Neft və Qaz Sənayesi İşçiləri Həmkarlar İttifaqı Respublika Komitəsi Dövlət Neft Şirkətinin Q. Abbasov adına mədəniyyət sarayı ilə birlikdə Bakının Nizami rayonunda yaşayan və xüsusi qayğıya ehtiyacı olan uşaqlar üçün "Ramazan-2007" adı altında bayram şənliyi keçirmişdir. Tədbirin əvvəlində həmin rayondan deputat seçilmiş ARDNŞ-in prezidenti Rövnəq Abdullayevin təbrik məktubunu Elmira Şerdayeva oxudu və 100 uşağın hər birinə içinə dərs ləvazimatı yığılmış məktəb çantası payladı.

HÖKUMƏT "BARMEK" FACİƏSİNİN TƏKRARLANMASINA YOL VERMƏMƏLİDİR

Hökumət "Barmek" və "Bayva" şirkətləri ilə idarəetməyə dair müqavilələri ləğv etdikdən sonra paylayıcı şəbəkələri yenidən idarəetməyə vermək qərarına gəlib. Artıq "Sumqayıtelektrikşəbəkə" ASC və "Şəki Regional Enerji Təchizatı" MMC-nin idarəetməyə verilməsi barədə qərar qəbul edilib. Yeni qərara əsasən, Sumqayıt, Dəvəçi, Xızı, Siyəzən, Xaçmaz, Quba, Qusar, Şəki, Qax, Balakən, Zaqatala, Oğuz rayonlarının paylayıcı elektrik şəbəkələri özəl şirkətlər tərəfindən idarə olunacaq. Dövlət Əmlakının İdarəedilməsi üzrə Dövlət Komitəsində hesab edirlər ki, qalib şirkət daha sərfəli təkliflər verən iddiaçılar arasından seçiləcək.

MİSİR MƏRDANOV: I VƏ XI SİNİF ŞAGİRDLƏRİNƏ BÜTÜN DƏRSLİKLƏR PULSUZ PAYLANACAQ

Bu gün yeni tədris ili başlayır və orta ümumtəhsil məktəblərinə 1 milyon 517 min 844 şagird yollanacaq. Təhsil naziri Misir Mərdanov bildirib ki, orta məktəblərə gedən birinci sinif şagirdlərinin sayı isə 120 min 309 nəfər olacaq. Məktəb partası arxasında ilk dəfə oturacaq birincilərin 1564 nəfəri gimnaziya və liseylərdə təhsil alacaq.
27 min 800 şagird isə Bakı Şəhəri üzrə Təhsil İdarəsinin tabeçiliyində olan məktəblərdə dərs keçəcək. 2007-2008-ci tədris ilində təhsil alan şagirdlər üçün 155 adda 5 milyon 185 min kitab çap olunub. Onların 60 faizi yeni orijinal dərs vəsaitləridir. Həmin dərsliklərin artıq orta məktəblərə çatdırılması təmin edilib.

GİGİYENA VƏ EPİDEMİOLOGİYA MƏRKƏZİ ŞADLIQ EVLƏRİNDƏ YOXLAMALARA BAŞLAYIB

Binə, Bərdə və Xanlarda toy məclislərində baş verən kütləvi şəkildə zəhərlənmələrin baş verməsi Gigiyena və Epidemiologiya Mərkəzini şadlıq evlərində yeməklərin və içkilərin saxlanma şəraiti ilə bağlı araşdırmaları gücləndirməyə məcbur edib.
Mərkəz qida zəhərlənmələri ilə əlaqədar ictimai iaşə müəssisələrində, restoranlarda, şadlıq evlərində və digər ticarət obyektlərində yeyinti məhsullarının keyfiyyətini yoxlamaq məqsədi ilə monitorinqlərə başlayıb. Mərkəzin şöbə müdiri İmran Abdullayev bildirib ki, gigiyenik rejimə riayət etməyən obyektlərə qarşı cərimələr tətbiq olunacaq, bəzi obyektlərin fəaliyyətinin dayandırılması istisna edilmir.

