HÖKUMƏT XARİCİ İNVESTORLARIN TƏHLÜKƏSİZLİYİNƏ TƏMİNAT VERİB

PKK terrorçularının BTC-nin Türkiyə hissəsində neft kəmərini partladacaqları barədə bəyanatı və ardınca vəhhabilik təriqəti altında gizlənmiş dini ekstremistlərin Azərbaycanın ən yaxın iqtisadi tərəfdaşları olan ABŞ və Böyük Britaniya vətəndaşlarına sui-qəsd planlarına dair xəbərdarlığı iqtisadi sabitliyin gücləndirilməsinin zəruriliyini ortaya çıxarıb. Azərbaycan regionda iqtisadi layihələrin strateji məkanı və xarici sərmayələrin ən çox yatırıldığı dövlət kimi əcnəbilərin nüfuz dairəsinə daxil olduğundan hər hansı əcnəbi iş adamına qarşı sui-qəsd, yaxud onun biznesinə təhlükə Azərbaycanın iqtisadi siyasətinə zərbə kimi də dəyərləndirilə bilər.
Əcnəbi investor hansısa dövlətə sərmayə yatırmaq istəyərkən əvvəlcə oradakı sabitliyi əsas götürür, özünün təhlükəsizliyinə və investisiyasının qorunmasına təminat istəyir. ABŞ və Böyük Britaniyanın diplomatik korpuslarının fəaliyyətinin məhdudlaşdırılması da xatırlatdığımız qorxulu tendensiyanın yaranması üçün bəzi sərmayəçilərə stimul verə bilər.

AMERİKA VƏ İNGİLİS ŞİRKƏTLƏRİ BİZNESLƏRİNƏ TƏHLÜKƏ GÖRMÜR

Azərbaycanda ingilis və amerikan biznesinin dərin iqtisadi köklərə malik olması, ən nəhəng neft və qaz layihələrinin bu ölkənin şirkətləri tərəfindən həyata keçirilməsi həqiqətən də terrorçuların nəzərinə gələ bilər.
Təbii ki, terror amili biznes üçün risk kateqoriyasına daxil olduğundan Azərbaycan həmin qruplaşmanı zərərsizləşdirmək üçün bütün vasitələrdən istifadə etməlidir. Hər iki ölkənin səfirliyi ehtiyatlı davranmağa çalışsa da biznes qurumları əvvəlki günlərdəki kimi adi iş rejimində fəaliyyət göstərməkdədir.
Bir məqam daha çox diqqəti cəlb edir, Amerikanın və İngiltərənin iqtisadi şəbəkəsi respublikamızda neft-qaz və bank sektorunu əhatə etdiyindən siyasi sabitliyin pozulmasına yönələn cəhd birbaşa bu şirkətlərin fəaliyyəninə də təsir edə bilər. Özü də həmin təşkilatların Azərbaycanda həyata keçirdiyi layihələrin dəyəri milyardlarla dollara bərabərdir, həmin kapitalın təhlükəsizliyinə zəmanət üçün təhlükəsizlik böyük önəm daşıyır.
Xarici investorların bu gün tam sərbəst və öz ölkələrində olduğu kimi heç nədən ehtiyat etmədən çalışması Azərbaycanın bütün əcnəbi sərmayəçilərə təminat verməsidir, onların hüquqlarını qorumasıdır, siyasi və iqtisadi sabitliyin etibarlı qorunmasıdır.
Məsələn, Böyük Britaniyanın "BP" şirkəti son hadisələrə baxmayaraq təhlükəsizliyin gücləndirilməsinə əsas görmür və fəaliyyətini məhdudlaşdırmaq barədə düşünmür. "BP"-nin əsas fəaliyyəti Bayıldakı ofislə bağlıdır və bu binaya əlavə olaraq təhlükəsizlik tədbirlərinin gücləndirilməsi məqsədilə hər hansı bir qüvvə cəlb edilməyib.

