilmir".
Respublika Gigiyena və Epidemiologiya Mərkəzinin Şöbə müdiri Zirəddin Kazımov bildirir ki, bu il aparılan monitorinqin nəticəsinə görə, Səbayel rayonu ərazisində yerləşən çimərliklərə, o cümlədən Qaradağ rayonu və Sahil qəsəbəsində olan çimərliklərə daxil olmaq qadağan edilib: "Çünki həmin çimərliklərdə bağırsaq çöplərinin miqdarı normadan artıqdır. Bu barədə bütün aidiyyəti dövlət orqanlarına müraciət etmişik. Bakı Şəhər İcra Hakimiyyəti, Fövqəladə Hallar Nazirliyi, Bakı Şəhər Baş Polis İdarəsi bununla bağlı məlumatlandırılıb. Bu qərarların surəti isə bütün sahibkarların diqqətinə çatdırılıb. Bağırsaq çöpləri normadan artıqdırsa, bu, mədə- bağırsaq xəstəliklərinin yayılması üçün real mənbədir. Amma o çimərliklərdən istifadənin qarşısını almaq səlahiyyətinə malik deyilik".
Həkim Adil Qeybulla isə hesab edir ki, çimərliklər təkcə bağırsaq çöplərinin miqdarına görə deyil, həm də orada ayrı-ayrı tullantıların olması səbəbindən orqanizm üçün zərərlidir: "Çirkli suların dənizə axıdılması, eyni zamanda müəyyən çürümə halları da dəniz suyunda təhlükəni artırır. Çimərlik suyu ilə birinci növbədə dəri təmasda olduğu üçün ilk təsirini də dəriyə göstərir. Çimərlklərdə dənizin dibi də araşdırılmalıdır. Lakin təəssüf ki, əksər çimərliklər bu gün istirahət yox, xəstəlik və ya gəlir mənbəyinə çevrilib".
Hüquqşünas Müzəffər Baxışov isə çimərliklərin sahibkarlara yalnız icarəyə verildiyini bildirdi: "Əslində onların icarəyə verilməsinin özündə də müəyyən məhdudiyyətlər var. Apardığımız qısa araşdırma göstərdi ki, həmin sahibkarların əksəriyyətinin heç icarə müqavilələri də yoxdur. Sadəcə həmin şəxslərin bəziləri o hissələri zəbt edərək fəaliyyət göstərir. Amma müəyyən dairələr tərəfindən himayə olunduqları üçün onlara toxunmurlar. Əslində isə həmin çimərliklərə giriş pullu ola bilməz. Yalnız bir halda həmin ərazilərə girişdə məhdudiyyətlər tətbiq oluna bilər. Bu da dövlətin təhlükəsizliyi üçün. Yəni sərhəd mühafizəsi, hərbi obyektlərin yerləşdirilməsi ilə bağlı müəyyən məhdudiyyətlər tətbiq oluna bilər. Belə məhdudiyyətlərin tətbiqi isə qanunla əsaslandırılmalıdır".
Hüquqşünas hesab edir ki, həmin torpaqlar hər hansı hüquqi və ya fiziki şəxsin mülkiyyətində olmadığına görə, onlar tərəfindən vətəndaşların çimərliklərə girişinin qadağan edilməsi yolverilməzdir: "Həmin sahibkarlar hər hansı çimərliyə pulla giriş qaydası müəyyənləşdirə bilməzlər. Deməli, baş verənlər qanunsuz hallardır. Çimərlik sahibləri yalnız göstərilən xidmətlə bağlı bu və ya digər şəxslərdən pul tələb edə bilərlər. Belə xidmətlərin haqlarına görə isə Vergilər Məcəlləsinin tələblərinə uyğun olaraq vətəndaşlara qəbzlər verilməlidir. Lakin reallıqda bu kimi qanunsuzluqlar davam etdirilir".
M.Baxışov bildirdi ki, çimərliklərdə məhdudiyyətlərlə üzləşən vətəndaşlar həmin şəxsləri məhkəməyə verə bilər: "Məhkəmə yolu ilə həmin sahibkarların qanunsuz fəaliyyətinə son qoyulmasını tələb edə bilərlər. Sadəcə respublikamızda vətəndaşlar qanun pozuntuları ilə barışıblar. Hətta daha kobud qanun pozuntusu ilə üzləşən insanlar da məhkəmələrə müraciət edərək öz haqlarını bərpa etmək istəmirlər".

çap üçün verisya