Dünya Bankı Bakı-Tbilisi-Qars dəmir yolunun tikintisinə maliyyə ayırmaq barədə fikrini bəyan edib. Bankın missiya rəhbəri Piter Tomson təkcə Azərbaycanın deyil, həm də region üçün mühüm əhəmiyyət daşıyan Bakı-Tbilisi-Qars layihəsinə DB-nin qoşulmasının mümkünlüyünü söyləyib.
P.Tomson deyib ki, bu layihənin reallaşmasına səy göstəriləcək. Xatırladaq ki, bir müddət əvvəl Avropa Yenidənqurma və İnkişaf Bankı da BTQ-ni maliyyələşdirmək barədə bəyanatla çıxış edib.

Dağlıq Qarabağa səfər edən Azərbaycanın tanınmış ziyalılarının təəssüratları ictimai rəydə müxtəlif yöndən təhlil olunmaqdadır.Artıq səfərin sülh barışığına hesablanmış "ssenarinin" cizgiləri kimi qiymətləndirənlərin sayı çoxalmaqdadır. Xalq diplomatiyası uğurla yekunlaşsa tərəflərin tətiyi çəkməyə ehtiyacı olmayacaq. İş ondadır ki, erməni məkr dolu erməniliyindən əl çəkməlidir. Ziyalı nümayəndə heyətinin görüşündə maraq doğuran detallar diqqəti çəkməyə bilmir.Yadınızdadırsa , ötən ayın ortalarında Sankt-Peterburqda hər iki ölkənin dövlət başçılarının görüşündən öncə Bakıda və İrəvanda Minsk Qrupunun həmsədrləri işğal olunmuş 7 rayonun boşaldılması və burada bərpa işlərinin vəziyyəti barədə açıqlamalar verirdilər. Ziyalıların tərkibində Şuşa şəhərinin keçmiş baş memarı İlhami Fətəliyevin yer alması Qarabağda dağıdılmış abidə və maddi sərvətlərin bərpa prosesinə tələb olunan vəsaitin məbləğinin hesablanması baxımından bu səfərin "kəşfiyyat” xarakteri daşıdığı ehtimalını da yaradır.

DÜNYA BANKI HÖKUMƏTƏ YIĞIM KOMPONENTİNİN TƏTBİQİNİ TÖVSİYƏ EDİB

Bəzi müəssisə və təşkilatlarda işçilərin əmək müqaviləsiz işləməsi və əməkhaqlarının ikili mühasibat sistemində aparılması sosial sığorta haqlarının yığılmasına mənfi təsir göstərir.
Dövlət Sosial Müdafiə Fondunun sədri Səlim Müslümov bildirib ki, bundan ən çox zərər çəkənlər işçilərin özləri olacaq: "Əmək müqaviləsiz işləyən işçilər pensiyaya çıxanda hesablarında heç bir vəsait olmayacaq. O zaman sosial müavinət almaq üçün müraciət etmək məcburiyyətində qalacaqlar. Bu isə dövlət büdcəsinin üzərinə əlavə yükün düşməsi deməkdir. Ona görə də dövlət sözügedən məsələ ətrafında ciddi düşünməlidir. Fondun isə inzibati qaydada hansısa addım atmaq səlahiyyəti yoxdur".

DAHA İKİ LAYİHƏYƏ İNVESTİSİYA AYRILDI

"Azərbaycan İnvestisiya Şirkəti" ASC-nin (AİŞ) Müşahidə Şurası "Azərbaycan duzu" QSC İstehsalat Birliyinin nizamnamə kapitalına investisiyaların yatırılması ilə bağlı qərar qəbul edib. Bu barədə "Azərbaycanın İnvestisiya Şirkəti"ndən bildiriblər. İnvestisiya Şirkəti layihəyə 2,9 mln. dollar yatırmağı düşünür və QSC-nin nizamnamə kapitalının 25 faizini almağı planlaşdırır. İnvestisiya layihəsinin başlıca məqsədi Masazırda yodlaşdırılmış və saflaşdırılmış duzun istehsalı ilə bağlı zavodun inşasıdır.
Yodlaşdırma prosesi üçün duz Masazır gölü ətrafında yerləşən ərazilərdən yığılacaq. Həmçinin duzun Türkmənistandan gətirilməsi nəzərdə tutulur.

