Bu il də paytaxtda bir sıra maraqlı bayram tədbirləri keçiriləcək

2010-cu ilin gəlişinə 5 gün qalıb. Yeni illə yanaşı, Dünya Azərbaycanlılarının Həmrəyliyi Gününün qeyd olunması bayram sevincini daha da artırır. Paytaxtda əvvəlki illərin bayram əhvali-ruhiyyəsi hiss edilməsə də, bəzi ərazilərdə yolkalar qurulub. Amma, həmişə olduğu kimi, uşaqlar Şaxta Baba və Qar Qızın gəlişini səbirsizliklə gözləyirlər. Maraqlıdır, yeni il ərəfəsində paytaxtda hansı tədbirlər keçiriləcək? Bayram şənliyini restoranda, kafedə qeyd etmək imkanı olmayanları telekanallar hansı şou verilişlərlə əyləndirəcək?

Məsələyə münasibət bildirən Mədəniyyət və Turizm Nazirliyi mətbuat xidmətinin əməkdaşı İntiqam Hümbətov teatrlarda müxtəlif yeni il şənliklərinin keçiriləcəyini söylədi: "Mədəniyyət və Turizm Nazirliyi yeni illə bağlı ayrıca proqram nəzərdə tutmayıb. Amma teatrlarda və Bakı Dövlət Sirkində bayram tədbirləri olacaq. Həmin mədəniyyət ocaqları müstəqil şəkildə yeni il proqramları hazırlayıblar".
Bakı Dövlət Sirkinin mətbuat xidmətindən bildirdilər ki, dekabrın 25-dən başlayaraq, yanvarın 10-dək arenamız uşaqlara xidmət göstərəcək.
Bakı Şəhər İcra Hakimiyyətinin mətbuat xidmətinin rəhbəri Nuranə Mərdanova əlamətdar günlərlə əlaqədar bir sıra tədbirlərin keçirilməsinin nəzərdə tutulduğunu dedi. Konkret tədbirlərə gəldikdə isə, N.Mərdanova bu barədə gələn həftə məlumat veriləcəyini vurğuladı.
Amma öyrənə bildik ki, yeni il münasibətilə "İçərişəhər" Dövlət Tarix-Memarlıq Qoruğu ərazisində bayram tədbirləri keçiriləcək. Bu qurumdan verilən məlumata görə, tarixi bir yerdə bayram ab-havasının yaradılması üçün müvafiq hazırlıq işləri görülüb. İçərişəhərin əsas meydanlarında dekorasiya işləri başa çatmaq üzrədir. Qız Qalasının ətrafındakı ərazidə təbii şam ağacları əkilib və orijinal üslubda işıqlandırılacaq. Eyni zamanda Qoşa Qala qapıları meydanı da ənənəvi bayram atributları ilə bəzədiləcək. Bununla yanaşı, Şirvanşahlar Sarayında uşaqlar üçün Yeni il şənliyinin keçirilməsi də nəzərdə tutulur. Şah Sarayında təşkil olunacaq şənlikdə uşaqları qış bayramı mövzusunda maraqlı interaktiv tamaşalar, habelə Yeni il hədiyyələri, müsabiqə və viktorinalar gözləyir. Tamaşalardan biri İçərişəhər sakinlərinin 3 - 12 yaşlı uşaqları üçün təmənnasız təşkil olunacaq.

Televiziyalar maraqlı verilişlər hazırlayıb

Azərbaycan Televiziya və Radio Verilişləri QSC-dən (AZTV) bildirdilər ki, bu il də tamaşaçılarını yeniliklərlə sevindirəcəklər. Qurumun mətbuat xidmətinin rəhbəri Xatirə Qasımovanın sözlərinə görə, "Yeni il" şənliyi verilişi ilə bərabər, digər bayram proqramları da hazırlanır. Bayram ərəfəsində tamaşaçıları yeni televiziya tamaşası ilə sevindirəcəyik. Ramiz Həsənovun rejissorluğu ilə "Evləri köndələn yar" tamaşasının 25 ildən sonra davamı çəkilib. İnanıram ki, həmin tamaşanın ardı da çox populyar və maraqlı olacaq. Yeni ilə aid "Latlandiyadan gələn qonaq" adlı daha bir verilişimiz tamaşaçılara təqdim ediləcək".
Yerli telekanallar arasında bayram şənlikləri ilə bağlı maraqlı layihə təqdim edən "Lider" telekanalı bu il də fərqlilik nümayiş etdirmək fikrindədir. Telekanalın baş prodüsseri Murad Dadaşov dedi ki, hələlik açıqlama vermək istəməzdim. Amma bir şeyi deyə bilərəm, bu çox maraqlı bir proqramdır. Həmin proqram tanınmış insanların iştirakı ilə təşkil olunacaq. Maraqlı şoular nəzərdə tutulub. Çalışacağıq ki, tamaşaçıların zövqünü oxşayaq".
"Xəzər TV"dən bayram proqramı barədə məlumat vermək istəmədilər. Telekanalın Proqramlar Departamentinin prodüsseri Zahid İsmayılov bunun sirr olduğunu dedi: "Biz hələlik sirr olaraq saxlayırıq. Efir vasitəsilə anonsları gedəndə hər kəs izləyəcək. Ehtimal ki, konsert proqramları üstünlük təşkil edəcək".
İctimai Televiziyada da yeni il şənlikləri ilə bağlı proqramlar nəzərdə tutulub. Telekanaldan verilən məlumata görə, hazırda hazırlıq işləri aparılır, bu səbəbdən də geniş məlumat verilmir.
"Space" və "ANS" kanallarından da ümumi şəkildə yeni illə bağlı maraqlı verilişlərin olacağını bildirdilər.

çap üçün verisya