Turizmin tələbələri ölkədə kadr hazırlığından narazıdırlar

Azərbaycan turizmin inkişaf etdirilməsi üçün çox əlverişli coğrafi mövqedə yerləşsə də, bu sahədə hələ problemlər qalmaqdadır. Turizm iqtisadiyyatın çox çətin, eyni zamanda gəlir gətirən sahəsi olduğundan onu inkişaf etdirmək məqsədi ilə düzgün siyasətin qurulması vacibdir. Bunun üçün beynəlxalq standartlara cavab verən müasir mehmanxana, motel, əyləncə kompleksləri, restoran və s. obyektlər tikilməli, tarixi-memarlıq abidələrimiz bərpa olunmalı, abadlıq işləri aparılmalı, gələn turistlər yüksək səviyyədə qarşılanmalıdırlar. Bununla yanaşı, xidmətlər paketinə hüquqi və təhlükəsizlik məsələləri də daxil edilməlidir.
Mövcud problemlər nəzərə alınaraq Mədəniyyət və Turizm Nazirliyi 2007-2016-cı illər üçün turizmin inkişafına dair Dövlət Proqramı layihəsini hazırlayıb. Nazirlikdən kütləvi informasiya vasitələrinə verilən məlumata əsasən, ilk mərhələdə proqram artıq bütün müvafiq nazirliklərlə razılaşdırılıb. Proqramın əsas istiqaməti turizm sahəsində çarpayıların sayının artırılmasıdır. Bu gün Azərbaycanda 24 min 700 çarpayı var. 2016-cı ilə qədər onların sayını 150 minə qədər artırılması planlaşdırılıb.
Azərbaycan Turizm İnstitutunun turizm biznesinin təşkili və texnologiyası kafedrasının müdiri, dosent Bahadur Bilalov bildirdi ki, "2004-2008-ci illərdə regionların sosial-iqtisadi inkişafına dair Dövlət Proqramı" çərçivəsində turizmin inkşafı baxımından xeyli iş görülmüşdür. Məsələn, bu gün demək olar ki, Azərbaycanın hər bir səfalı guşəsində turistləri qəbul edə biləcək mehmanxanalar mövcuddur. Bakı şəhərini respublikamızın regionları ilə birləşdirən avtomobil yollarının yüksək standartlara uyğun yenidən qurulması da müsbət qiymətləndirilməlidir.
Dosentin fikrincə, hazırda mövcud olan turizm növlərindən yalnız kosmik turizmi çıxmaq şərtilə, digərlərini Azərbaycanda inkişaf etdirmək və gəlir əldə etmək mümkündür. Hesab edirəm ki, bu növlərin içərisində ən böyük potensiala malik olanı kənd turizmidir. Ölkədə 4 min 253 kənd yaşayış məntəqəsi var ki, bunun da böyük əksəriyyəti yaşıllıqlar qoynunda və ya dağlıq ərazilərdə yerləşir. Kənd turizminin reklamı və onların təbiəti, yaşayış evləri hətta, yerli camaatın adət-ənənələri haqqında məlumatların istehlakçıya çatdırılması üçün "Kənd turizmi"adlı internet portalının yaradılması məqsədəuyğun olardı. Turistlərin asudə vaxtlarının səmərəli təşkili üçün yerli əhali tərəfindən əlavə xidmətlərin təşkili imkanları da artırılmalıdır.
Otel və mehmanxanalarda mövcud prolemlərə gəlincə, o, bunların kifayət qədər olduğunu inkar etmədi: "Regionlarda fəaliyyət göstərən mehmanxanalar və istirahət mərkəzləri işlərini düzgün qurmağı bacarmırlar. Faktiki olaraq ilin müəyyən bir mövsümündə fəaliyyət göstərirlər. Buna görə də daimi işçi saxlaya bilmirlər. Hər mövsümdə yeni yəni səriştəsiz işçiləri cəlb etmək məcburiyyətində qalırlar ki, bu da xidmətlərin keyfiyyətinə mənfi təsir göstərir. İkinci bir tərəfdən, texniki peşə təhsili səviyyəsində lazımi sayda kadr hazırlanmır. Düzdür, son vaxtlar Qəbələdə "Turizm və otelçilik" Peşə Mərkəzi yaradılıb, İsmayıllıda pilot peşə məktəbinin yaradılması üçün işlər həyata keçirilir, lakin bunlar kifayət etmir. Əsas problem peşə öyrədəcək müəllimlərin çatışmamasıdır. İlk növbədə belə müəllimlər hazırlanmalıdır".
Məlumat üçün bildirək ki, kadr hazırlığı məqsədi ilə ölkənin lisey və kolleclərində, eləcə də ali təhsil ocaqlarında- Azərbaycan Dövlət Memarlıq və İnşaat Universiteti, Bakı Dövlət Universiteti, Azərbaycan Dövlət İqtisad Universitetində, daha sonra isə 2006-cı ildə əsas baza kimi təşkil olunan Azərbaycan Turizm İnstitutunda müvafiq turizm ixtisasları açıldı. Mövcud fakültələrdə oxuyan tələbələr isə problemlərinin heç də az olmadığından gileylənirlər. Apardığımız araşdırmadan məlum oldu ki, turizm ixtisasının nöqsanlarından biri də vəsait problemidi. Dərsliklərin azlığı, ölkə turizmini əks etdirən elektron saytların, gündəlik qəzet və jurnallarda bu sahəyə aid materialların kifayət qədər olmaması ixtisasın mənimsənilməsində çətinlik yaradır. Bundan başqa, ölkədə məhdud sayda olan ixtisaslı mütəxəssislər pedaqoji fəaliyyətə çox passiv şəkildə cəlb edilir. Digər bir problem isə turizm ixtisasında praktikanın ölkə üzrə aşağı səviyyədə olması, beynəlxalq təcrübədən hələ ki, minimum faydalanmadır.

çap üçün verisya