HƏRÇƏND RƏSMİ İRƏVANDA BU BARƏDƏ FİKİRLƏR SƏSLƏNİR

Ümumdünya Ticarət Təşkilatına (ÜTT) üzvlüklə bağlı danışıqlar davam edir. Quruma üzv ölkələrin səlahiyyətli nümayəndələri ilə Cenevrədə baş tutan son görüşdən sonra nəzərəçarpacaq irəliləyiş əldə olunduğunu deyən Xarici İşlər nazirinin müavini Mahmud Məmmədquliyev bildirib ki, hər hansı problem ortaya çıxmayacağı təqdirdə Azərbaycan 2010-cu ildə təşkilata üzv qəbul ediləcək.

Azərbaycanda daha iki bank fəaliyyət başlamağa hazırlaşır. "Paşa Bank" və "Avroasiya" adlı banklar Ədliyyə Nazirliyinə və Milli Banka müraciət ediblər.

SƏLİM MÜSLÜMOV: “İSTƏYİRİK Kİ, BÜTÜN PENSİYALARI YIĞDIĞIMIZ SOSİAL SIĞORTA HAQLARI HESABINA MALİYYƏLƏŞDİRƏK”

Dünya Bankı Azərbaycanda pensiya islahatlarının davam etdirilməsinə 10 milyon dollar vəsait ayıracaq. Dövlət Sosial Müdafiə Fondunun sədri Səlim Müslümovun rəhbərlik etdiyi nümayəndə heyətinin Vaşinqtona səfəri zamanı Azərbaycandakı sosial islahatlarla əlaqədar bankın Direktorlar Şurasının müzakirələri aparıldıqdan sonra bu qərar qəbul edilib. Fondun sədri Səlim Müslümov bildirib ki, kreditin 5 milyon dolları sosial müavinətlərin ödənilməsi strategiyasının həyata keçirilməsinə, 5 milyon dolları isə sosial sığorta sisteminin təkmilləşdirilməsi layihəsinin başa çatdırılmasına sərf olunacaq.

BAKI BƏYANNAMƏSİ AVROPA ÜÇÜN YENİ İQTİSADİ PERSPEKTİVLƏR VƏD EDİR

Demokratiya və İqtisadi İnkişaf Uğrunda Təşkilatın (GUAM) Bakı sammiti başa çatsa da doğurduğu geosiyasi və geocoğrafi rezonans dünyanın nüfuzlu politoloji - ekonomik tədqiqat mərkəzlərinin ən qaynar mövzusu kimi dövriyyəsini artırmaqdadır. Ötən ay Polşada keçirilən Krakov sammiti bu qədər səs-küy doğurmamışdı. Krakovda "masaya qoyulan" qlobal enerji layihələri təklif xarakteri daşıyırdısa, Bakı sammiti paketdəki sənədlərin möhürlənməsi ilə tarixə öz möhürünü vurdu. Bakı Bəyannaməsi region və Avropa üçün yeni iqtisadi perspektivlər açan layihələrin gerçəkləşməsinə baza yaradan konsepsiya kimi qiymətləndirilə bilər.

SƏNAYE VƏ ENERGETİKA NAZİRLİYİNİN (SEN) DÖVLƏT QAZ NƏZARƏTİ İDARƏSİNİN SƏLAHİYYƏTLƏRİ ARTIRILIB

Nazirlər Kabinetinin qərarı ilə "Azərbaycan Respublikasında dövlət qaz nəzarəti haqqında əsasnamə"nin yeni variantı təsdiqlənib. Dövlət Qaz Nəzarəti İdarəsi (DQNİ) yaxın vaxtlarda "Azneft" İB-də yoxlamalara başlayacaq.
Bu barədə İdarənin rəisi Asəf Zeynalov məlumat verib. DQNİ-nin hər bir qurumun qazdan istifadəsinə nəzarət funksiyasını həyata keçirdiyini deyən A.Zeynalov qeyd edib ki, ilin sonuna qədər bütün işlər qrafikdə nəzərdə tutulduğu kimi gerçəkləşdiriləcək.

LAZIMİ SƏNƏDLƏR HÖKUMƏTƏ TƏQDİM EDİLMƏK ÜÇÜN HAZIRLANIR

Milli Məclisə hələlik batmış əmanətlərin qaytarılması ilə bağlı qanun layihəsi daxil olmayıb. Amma bunun mexanizmləri dəqiqləşdirildikdən sonra məsələyə qayıdılacaq. Bunu Milli Məclisin iqtisadi siyasət komissiyasının sədri Ziyad Səmədzadə bildirib.
Onun sözlərinə görə, batmış əmanətlərin qaytarılması hökumətin diqqət mərkəzindədir. Hazırda Baş nazirin rəhbərliyi ilə yaradılmış dövlət komissiyası artıq Maliyyə Nazirliyi, "Kapital bank" və digər təşkilatların iştirakı ilə araşdırmalar aparır.

