DÖVLƏT BAŞÇISI HÖKUMƏT ÜZVLƏRİNƏ SÜNİ QİYMƏT ARTIMI YARADANLARIN CƏZALANDIRILMASINI TAPŞIRIB

Azərbaycan hökuməti ilin əvvəllərindən nə qədər çalışsa da qiymət artımının qarşısını arzuolunan səviyyədə saxlaya bilməyib. Hökumət əsas hədəf kimi inflyasiyanın birrəqəmli həddə saxlanmasına çalışsa da, qiymət indeksi ikirəqəmli çevrəyə " ayaq qoyub". Artıq inflyasiya 16 faiz səviyyəsindən aşağı düşmür. Qiymət alovunun söndürülməsinə cəhd göstərən dövlət strukturlarını qayğılandıran başlıca hədəf inflyasiyanın yaranmasında süni faktorların dərin rol oynamasıdır. Doğrudur, qiymətlərin artmasında təbii amillər, yəni dünya bazarındakı iqtisadi proseslər, neftin bahalaşması və digər tendensiyalar da səbəblər sırasındadır. Bunu dövlət başçısı İlham Əliyev də 2007-ci ilin üçüncü rübünün sosial-iqtisadi yekunlarına həsr olunan müşavirədə xüsusi vurğulayıb. Prezident inflyasiyanın 16 faizə çatmasından narahatçılığını ifadə edərək bildirib ki, qiymət artımı hökuməti qayğılandıran başlıca məsələlərdəndir.
"Ərzaq məhsullarının bahalaşması 15 faiz həddindədir. Əlbəttə, bu, bizi narahat edir və çalışacağıq ki, inflyasiyanın səviyyəsini maksimum dərəcədə aşağı salaq". Qiymət artımı təbii ki, təkcə Azərbaycanın problemi olmadığından bu tendensiyanın baş verməsində xarici faktorları nəzərə almaq lazımdır. Xüsusilə də neftin dünya bazarında bahalaşması bütün dövlətlərin istehsal etdiyi məhsulların qiymətlərinin artmasına təsir göstərib. Prezident bu məqamı təhlil edərək bəzi dövlətlərdə qiymət artımının daha yüksək olmasını bildirib. "Əgər MDB məkanına nəzər salsaq görərik ki, o ölkələrdə də inflyasiya çox sürətlə davam edir. hətta bəzi ölkələrdə son bir neçə ay ərzində ərzaq məhsulları 40-50 faiz bahalaşıbdır". Prezident qiymət artımına səbəb olan subyektiv amillərin daim nəzarətdə saxlanmasına və mübarizənin lazımi effekt verməsinə toxunaraq, bir sözlə, təbii meyillərin qarşısının alınmasında hökumətin ən qəti addımlar atmaq iqtidarında olduğunu söyləyib. "Biz təbii səbəblərə qarşı iqtisadi islahatlarla, makroiqtisadi addımlarla mübarizə apara bilərik".
Amma dövlət başçısının məmurlara xəbərdarlığında daha çox inflyasiyanın yaranmasında daxili faktorlar, yəni süni qiymət artımı problemi diqqətdən yayınmadı. Çünki süni şəkildə yaradılan qiymət artımı təbii faktorlardan daha təhlükəlidir və hökumətin apardığı islahatların , sosial inkişaf tədbirlərinin gücünü aşağı salır. Bu məsələdə isə əsas günahkarlar inhisarçılar olduğundan iqtisadiyyatda sağlam biznes mühitinə vurulan zərərin miqyası daha da böyüyə bilər. Ölkə başçısı bu problemin meydana çıxmasında həm dövlət qurumlarının, həm də sahibkarların üzərinə böyük məsuliyyət düşdüyünü vurğulayaraq inhisarçılarla barışmayacağını bəyan edib. İnhisarçılıq, qeyri-sağlam rəqabət halları ümumi işin səmərəsinə zərər vurduğundan Prezident həmin halların yaranmasında bilavasitə iştirakçı olan şəxslərin cəzalandırılmasını xəbərdar edib. "Süni səbəblərə qarşı isə biz gərək çox ciddi siyasət aparaq. İnzibati addımlar atılmalıdır, bu problemləri yaradan şirkətlərə qarşı sanksiyalar tətbiq olunmalıdır. Onlar çox ciddi cəzalandırılmalıdır ki, Azərbaycanda sağlam rəqabət mühiti möhkəmlənsin, inhisarçılığa son qoyulsun. Əfsuslar olsun ki, həm idxalda, həm də yerli istehsalda inhisarçılıq meyilləri hələ də qalmaqdadır. Buna qarşı böyük mübarizə aparılmalıdır. Bu, öz növbəsində, inflyasiyanın birrəqəmli səviyyədə qalmasına kömək göstərəcəkdir".
Hökumət həm təbii, həm də süni amillərin qarşısının alınmasında məqsədyönlü kompleks tədbirlər planı həyata keçirmək üçün bütün vasitələrdən istifadə etmək niyyətindədir. Başlıca məqsəd bundan ibarətdir ki, bu il inflyasiya birrəqəmli səviyyədə qorunub saxlansın. Prezident əmin olduğunu bildirib ki, 2008-ci ildə inflyasiya birrəqəmli səviyyədə olacaq. Çünki qiymət artımının baş verməsi üçün hər hansı bir obyektiv faktor olmayacaq. Daha doğrusu, hökumət enerji daşıyıcılarının və digər kommunal xidmət növlərinin artırılması barədə qərar qəbul etməyi planlaşdırmır. Bu isə bazarda qiymətləri artırmaq istəyən şəxslərin hansısa iqtisadi vasitələrdən istifadə etmək planlarının üstündən xətt çəkir. "2008-ci ildə heç bir kommunal ödənişlərin qaldırılması nəzərdə tutulmur. Bildiyiniz kimi, bu ilin əvvəlində elektrik enerjisi tariflərinin qaldırılması inflyasiyaya ən böyük təkan verən bir amil olmuşdur". Göründüyü kimi kommunal xidmət tariflərinin artırılmadığı təqdirdə inflyasiyanın səviyyəsinin artmasına heç bir səbəb yoxdur. Və ortaya real bir arqument çıxır, qiymət artımı birbaşa yerli inhisarçıların varlanmaq iştəhasının nəticəsidir.

çap üçün verisya