BU SAHƏDƏ HƏMKARLAR İTTİFAQLARININ SİYASƏTİ HAZIRLANACAQ


İl ərzində 4 milyon insan alverin qurbanına çevrilir. Hesablamalara görə, insan alverindən bir ildə 7 milyard ABŞ dolları gəlir əldə olunur ki, bu da narkotik və silah alverindən sonra dünyada üçüncü böyük cinayət biznesidir.

Daha çox qadınlar insan alverinin qurbanlarına çevrilirlər. Çünki bir çox cəmiyyətdə qadınlar və qızların həyatına kişilərin və oğlanların həyatlarından daha az dəyər verirlər. Bundan əlavə, yetim uşaqların sayının artması (vətəndaş müharibələri və QİÇS) nəticəsində xüsusilə azyaşlıların başçılıq etdiyi ailələrin də insan alverinin toruna asanlıqla düşmək ehtimalını artırır.

Azərbaycan vətəndaşları əsasən Hollandiya, Almaniya, İsveç, Rusiya və Türkiyəyə üz tutmağa üstünlük verirlər. Bu siyahıya Yunanıstan, Fransa, Norveç, Çexiya, Polşa, Çin, Suriya, Ekvador, Bolqarıstan, Yaponiya və s. ölkələri də aid etmək olar.

Son 4 ildə viza rejimini pozduğuna görə 1000-ə yaxın azərbaycanlı Qərbi Avropa dövlətlərindən deportasiya olunub. Bundan başqa, son illər Türkiyədən 700, BƏƏ-dən isə 600 azərbaycanlı qadın çıxarılıb.

Yanvarın 17-də AHİK Beynəlxalq Əmək Təşkilatının (BƏT) dəstəyi ilə "Abşeron" otelinin 16-cı mərtəbəsindəki konfrans zalında miqrasiya və insan alveri sahəsində həmkarlar ittifaqları siyasətinin hazırlanmasına həsr olunmuş seminar keçirmişdir.
Seminara Konfederasiyanın üzv və tabeliyindəki təşkilatların rəhbərləri dəvət olunmuşdular.
Tədbiri AHİK-in zəhmətkeşlərin mədəni-məişət problemləri üzrə analitik tədqiqat şöbəsinin müdiri Namiq Hüseynov açdı. O, "Miqrasiya və insan alveri, Azərbaycanda ümumi vəziyyət, insan alverinə qarşı görülən tədbirlər" haqqında ətraflı məruzə etdi. Natiq seminarın əsas məqsədinin miqrasiya və insan alveri problemləri barədə üzv təşkilatların məlumatlılıq səviyyəsinin artırılmasından, "beyin hücumu"-yenilikçi ideyaların, yaradıcı, intellektual fəallığın stimullaşdırılması üsulu vasitəsilə uzunmüddətli perspektivdə həmkarlar ittifaqlarının siyasət sənədinin və fəaliyyət planının işlənib hazırlanmasından ibarət olduğunu açıqladı. Sonra BƏT-in milli layihə koordinatoru Elnur Nəsibov ötən müddətdə ölkədə insan alverinə qarşı mübarizədə əsas vəzifələrin icra edilməsində müxtəlif qurumların iştirakını və onların fəaliyyətinin əlaqələndirilməsi sahəsində vəziyyətdən bəhs etdi. O, Azərbaycanda insan alverinə qarşı cavab mexanizmlərinin inkişafı üzrə BƏT-in sənəd layihəsinin prezentasiyasını keçirdi.
Bu məqalənin müəllifi "Azərbaycanda insan hüquqları və həmkarlar ittifaqları hərəkatı" mövzusunda məruzə etdi.
Daha sonra seminar iştirakçıları tərəfindən “İnsan alveri, qanunvericilik bazası, problemin qarşısının alınmasında cavab mexanizmləri və həmkarlar ittifaqları təşkilatlarının rolu, "qurban"ların müdafiəsi və yardımlar” mövzuları ətrafında müzakirələr aparıldı.
İştirakçılardan: Mədəniyyət İşçiləri Müstəqil HİRK-in sədri Cəmilə Səttarova, Dövlət İdarələri və İctimai Xidmət İşçiləri HİRK sədrinin müavini Aida Əliyeva, Səhiyyə İşçiləri HİRK sədrinin müavini Aida Manafova trafikinqə məruz qalmış insanların cəmiyyətə yenidən inteqrasiyası və onların pilləli reabilitasiyası, ölkənin regionlarında yeni açılan müəssisələrdə həmkarlar ittifaqı təşkilatlarının yaradılması və s. təklifləri irəli sürdülər. Sahibkarlıq və Elm, Elmi İstehsalat Müəssisələri İşçiləri Müstəqil HİRK-in sədri Tofiq Quliyev, Avtonəqliyyat və Yol Təsərrüfatı İşçiləri Müstəqil HİRK-in sədri Etibar Əliyev "Xidmət İş" Hİ Federasiyasının vitse-prezidenti Səadət Tahirova, Təhsil İşçiləri Azad HİRK-in sədr müavini Şaiq Əsgərov, Yerli Sənaye və Kommunal Məişət Müəssisələri Fəhlələrinin HİRK sədri Azər Cəfərov, Toxuculuq və Yüngül Sənaye İşçiləri Müstəqil HİRK-in sədri Nərgizxanım Məmmədova problemə dair həmkarlar ittifaqlarının hazırlayacaqları sənəddə ilk növbədə maarifləndirmənin və eləcə də inzibati nəzarətin gücləndirilməsi bəndlərinin təsbit edilməsinə tərəfdar çıxdılar. İnsan alveri "qurban"larının hüquqlarının ittifaq üzvlərinin mənafelərinin müdafiəsi ilə həmahəng aparılmasının zəruriliyini qeyd etdilər.
Bu kimi seminarların işinin daha səmərəli təşkili üçün paylanmış sosioloji sorğu anketindəki suallar da cavablandırıldı.
Seminar iştirakçıları yekdilliklə miqrasiya və Azərbaycanda insan alverinin profilaktikasının, bu problemə qarşı mübarizənin hüquqi və təşkilati əsaslarının yeniləşdirilməsinin vacibliyini qeyd etdilər. İlkin tədbirlər sırasında monitorinq və qiymətləndirmə prosesinin təşkilini, ictimai şüurun inkişafına xidmət edən maarifləndirməni prioritet istiqamət kimi müəyyənləşdirdilər.

Oktay ABBASOV,
AHİK-in mütəxəssisi.

çap üçün verisya