HÖKUMƏT İSƏ İNFLYASİYANI BİRRƏQƏMLİ SƏVİYYƏDƏ SAXLAMAQ NİYYƏTİNDƏDİR

Beynəlxalq Valyuta Fondu bu il Azərbaycanda inflyasiyanın səviyyəsinin 20%-ə çatacağı barədə proqnoz verib. Bunu BVF-nın Azərbaycanda təmsilçisi Bazel Zavoyko bildirib.
Onun sözlərinə görə, bir neçə gün bundan əvvəl BVF özünün Cənubi Qafqaz ölkələri üzrə hesabatını bəyan edib. "Gələn həftə hesabat BVF-nın saytında yerləşdiriləcək" - deyə, B.Zavoyko əlavə edib.

Gələn il regional innovasiya zonalarının yaradılmasına başlanıla bilər. Bunun üçün nəzərdə tutulan qanun layihəsi qəbul olunsa, sözügedən sahədə tədbirlərin həyata keçirilməsinə heç bir əngəl qalmaz. Bu barədə Rabitə və İnformasiya Texnologiyaları naziri Əli Abbasov məlumat verib.
Əsas qanun payızda parlament tərəfindən qəbul edilərsə, yanvarın 1-dən artıq Azərbaycanda xüsusi innovasiya zonalarının yaradılması üçün şərait yaranacaq. Nazirin sözlərinə görə, innovasiya zonalarının yaradılması ilə bağlı məsələlər Rabitə və İnformasiya Texnologiyaları Nazirliyinin bu yaxınlarda dövlət başçısına təqdim etdiyi təkliflər paketində əksini tapıb.

ARTIQ BUNUN ÜÇÜN PİLOT LAYİHƏ DƏ VAR

Səngəçalda 300 mVt-lıq elektrik stansiyasının tikintisinə hazırlıq işləri başa çatdırılıb. "Azərenerji" ASC-nin məlumatına görə, stansiyaların əsas binalarının tikintisinin başlanması üçün özülqoyma işləri həyata keçirilir. Bu məqsədlə ərazidən keçən və diametri 102 sm olan su xəttinin yerinin dəyişdirilməsi tədbirləri yekunlaşdırılıb. Tikintinin birinci mərhələsi üçün lazım olan materiallar iyunun birinci ongünlüyündə Finlandiyadan alınaraq ölkəyə gətiriləcək.

Bu il "Kənd-Qida İş" Həmkarlar İttifaqı Federasiyasının ilk, ərazi və sahə təşkilatlarında hesabat-seçki kampaniyası keçiriləcəkdir.
Federasiyanın aparat rəhbəri, təşkilat və təlimat şöbəsinin müdiri Elmira Bəhmənova demişdir ki, hesabat-seçki yığıncaqlarının cədvəl əsasında bu ilin avqust-oktyabr aylarında ilk təşkilatlarda, noyabr-dekabrda isə ərazi və sahə qurumlarında keçirilməsi nəzərdə tutulmuşdur.

Beynəlxalq Şəffaflıq Təşkilatı ("Transperancy İnternational") korrupsiyaya qarşı mübarizədə Azərbaycanın həyata keçirdiyi islahatları dəyərləndirsə də, bu sahədə bir sıra detalların yerinə yetirilməsinin yubanmasından narahatdır. Təşkilatın sədri Hüget Label bildirib ki, son bir neçə ildə Azərbaycan korrupsiya ilə bağlı qanunvericilik və institusional sahədə nailiyyətlər əldə edib, amma təhsil, səhiyyə, kommunal sektorda bəzi xoşagəlməz hallar davam edir.

Avropa Bankı Bakı-Tbilisi-Qars dəmir yolu layihəsinin maliyyələşdirilməsinə razılıq verdiyini bəyan edib. Bankın prezidenti Jan Lemyer AYİB-in Kazanda keçirilən 16-cı illik toplantısında Azərbaycanın İqtisadi İnkişaf naziri Heydər Babayevlə görüşü zamanı bu layihənin region üçün həddindən artıq əhəmiyyət daşıdığını bildirib.