BİR ÇOX TİBB MÜƏSSİSƏLƏRİNİN LİSENZİYALARI LƏĞV EDİLDİ

Səhiyyə Nazirliyi Vergilər Nazirliyi və hüquq-mühafizə orqanları ilə birgə əczaçılıq bazarında nizam-intizam yaratmaq məqsədi ilə apteklərdə baxış keçirir. Məqsəd qeyri-qanuni fəaliyyət göstərən tibb və əczaçılıq müəssisələrində vergi siyasətinin pozulmasının qarşısını almaqdan ibarətdir. Nazirlikdən verilən məlumata görə, son 3 ay ərzində lisenziyası olmayan tibb və əczaçılıq fəaliyyəti ilə qeyri-qanuni məşğul olan fiziki və hüquqi şəxslərə qarşı İnzibati Xətalar Məcəlləsinin tələblərinə əsasən 75 protokol tərtib edilib. Həmin müəssisələrə qarşı cərimələr tətbiq olunub. Lisenziyanın şərtlərinə riayət etmədiklərinə görə isə 3 aptekə verilmiş xüsusi razılıq sənədi ləğv edilib.Qeyri-qanuni xalq təbabəti ilə məşğul olan 1 tibb müəssisəsinin fəaliyyəti dayandırılıb.
Səhiyyə Nazirliyinin mütəxəssisləri həmçinin Bakı şəhərində yerləşən cərrahi profilli xidməti göstərən özəl tibb müəssisələrində də baxışları davam etdirir. Yoxlamalar zamanı tibb müəssisələrindəki xidmətin təşkili, ixtisaslaşdırılmış kadr seçimi, standartlara uyğun tibb avadanlıqları və dərman vasitələri ilə təchizat, tibbi sənədləşmənin düzgün aparılması, sanitar-epidemioloji normativlərə riayət edilməsi nəzərdən keçirilib. Monitorinqlər zamanı özəl tibb müəssisələrində vəziyyət müsbət qiymətləndirilib. Belə ki, müasir diaqnostik-müalicəvi avadanlıqları ilə təchizat, peşə hazırlıqlı ixtisas həkimlərin fəaliyyəti SN tərəfindən razılıqla qarşılanıb. Amma bununla yanaşı, baxış keçirilərkən Səhiyyə Nazirliyinin mütəxəssisləri tərəfindən bir sıra ciddi nöqsan və çatışmazlıqlar da aşkar edilib. Belə ki, bəzi özəl tibb müəssisələrinin müalicə və müayinə kabinetlərinin quruluşuna və təchizatına görə sanitariya-gigiyena normalarına cavab vermədiyi aşkar olunub.
İş ondadır ki, özəl tibb müəssisələrinin bəzilərində QİÇS-lə mübarizə tədbirlərinin profilaktikasında da qanunsuzluqlar üzə çıxıb. Bu, yoluxucu xəstəliklərin, QİÇS-in və hepatitlərin əhali arasında yayılmasına şərait yaradılan amil kimi qiymətləndirilib. Monitorinqlər zamanı həm də tibb personalının sanitar-gigiyena qaydalarına əməl etməməsi nəticəsində tibbi ləvazimatlardan və cərrahi əməliyyata gedən tibb personalından götürülən yaxma nümunələrində bağırsaq çöplərinin, həmçinin müayinə zamanı işçilərin bəzilərinin qızılı stafilokokk daşıyıcıları olması aşkar edilib. Acınacaqlı hal odur ki, bu xəstəliyin daşıyıcılarının arasında həkim-otolarinqoloq və yeni doğulmuşlara qulluq göstərən həkim və orta tibb işçilərinə də rast gəlinib. Bu fakt bir daha onu təsdiq edir ki, bəzi özəl tibb müəssisələrində cərrahi, doğuşa yardım, yenidoğulmuşlar şöbələrində çalışan tibb işçilərinin dövri tibbi müayinədən keçirilməsi düzgün aparılmır. Müəssisələrin birində baxış keçirən mütəxəssislər belə bir acınacaqlı faktla rastlaşıblar. Belə ki, qadınlarda hamiləliyin "süni pozulması" əməliyyatı aparılsa da, bu faktlar müəssisə tərəfindən gizlədilərək heç bir tibbi sənədləşmədə qeydə alınmayıb. Lisenziyalaşdırılan tibb müəssisələrinə konkret fəaliyyət növləri üzrə icazə verildiyi halda, həmin müəssisələr qeyri-qanuni profilinə uyğun olmayan digər cərrahi əməliyyatlar da həyata keçirib. Ən acınacaqlısı budur ki, bu əməliyyatları həyata keçirən həkimlər barədə həmin müəssisələrdə onların işə qəbul edilməsi haqqında əmr verilməyib və onlarla əmək müqavilələri bağlanmayıb. Hətta həmin şəxslərdən tibbi təhsilini təsdiq edən diplom və digər sənədlər tələb edilməyib.
Səhiyyə Nazirliyinin məlumatına görə, bəzi özəl tibb müəssisələrində psixotrop dərman preparatlarının alınması, saxlanılması, buraxılması və istifadə edilməsi qaydalarına da riayət edilməyib. Aşkar olunmuş ciddi nöqsan və çatışmazlıqlar ilə əlaqədar nazirlik 2 müəssisəyə - "ABU Göz" və "ABU Endo" tibb müəssisələrinə verilmiş lisenziyaları ləğv edib, 1 müəssisənin- "OFKO" Oftalmoloji Kompleksin isə lisenziyasının fəaliyyəti dayandırılıb. "Ortoped" MMC,"City Hospital" və "Kəbirə Tibb Mərkəzi"nin isə fəaliyyəti təmir-yenidənqurma işlərinin aparılması və nöqsanların aradan götürülməsi məqsədi ilə müvəqqəti dayandırılıb. SN "Leyla Şıxlinskaya" Klinikasına nöqsanları aradan götürmək barədə xəbərdarlıq edib. Nazirlik özəl tibb müəssisələrinə baxışları davam etdirdiyini bəyan edib.

çap üçün verisya