Sabah bütün dünya qadınları, o cümlədən Azərbaycan xanımları öz bayramlarını qeyd edəcəklər. Bu gün Azərbaycan qadınının cəmiyyətdə öz mövqeyi və öz yeri vardır. Statistik göstəricilərə nəzər salsaq görərik ki, Azərbaycan qadınının hər min nəfərindən 745-i ali təhsillidir. Təhsil sahəsində çalışanların 71 faizi, səhiyyədə fəaliyyət göstərənlərin 61 faizi, aspirant və doktorantların 28 faizi, jurnalistlərin 41 faizi, elmi işçilərin isə 50 faizi zərif cinsin nümayəndələrindən ibarətdir. Dövlət qulluqçularının isə 39 faizini qadınlar təşkil edir. Parlamentdə millətimizi təmsil edən vəkillərin də 11,2 faizi xanımlardır. Hüquq-mühafizə orqanlarında çalışan qadınlarımız da kifayət qədərdir. Məlumat üçün bildirək ki, məhkəmələrdə hakimlərin bir çoxu məhz zərif cinsin nümayəndələridir. Vaxtilə Apelyasiya, Konstitusiya və Ali məhkəmələrin sədrləri və Ədliyyə naziri vəzifəsində də çalışan qadınlarımız olub. Bu statistik göstəricilərə görə, Azərbaycan dünyanın əksər ölkələrindən, hətta bir sıra Avropa dövlətlərindən də irəlidədir. Bu sadalananlar Azərbaycan qadınlarının böyük potensiala sahib olduğundan bir daha xəbər verir. Maraqlıdır, Azərbaycan qadınının bu potensialından cəmiyyətdə necə istifadə olunur?
Mədəniyyət İşçiləri Müstəqil HİRK-in sədri Cəmilə Səttarova müasir qadınların cəmiyyətdəki rolunu müəyyən etmək üçün ilk olaraq əsaslı təhlillərin aparılmasına ehtiyac olduğunu bildirdi: "Həmkarlar İttifaqları Konfederasiyasına daxil olan sahələr üzrə daim təhlillər aparılır. Qurumun qadın siyasəti ilə məşğul olan komisiyası var. Komissiya təkliflərin nəticələrinə uyğun yerlərdə lazımi tədbirlər görür”.
Qadınlarımızın öz hüquqlarını bilməsi üçün böyük səy göstərdiklərini deyən RK sədri onu da etiraf etdi ki, digər ölkələrdə olduğu kimi Azərbaycanda da qadınların özünəməxsus problemləri vardır. Amma Azərbaycan qadınının probleminin bütün cəmiyyətin problemi olduğunu unutmaq lazım deyil.
C.Səttarova 21-ci əsrdə yaşamağımıza baxmayaraq, hələ də gender bərabərsizilyi aktual problem olaraq qalır: "Bu hal paytaxtla müqayisədə bölgələrdə özünü daha qabarıq büruzə verir. Əlbəttə, Azərbaycan qadınının yaşadığı cəmiyyəti ideal adlandırmaq səhv olardı. Çünki müasir dövrün bir sıra fəsadları onların da həyatı üçün qaçılmaz olub. Qadına qarşı təzyiqlər qalmaqdadır. Müasir cəmiyyətin bütün kretiləri - insan alveri, zorakılıq, narkomaniya, alkoqalizm kimi mənfi hallar zərif cinsin nümayəndələri üçün fəsadsız ötüşmür. Lakin Azərbaycan xalqının qadına olan hörməti onları bu kimi fəsadların təsirindən müəyyən qədər qoruyur".
"Qadınlarımız siyasət aləminə də biganəlik göstərmirlər. Onlar Azərbaycanın ərazi bütövlüyünün bərpa edilməsi üçün əllərindən gələni əsirgəmir, bu məsələni istər beynəlxalq aləmdə, istərsə də Azərbaycanda daim diqqət mərkəzində saxlayırlar. Onlar bu sahədə müzakirələr aparır, təkliflərini səsləndirirlər. Qaçqın və məcburi köçkünlərin torpaqlarına qayıtması üçün səy göstərirlər", -deyə Cəmilə Səttarova bildirdi.
"Təmiz Dünya" İctimai Birliyinin sədri Mehriban Zeynalova isə bu gün Azərbaycan qadınının cəmiyyətdəki rolunun təzadlı olduğunu vurğuladı: "Azərbaycan cəmiyyətində aktiv və əzilən qadınlar kateqoriyası hələ də qalmaqdadır. Balansa nəzər salsaq, əzilən qadınlar aktiv nümayəndələri üstələyir. Bu da təsir altına düşən aktiv qadınların əzilməsi təhlükəsini yaradır. Bununla yanaşı, Azərbaycan qadınının öz potensialını göstərmək üçün qarşısında olan maneələr çoxdur. Bu gün zərif cinsin nümayəndələrinin hüquqlarını pozanlar yalnız əks cinsin nümayəndələri deyil. Onlar öz həmcinsləri tərəfindən də zorakılığa məruz qalırlar".
Təşkilat sədri Azərbaycan qadınının öz hüquqlarını bilməməsi və məlumatsız olması kimi fikirlərin absurd olduğunu söylədi: "Bu, heç də belə deyil. Çünki Azərbaycan qadını digər ölkələrdə yaşayan həmcinslərindən fərqli olaraq, çox gücludür. Bu tarixən də belə olub. Tarixə nəzər salsaq, kifayət qədər öz sözünü demiş qadınlarımızın olduğunu bir daha görərik. Ola bilməz ki, bu gün həmin irsin davamçıları arasında kifayət qədər yüksək səviyyəli qadınlarımız olmasın. Lakin Azərbaycan qadını öz potensialının üzə çıxması üçün bütün maneələri dəf etməyə çalışmalıdır. Çünki Azərbaycan qadını hətta bəzi inkişaf etmiş dövlətlərin qadınlarından da ağıllı və güclüdür. Sadəcə, onlara zəif yox, zərif cinsin nümayəndələri kimi münasibət göstərmək lazımdır".
Hər iki müsahibim sözünün sonunda onların təbriklərini və xoş arzularını qadın oxucularımıza çatdırmağı xahiş etdi. Biz də bu təbriklərə qoşuluruq.

Gülər KƏRİMLİ .

çap üçün verisya