BP ŞİRKƏTİ, DÜNYA BANKI, VALYUTA FONDU VƏ AVROPA BANKI ƏVVƏLKİ İŞ REJİMİNDƏDİR

Böyük Britaniyanın başqa bir maliyyə strukturu olan Avropa Yenidənqurma və İnkişaf Bankı da əvvəlki iş rejimi ilə fəaliyyət göstərir. Bankın mətbuat xidmətinin rəhbəri Sona Abbasova bildirib ki, Böyük Britaniyaya məxsus kompaniyalara və ingilislərin çalışdığı ofislərə təhlükələrin olması barədə məlumatlar bankın iş qrafikinə təsir göstərə bilməz.
Avropa Bankı Azərbaycanla sıx tərəfdaşlıq strategiyasına uyğun olaraq nəzərdə tutulmuş layihələrin reallaşmasına dəstəyini daha da artıracaq. Bankın vitse-prezidenti Bakıda hökumət üzvləri ilə görüşüb və səfər zamanı Azərbaycanın bank sektoruna növbəti maliyyə yardımlarının ayrılması məqsədilə bir neçə kommersiya bankı ilə memorandum imzalanıb.
ABŞ-ın ən böyük maliyyə strukturlarından olan Dünya Bankı da hansısa təhlükənin olmasından ehtiyatlanmayaraq, Azərbaycanda biznes fəaliyyəti üçün normal şəraitindən razıdır.
Terror təhlükəsi barədə məlumatlar narahatçılıq yaratmır, çünki Azərbaycanda təhlükəsizliyin hansı səviyyədə olması göz qabağındadır. Dünya Bankı Azərbaycanda iqtisadi azadlığın və rəqabət mühitinin olmasını əsas götürərək bütün layihələrin qrafik üzrə maliyyələşdiriləcəyini əmin edir.
Mərkəzi ofisi Vaşinqtonda yerləşən və inkişaf etməkdə olan dövlətlərə maliyyə yardımları göstərən Beynəlxalq Valyuta Fondu da Azərbaycanın sərmayələr üçün əlverişli məkan olduğunu açıqlayıb. Bankın ölkəmizdəki nümayəndəliyində hesab edirlər ki, davamlı iqtisadi-siyasi sabitlik xarici investorların fəaliyyətinin daha da genişlənməsinə təkan verib. Azərbaycan bütün xarici sərmayəçilər üçün bərabər rəqabət prinsiplərinin yaradıldığı ölkələr sırasında əsas yerlərdən birini tutur. BVF ilə bərabər, Beynəlxalq Maliyyə Korporasiyası da Azərbaycanı sərmayələrin etibarlı şəkildə qorunduğu dövlətlərdən biri hesab edir.

İQTİSADİ-SİYASİ SABİTLİK XARİCİ İNVESTORLAR ÜÇÜN BAŞLICA ŞƏRTDİR

Hökumət iqtisadi fəallığın tempinin aşağı düşəcəyi barədə informasiyalardan qayğılanmır. İqtisadi İnkişaf Nazirliyi isə əmin edir ki, respublikamız dinamik inkişaf edən stabil dövlətlərdən biri olduğundan və bütün investorların hüquqları bərabər qaydada qorunduğundan dini ekstremizm və yaxud terror meyillərinə cəhdlər davamlı biznes erasının inkişafını əngəlləyə bilməz.
Azərbaycan bütün xarici sərmayəçilər üçün açıq ölkədir və investisiyaların ilbəil artım tempi bir daha ölkəmizdə şəffaf biznes mühitinin təmin olunduğunu təsdiq edir. Buna isə başlıca səbəb dövlət başçısının xarici sərmayəçilərin hüquqlarının qorunması üçün mühüm addımlar atması və respublikamızdakı iqtisadi-siyasi sabitliyin təmin edilməsidir.

çap üçün verisya