Respublika Gigiyena və Epidemiologiya Mərkəzindən aldığımız məlumata görə, vaxtaşırı olaraq şadlıq evlərində verilən ərzaq məhsullarının monitorinqi aparılır. Mərkəzin şöbə müdiri Zirəddin Kazımov monitorinq zamanı əhaliyə verilən bütün isti və soyuq yeməklərin, içkilərin tərkibi və yararlılığının yoxlanıldığını bildirir: "Həmin obyektlərdə ziyafətlər zamanı verilən bütün növ yeməklər, salatlar, içkilərin yararlılığı araşdırılır. Dəfələrlə müştəriyə keyfiyyətsiz ərzaqdan hazırlanmış yeməklər təklif olunduğunu üzə çıxarmışıq. Əhaliyə təklif edilən spirtli və spirtsiz içkilərin də əksəriyyəti standartlara cavab vermir. Məsələn, ötən il ərzində aparılan yoxlamalar zamanı iaşə obyektlərindən 760 nümunə götürülüb. 400-dən artıq nümunənin standartlara uyğun olmadığı üzə çıxıb. 43 obyekt cərimələnib. Ümumilikdə isə cərimələnən obyektlərin sayı 400-dən artıqdır. Nöqsanlar aşkarlanan 156 iaşə obyektinin fəaliyyəti dayandırılıb".
Z.Kazımovun sözlərinə görə, bir çox iaşə obyektlərində sanitar-gigiyenik şərtlərə riayət edilmir: "İşçilərin sayının dəfələrlə az göstərildiyi, həmçinin əməkdaşların tibbi müayinədən keçmədiyi halları kifayət qədərdir. Qeyri-ixtisaslı şəxslər aşbaz və ofisiant kimi işə götürülür".
Z.Kazımov dedi ki, cari ildə şadlıq evlərinin monitorinqi iki mərhələdə aparılacaq: "Monitorinq aparılarkən restoran və şadlıq evləri seçmə üsulla müəyyənləşdirilir. Seçim zamanı əhalidən mərkəzə daxil olan şikayətlər də nəzərə alınır. Mərkəz mütəxəssislərilə yanaşı, rayon şöbələri də ayrı-ayrılıqda ərazilərindəki şadlıq evlərinə reydlər keçirirlər. Bu dəfə ötən il monitorinq keçirilən şadlıq evləri deyil, digərləri nəzarətə götürüləcək. Hər şadlıq evində növbəti monitorinq 6, yaxud 9 aydan sonra aparıla bilər. Bu il keçiriləcək monitorinqlərdə şadlıq evlərində çalışanların tibbi müayinəyə cəlb edilməsi və həmin müəssisələrin vergidən yayınmasının qarşısının alınması diqqət mərkəzində olacaq".

"Paytaxtda ancaq restoranlar üçün işləyən gizli sexlər
fəaliyyət göstərir"

Azad İstehlakçılar Birliyinin sədri Eyyub Hüseynovun sözlərinə görə, hazırda paytaxtda ancaq şadlıq evləri və restoranlar üçün işləyən gizli sexlər fəaliyyət göstərir. Həmin qeyri-qanuni sexlərdə araqlar, sərinləşdirici içkilər, şirələr və qida məhsulları istehsal edilir. Saxta məhsulların ən çox realizə olunduğu yer isə restoran və şadlıq evləridir. Bu məsələdə şəffaflığın olmamasının səbəblərindən biri də istehlakçıların hüquqlarını bilməmələridir. Onların mətbəxə daxil olub, hazırlanan yeməklərin tərkibi ilə tanış olmaq imkanları yoxdur. Restoranlarda keçirilən şadlıq tədbirləri zamanı tərəflər şifahı razılığa gəlir və heç bir müqavilə imzalanmır. Buna görə də tədbir sahibi yeməklərin hazırlandığı məhsulların yalnız adı haqqında məlumat ala bilir. Onların keyfiyyəti barədə isə heç bir bilgiyə malik olmur. Halbuki hər bir şəxs istehlak etdiyi məhsulun mənşəyi, qiyməti barədə sənəd tələb etmək, hətta məhsulu ekspertizaya göndərmək hüququna malikdir. Xidmət sahəsi isə ekspertizanın nəticəsini alıb 3 gün ərzində istehlakçıya məlumat verməlidir. Göründüyü kimi, qanunlar istehlakçının öz hüquqlarını qoruması üçün tam şərait yaradır. Əksər istehlakçılar bilərəkdənmi, bilməyərəkdənmi qanunların yaratdığı şəraitdən istifadə etmək istəmirlər. Məsələn, menyunun və kassa çekinin olması əslində istehlakçı ilə bağlanan müqavilədir. Amma müştərilərə istehlak etdikləri mal üçün çek verilmir. O, zəhərlənərsə heç kimə sübut edə bilməz ki, harada, hansı ərzaqdan zəhərlənib və məsuliyyəti kim daşıyacaq".
E.Hüseynovun sözlərinə görə, bir sıra xarici ölkələrdə istehlakçı restoranda quraşdırılan monitorlar vasitəsilə mətbəxdə görülən işləri, yeməklərin hazırlanması prosedurunu izləyə bilir: "Azərbaycanda isə bu şəkildə, yəni "açıq mətbəx" prinsipi ilə işləyən restoranlar barmaqla sayılacaq qədər azdır. Mətbəxləri istehlakçıların üzünə bağlamaq, orada baş verənləri gizləmək nadanlıq əlamətidir. Belə halların qarşısının alınması üçün Azərbaycan hökumətinin istehlakçı siyasəti formalaşdırılmalıdır. Digər tərəfdən isə, istehlakçılar maarifləndirilməlidir".

çap üçün verisya