İş ondadır ki, Azərbaycanın paytaxtı Bakı şəhəri siyahıda Moskvadan da irəlidədir. Bakı Müstəqil Dövlətlər Birliyi məkanında ən bahalı şəhər statusuna malik olaraq, reytinqdə 20-ci yerdə dayanmaqla Parisi, Madridi, Romanı, Dubayı, İstanbulu, Moskvanı, Pekini, Berlini, Varşavanı və digər meqapolisə çevrilmiş yaraşıqlı və zəngin infrastruktura malik şəhərlərdən bahalı olduğunu təsdiqləyib. Xatırladaq ki, ötən il açıqlanmış reytinqdə ölkəmizin paytaxtı 109-cu yerdə olmuşdu və Avropanın demək olar ki, bütün şəhərlərindən ucuz şəhər statusuna malik idi.
Şirkət mütəxəssisləri 125 növ xidmət və məhsulun qiyməti üzrə araşdırmalarını dünyanın 270 iri şəhərində aparıb. Bu zaman onlar şəhərlərin infrastruktur və xidmət çeşidləri, rabitə, nəqliyyat, internet, kommunikasiya texnologiyaları, ərzaq xərcləri, qeyri-ərzaq və məişət məhsulları, yaşayış vəziyyəti, həyat şəraitinin indeksi, ictimai-iaşə, mənzil və istehlak bazarındakı vəziyyət, daşınma, kommunal xərclər, yanacaq və digər sərfiyyatları qiymətləndiriblər. “Konsaltinq” şirkətinin əməkdaşları həmçinin hotel və istirahət mərkəzləri, turizm obyektləri ilə bağlı bir çox xidmət sahələrinin qiymət tariflərini dəyərləndirərək hər bir şəhərin öz xərclərini müəyyən ediblər.
"ECA İnternational"ın kriteriyalarına görə, Bakıda normal yaşamaq üçün ayda ən azı 7-8 min dollar lazımdır. Bakının bahalı şəhər olmasını əsaslandıran başlıca faktorlar yaşayış və istirahət üçün vacib olan elementlərin dünya qiymətlərindən də üstün olmasıdır. Supermarket və mağazalarda ərzaq və qeyri-ərzaq qiymətlərinin baha olmasının, hotellərdə və istirahət turizm mərkəzlərindəki qiymət yüksəkliyinin səbəbi inhisarçılıqla bağlıdır. Məlum olduğu kimi, iri biznes və hotel-turizm sektoru xüsusi olaraq inhisarçılara məxsusdur. Bu isə qiymətlərə təsir edən əsas faktorlardandır. Məsələn, "Avropa" və yaxud "Exselsior" hotelində bir stəkan kofe içmək, şam etmək məşhur Filadelfiya və Monrealdakından baha başa gəlir. Yaxud Avropada 7 dollara təklif olunan pivə Bakının orta səviyyəli istirahət mərkəzində 12 dollardan aşağı deyil.
Yemək və içmək xərclərindən başqa, Bakıda üçulduzlu mehmanxanada dincəlmək də Avropa və Amerika ilə müqayisədə yüksəkdir. Məsələn, "Amburan", "Exselsior", "Niaqara", "Af Senter" və digər istirahət mərkəzlərində birgünlük xərc 450 avrodan aşağı deyil. Halbuki bu pulla Antalyada bir həftə, hətta Florensiyada və Maldiv adalarında iki gün dincəlmək mümkündür.
Bakıda daşınmaz əmlakın icarə və satış qiymətlərinin də yüksək olması ciddi şəkildə özünü büruzə verməkdədir. Xarici dövlətlərdə 1500 avroya beşotaqlı mənzil icarəyə götürmək mümkün olduğu halda, Bakıda "İnqilab" küçəsində malikanə tipli evin aylıq icarəsi 5 min avrodan aşağı deyil. Təkcə "Təzə Bazar"la üzbəüz "əkizlər" adlanan dairəvi hündürmərtəbəli binada 4 otaqlı mənzilin icarəsi 3 min avrodur. Kaliforniyada 1500 dollara ən yaxşı mənzil icarə etmək mümkündür. Eləcə də mənzillərin satış qiymətinə görə də Bakı Avropa və Amerikanın bir sıra ölkələrini geridə qoyur. Türkiyənin İstanbul şəhərində üçmərtəbəli malikanənin satış qiyməti 450 min avro olduğu halda, Mərdəkanda ikimərtəbəli bu tipli ev 2 milyon dollara bərabərdir. Bakıda mənzillərin qiyməti Almaniya, Fransa, İsveç, İspaniya, Çexiya, Finlandiya, Rusiya, Yunanıstan və digər dövlətlərin bir sıra şəhərlərindən də bahadır. Finlandiyada mənzillər paytaxtımızla müqayisədə 2 dəfə ucuzdur. Frankfurt-Maynda 200 min avroya 170 kv.metrlik mənzil almaq olduğu halda, Bakıda şəhərin mərkəzində bu həcmdə mənzilə (1kv.metri 2400 manat) 450 mindən çox pul saymaq gərəkdir.
Bakının bahalı şəhər kateqoriyasına aid olması heç də paytaxtımızın bütün insanlar üçün əlverişli yaşayış mərkəzi olması anlamını yaratmır. Yəni Filadelfiya, Baltimor, Mayami, Birmingem, Monreal, Tokio kimi şəhərlərin bahalılığı əhalinin yaxşı gəlirlərə malik olması ilə bağlıdır. Bakıda isə belə deyil. Ümumiyyətlə, bahalı kateqoriyaya aid olunan şəhərlərin əksəriyyətinin əhalisi xüsusi sosial inkişaf göstəricilərinə malik deyil. Yəni bu şəhərlər yüksək texnologiyalar, idarəetmə, infrastruktur, xidmət sahəsindəki səviyyəsinə görə ABŞ, Fransa, İspaniya, Kanada və sair dövlətlərlə müqayisədə qat-qat aşağıda dayanır. Heç kim Bakı sakinlərinin Madriddəkilərdən yaxşı yaşamasını iddia edə bilməz. Məsələn, təkcə Qətərin şəhər infrastrukturu və buradakı işləyən əhalinin illik gəlirləri respublikamızla müqayisədə 20 dəfəyə yaxın artıqdır. Orta Şərqin zəngin qaz və neft ölkəsi olan Qətərdə əhalinin illik gəlirləri 60 min dollar, ölkəmizdə isə bu rəqəm 3000 dollardan bir qədər çoxdur.

çap üçün verisya